Read izere aYohana 7 Bible Online

aYohana 7 - izere bible

aYohana 7

¹Nama anong, aYeso tsang a gorok aGalili. Amma shim a tá tseng kaye̱e̱r aYahudiya baꞌ, kamok áner aYahuda á tá se azong shim a tú ku fe̱r.

²Izen kunye Riye̱ Rikan áner aYahuda nong á yiring be kusor ba kaye̱e̱r nabur [7] ta be̱ barak,

³áronyining aYeso fe̱ be wu ye, “Fa gye̱ ke wan dorok aze nong ta be niben aYahudiya nong álimazhiri wan ta di itomong azhing iya wan ta nye.

⁴Akak kuse a ta shim a tu ku ren ne a bun a nye ike̱re̱ wu nune̱re̱ng baꞌ. Kum wan ta sen nye ike̱re̱ na, tonong rice wan nong kazatse tà ka ren.”

⁵Kamok áronyining aYeso'me gip á ti no̱o̱k katsak ni wu baꞌ.

⁶Kamok anong aYeso fe̱ be ba ye, “Izen'i n nye nizham baꞌ, amma nufe yin, koakye izen se gye̱r tsek.

⁷Yin kazatse ta kyem ka ta ka ranyin baꞌ, amma ka ti ramin kamok mi fe̱ ye itomong wu nye imaan'e.

⁸Yin tseng yin naro̱ riye̱ rikan'e tsek. Mi tà tseng naro̱ kunye riye̱ rikan'e kyo̱o̱rna baꞌ, kamok izen'i n nye nizham baꞌ.”

⁹A tá fe̱ anong, a sor na aGalili.

¹⁰Nama áronyining wu ta be naro̱ riye̱ rikan ame, aYeso tseng gip, amma a tseng de̱s baꞌ.

¹¹Áner aYahuda ame yiir tse̱r aYeso naro̱ riye̱ rikan'e. Ne á risim ye, “Aner ame se akye̱ e̱?”

¹²Kaye̱e̱r rigwo̱m ánerawe'me ákak fe̱ cucuk natoon aYeso. Ákak fe̱ ye, “A nye aner atek.” Ne ákak fe̱ ye, “Wayo, a wo̱ro̱k ánerawe.”

¹³Amma akak kyem a wuruk nong a tá fe̱ natoon aYeso'me kanang baꞌ, kamok ba tá fok inyim áko̱k kasho̱o̱n áner aYahuda'me.

¹⁴A tá bo̱ karo̱ dide̱ng ni inye riye̱ rikan'e ne aYeso ma tseng kaye̱e̱r kubang agbang kutu kuya Adakunom iben'e nong a tá san ibo̱so̱p ánerawe'me.

¹⁵Ayong áko̱k kasho̱o̱n aner aYahuda te zhing ma á fe̱ ye, “Aner na kun tseng naro̱ kubo̱so̱p baꞌ ko̱, a san ane̱ a ta a ren ike̱ng dide̱ng ana e̱?”

¹⁶aYeso fe̱ be ba ye, “Ike̱re̱ iya mi ta ka bo̱so̱p yin'e nye ife rice mi baꞌ, amma ife aya a tin tom.

¹⁷Aner aya a ta shim a ta nye ike̱ng iya Adakunom ta shim, a ta ren ye kubo̱so̱p'i ne nufe Adakunom, sang kufe rice mi.

¹⁸Aner aya a ta fe̱ natoon rice wu fe̱ nong a tà tiyiik rice wu. Amma aya a ta shim a ta tiyiik aya a tú ku tom, ayong ne a nye afe katsak, a be abo̱o̱s baꞌ.

¹⁹Aser, aMusa ne a tá ka no̱o̱k yin Itsi aꞌa? Amma gip be anong, akak kuse kaye̱e̱r yin a ta kuus Itsi'me baꞌ. Akye̱ sak yin shim tin fe̱r yin e̱?”

²⁰Ánerawe fe̱ be wu ye, “Wan be amaan kabik. Angan ne á shim á ta ka fe̱r e̱?”

²¹Ayong aYeso fe̱ be ba ye, “Mi nye ike̱ng azhing izining tsek, amma yin te yin zhing cice̱r yin.

²²aMusa tá sak yin tá nye yin izhak (wu ne a san'e baꞌ, amma átukop átukop yin) Gip be anong yin nye yin inoon izhak katuk Asabar.

²³To̱, ke i nye ye a ta kyem a nye igon izhak katuk Asabar nong a ta kuus Itsi aMusa, akye̱ sak yin be yin riye̱ riwe be mi, kamok mi ta sak ánerawe ta te atser cei katuk Asabar e̱?

²⁴Won kuto̱ yin ánerawe amok natoon ike̱re̱ yin ta ye̱re̱k yin tsek, amma to̱ yin kaye̱e̱r katsak.”

²⁵Ayong áner aUshalima ákak fe̱ ye, “Aser, aner na ne a tse̱r a tà fe̱r a'a?

²⁶Ayuna, a fe̱ ne̱k, sang ba fe̱ ike̱ng ikak be wu baꞌ. Ka áko̱k kasho̱o̱n'e n shim ye wu ne a nye aKiristi de̱?

²⁷Amma yir ren yir karo̱ aner na tú ku ne, izen iya ne aKiristi afe katsak tana be̱, akak tà ren karo̱ kaya a tù ku wuruk baꞌ.”

