Read izere Itomong Ámanzo 10 Bible Online

Itomong Ámanzo 10 - izere bible

Itomong Ámanzo 10

¹Aner akak tuse na aKaisariya a tú ku yis ye aKoneliyus. A nye aritek ásozha aRom a tá ka yis ba ye Agbang rigwo̱m ásozha Italiya.

²Wu be áfe kasa wu cice̱r nye áfikuus'e, ne a fok inyim Adakunom. Á tobok áfe rizor áya a tá nye áner aYahuda dide̱ng, á kam be kunye aduwa baꞌ.

³Katuk kakak, nabas itso̱m itaar nunom, a di amaleka Adakunom akak kyo̱ndi nabos, a be̱ nufu, a tá fe̱ be wu ye, “aKoneliyus.”

⁴Iyong aKoneliyus'e tisak anyisi ni wu be inyim a tá fe̱ ye, “Akye̱ de̱ Agwo̱m Ágwo̱m e̱?” Ayong amaleka'me shim ye “Adakunom n yiring be wan, aduwa aya wan tá nye be kutobok kuya wan ta tobok áfe rizor n ngarak nufe Adakunom.

⁵Tom aner akak kyo̱o̱rna na aZhopa nong a tà se yis aner akak riyerek wu tá nye aSiman a tá bun a ku yis ye aBitrus.

⁶A se numa aner akak a tá nye itomong kuruk akpa aya a tú ku yis ye aSiman. Kasa wu se bubarak be agbang kudung.”

⁷Nama amaleka'me tá tseng, aKoneliyus yis ásam wu afa be asozha akak aya a nye afikuus'e, áya tú ku se̱s mo be itomong.

⁸A tú tak ba koakye ike̱ng iya a tá nye ne a ku tom ba na aZhopa.

⁹Kaya katson'e nabas katite kunom, nizen iya ba tá be̱ barak a ta no̱ nuwo̱p'e, aBitrus ngarak natoon karo̱ ka ta se ne̱k natoon kutu nong a ta nye aduwa.

¹⁰Izong tú ro̱, a shim ke a se̱ ike̱ng ikak nong a ta ya. Kum ne a ru rusek be anyes ne aBitrus rasak nabos.

¹¹A di kaza nukarak ne ike̱ng ikak igbang'e kyo̱ndi ike̱ng kunak kiis, a tá sen tisik nikes'e kazatse inaas kaben.

¹²Kaye̱e̱r ike̱ng'e, koakye kuri ikewum tú ku se. Ikak be atak anaas ne ikak wo̱k be kafa ne nanon.

¹³Iyong kuto̱ kukak fe̱ be wu ye, “aBitrus, dorok ta fe̱s ike̱re̱ na nong ta ya.”

¹⁴aBitrus fe̱ ye, “Wayo, Agwo̱m Agwo̱m, mi kun ya ike̱ng ikak i ta won dar i se zhe̱l ka ife i ta be narik baꞌ.”

¹⁵Kuto̱'me bun ku fe̱ be wu ife afa'me ye, “Ike̱ng ikak Adakunom ta nye won dar i se zhe̱l ka i be narik baꞌ.”

¹⁶Kuto̱'me yiir fe̱ anong be aBitrus ma kutak kutaar ne a gaar, yong a sok kures ame a tú bun'e naza.

¹⁷aBitrus tá ru to̱ ka ike̱ng iya wu tá di ame nye akye̱ e̱, ne áner aya aKoneliyus tá ka tom ba ame tsang á tse̱r kasa aBitrus tú ku se ma á se. Iyong á nyeseng nanu kari'me,

¹⁸a tá nye amaleku. Á rip ka aSiman aya a tú ku yis ye aBitrus se azong e̱?

¹⁹aBitrus tá ru to̱ natoon ike̱ng iya wu tá di ame, iyong Kabik fe̱ be wu ye, “aSiman, áner akak ba ataar ta tse̱r.

²⁰Dorok, tiik kaben, ku kuus ba. Riye̱ wan tú se gak baꞌ, kamok mi ne i ta tom ba.”

²¹Ayong aBitrus tiik kaben'e nong a tá se fe̱ be áner ame ye, “Mi ne i nye aner aya yin ta tse̱r tú ku di yin. Akye̱ ne yin shim yin mi tá ka nye yin'e e̱?”

²²Áner ame fe̱ ye, “Ako̱k kasho̱o̱n ásozha aRom kak, aya a tú ku yis ye aKoneliyus ne a min tom yir. A nye aner aya a ta se gye̱r nasho̱o̱n Adakunom ne a fok inyim Adakunom dide̱ng. Áner aYahuda cice̱r tú di yiik. Amaleka azhe̱l'e akak fe̱ be wu ye a ra fe̱ be wan ye wan ru tseng kari wu nong ase̱ a ta fok ike̱ng iya wan tana fe̱ be wu.”

²³Ayong aBitrus no̱ be ba kaye̱e̱r kari wu á tá ko̱so̱. Kayatson'e, aBitrus shan iren be átsen wu ame. Áner aZhopa'me ákak tseng mak be wu.

²⁴Kaya katson'e ne á no̱ ba na aKaisariya. aKoneliyus tsang a sen tor kube̱ ba, yong a yis afe iri wu be ágbang áfertseng wu.