²⁸aYeso ta sen bo̱so̱p ánerawe'me kaye̱e̱r kubang agbang kutu kuya Adakunom iben'e, a tá kuto̱ naza ye, “Ei, yin ti ren yin, ne i ren yin karo̱ afe mi tú ku ne, mi be̱ kube̱ rice mi baꞌ. Amma aya a tin tom nye afe katsak, yin tu ku ren yin baꞌ.

²⁹Mi tú ku ren kamok mi ne nufu, wu ne a ti tom.”

³⁰aYeso tá fa fe̱ anong yong ánerawe ame shim a tú ku yiir. Amma akak kyem a ti sak kubo̱k ni wu baꞌ, kamok izen wu tsang i nye baꞌ.

³¹Gip be anong, ánerawe dide̱ng ti no̱o̱k katsak na aYeso ne á fe̱ ye, “Nizen iya aKiristi'me, a tà nye itomong azhing iya i ta nar iyuna a?”

³²Áner aFarisi fok ánerawe tá tsang á fe̱ cucuk natoon aYeso, yong ágbang atsi ne áner aFarisi'me tom áfe a ta tor agbang kutu kuya Adakunom iben'e ye á ra se yiir aYeso'me.

³³Ayong aYeso fe̱ be ba ye, “Izen mi tana sor be yin se cie̱k tsek, ne mi kubun nufe aya a tin tom.

³⁴Yin tin tse̱r yin, tin se̱ yin baꞌ. Karo̱ kaya mi tana ku se, yin tà kyem i be̱ yin baꞌ.”

³⁵Áner aYahuda'me fe̱ awan ba ye, “Ake̱ ne wu be, yir tana kyem i tseng yir baꞌ e̱? Ka a be nufe ánerawe yir áya a ta te shaam á ta sor be áner aHeleni, nong a bo̱so̱p áner aHeleni'me a?

³⁶Akye̱ ne wu shim a ta fe̱ wu tá fe̱ ye, ‘Yin tin tse̱r yin, amma yin tin se̱ yin baꞌ e̱?’ Ne, ‘Karo̱ mi tù ku be, yin ta kyem i tseng yin ba e̱?’ ”

³⁷Katuk igang'e, i tá nye agbang kunom kunye riye̱ rikan ame, aYeso dorok a tá ta kuto̱ ye, “Aner aya a fok kuto̱ kukoor, a ra be̱ nunaan a tà so̱ ashi.

³⁸Koangan afe a tin no̱o̱k katsak ni mi, kyo̱ndi rife̱ Adakunom ta fe̱ ye, kaye̱e̱r wu ne itop ashi kutser tà wo̱k.”

³⁹aYeso ti fe̱ natoon Kabik Kazhe̱l'e, aya áfe a tin no̱o̱k katsak ni wu tana se̱ nasho̱o̱n. Nizen iyong, a tsang a no̱o̱k Kabik Kazhe̱l'e baꞌ, kamok a tsang a tiyiik aYeso kaye̱e̱r kaza baꞌ.

⁴⁰Be kufok rife̱ aYeso, ákak ba fe̱ ye, “Katsak'e, aner na ne a nye aner kuzarap Adakunom'me.”

⁴¹Ákak ba bun á fe̱ ye, “Ayu ne a nye aKiristi'me.” Amma ákak bun á rip ye, “Aser, aKiristi'me ta wuruk na aGalili e̱?

⁴²Kufumung izibir rife̱ Adakunom fe̱ ye, aKiristi tà ne kaye̱e̱r kasa aDauda na aBetalami nuwo̱p aDauda tú ku sor aꞌa?”

⁴³Iyong kuto̱ro̱ng ánerawe'me te ze̱r ze̱r.

⁴⁴Ákak shim á tú ku yiir, amma akak ri sak kubo̱k ni wu baꞌ.

⁴⁵Áner aya a tá tor agbang kutu kuya Adakunom iben ame tú bun nufe ágbang átsi ne áner aFarisi ame, yong á tu ku rip ba ye, “Akye̱ sak yin be̱e̱n yin be wu baꞌ e̱?”

⁴⁶Ayong áner aya a tú ku tom ba ame fe̱ ye, “Aner akak kun fe̱ kanu kyo̱ndi aner na baꞌ.”

⁴⁷Ne áner aFarisi ame ku rip ba ye, “Ka yin gip a tá ka wo̱ro̱k yin e̱?

⁴⁸Ka yin kun di yin ako̱k kasho̱o̱n ka aner aFarisi akak tá kun ni no̱o̱k katsak ni wu a?

⁴⁹Wayo. Amma ánerawe na á ta ren ike̱ng ikak natoon Itsi aMusa baꞌ, a tú fiming baꞌ.”

⁵⁰aNikodimus, aya a tá ku tseng nufe aYeso natuk, aya a tá tsang a nye akak kaye̱e̱r áner aFarisi, tú ku rip ba ye,

⁵¹“Itsi yir tonong ye sang yir ta te̱n yir anerawe amok ba' ma ke a tú ku fok nizham nong a ta ra ren ike̱ng iya a tana nye be wu a'a?”

⁵²Ayong á fe̱ be wu ye, “Wan nye aner aGalili'me gip a? Fa rife̱ Adakunom ta di, aner kuzarap kun wuruk na aGalili baꞌ.”

⁵³Koangan dorok nong á tá be kari.