²⁵aBitrus tá fa se no̱ kaye̱e̱r kasa'me, ne aKoneliyus tú ku shan niren a tá kpa kaben nasho̱o̱n wu nong a tú ya iben.

²⁶aBitrus tú sak a ta dorok a tá fe̱ be wu ye, “Dorok, mi nye anerawe mama tsek.”

²⁷aBitrus tá sen fe̱ kanu be aKoneliyus'me kaye̱e̱r kari'me ne ánerawe whe̱re̱ nyim.

²⁸Ayong a fe̱ be ba ye, “Yin ren yin tse̱ng tse̱ng ye i nye rine̱n kaye̱e̱r itsi yir áner aYahuda tana nye rifertseng ka a ta tseng ritsen nasa aner a sang a ta nye aner aYahuda baꞌ. Amma Adakunom rin tonong ye sang mi tu yis aner akak ye a won dar a se zhe̱l ka ye a be narik baꞌ.

²⁹Kamok anong, nizen iya wan tá tom ye mi ru be̱ aze, mi be̱ dar kufe̱ ike̱ng ikak. Won ta ka rip, akye̱ sak wan tá tom ye mi ru be̱ e̱?”

³⁰aKoneliyus fe̱ be wu ye, “Mi se kari ninye aduwa kaye̱e̱r inom inaas i tá gor nitso̱m itaar ife kunom. Aner akak be ares akan ma a gye̱se̱m be̱ a tá nyeseng nasho̱o̱n'i.

³¹A tá fe̱ ye, ‘aKoneliyus, Adakunom n fok aduwa wan ne a yiring be kutobok kuya wan tá tobok áfe rizor.

³²Kamok anong, tom áner akak na aZhopa nong á ta se yis aSiman a tú ku yis ye aBitrus. A se be ritsen numa aSiman a ta nye itomong kuruk akpa. Kasa wu se bubarak be agbang kudung.’

³³Iyong ne mi wor i tom nufuan zizirik. I se gye̱r wan ta be̱. Kamok anong, yir na azena cice̱r yir nasho̱o̱n Adakunom nong ta fok ike̱ng iya Agwo̱m Ágwo̱m tá ka sak tin tak yir.”

³⁴Ayong aBitrus kpaan rife̱ ye, “Kyo̱o̱rna ne mi ra ma ren ye i nye katsak, Adakunom kasa baꞌ.

³⁵A shim koangan a ta se kaye̱e̱r koakye kaben, aya a ta fok inyim wu ne a nye ike̱ng iya i ta se gye̱r.

³⁶Rife̱ Adakunom tá tom áner Isarela'me nye itak kutaas Rife̱ Ritek rife̱ ne kusor kutek kaye̱e̱r aYeso Kiristi Agwo̱m Ágwo̱m yir cice̱r.

³⁷Yin ren yin ike̱re̱ iya a tá nye niben aYahuda cice̱r. Iya a ta san'e na aGalili nama aYohana tá taas ye a ra nye abatisma.

³⁸Adakunom shining aYeso a ta nye afu Nazaret be Kabik Kazhe̱l'e ne kukyem. aYeso tsang a tseng koake̱ ne a tsang a nye ritek ne a tsang a sak áner aya a tá se nubo̱k Ishetan te atser kamok Adakunom se ma be wu.

³⁹“Yir di yir koakye ike̱ng a ta nye ni iwo̱p áner aYahuda ne kaye̱e̱r aUshalima. A tú tigak natoon kakon a tú ku fe̱r.

⁴⁰Adakunom tú dorok nure̱k katuk ife ataar'e a tá sak ánerawe tú di.

⁴¹Sang koangan ne a tú di baꞌ, igak áner afe á tú ku di nye áner aya Adakunom tá tsang a kasa. Áner ayong nye yir áfe i tá ya yir ne i so̱ yir mak be wu nama a tá dorok nure̱k.

⁴²A ti sak yir ta taas yir ánerawe rife̱ Adakunom. A bun a fe̱ ye yir ra ka taas yir ba ye wu ne a nye aya Adakunom tan sak nong a ta to̱ áner aya a ta nye atser be áya a tan kus amok.

⁴³Áner kuzarap cice̱r taas rife̱ natoon wu ye, koangan aya a tin no̱o̱k katsak ni wu a tu ku re̱ng rine̱n kaye̱e̱r riyerek wu.”

⁴⁴aBitrus tá ru fe̱ kanu be ba ne Kabik Kazhe̱l'e ni tiik natoon ánerawe áya a tá fok rife̱'me cice̱r.

⁴⁵Áner aYahuda áya a tá nye áfikuus áya a tá be̱ mak be aBitrus te zhing nizen á tá di Kabik Kazhe̱l'e ti tiik natoon áner aya sang á nye áner aYahuda baꞌ, gip.

⁴⁶Á tá fa fok ba tá fe̱ ni írem iduk ne á tiyiik Adakunom. Iyong aBitrus fe̱ ye,

⁴⁷“Aner na n se̱ Kabik Kazhe̱l'e kyo̱ndi yir tan se̱ yir. Akak kuse a tana roon ku ka nye ba abatisma be ashi a?”

⁴⁸aBitrus fe̱ ye a ru ku nye ba abatisma kaye̱e̱r riyerek aYeso Kiristi. Iyong á fe̱ be aBitrus ye a ra te inom be ba gbak.