Read izere Itomong Ámanzo 12 Bible Online

Itomong Ámanzo 12 - izere bible

Itomong Ámanzo 12

¹Kaye̱e̱r inom iyong ne agwo̱m akak a tú ku yis ye aHiridus yising áfikuus akak nong a tá ka tabak ba.

²aHiridus'e sak a tá fe̱r aYakub aronyining aYohana be kuwe̱n kutsor.

³Wu tá fa di áner aYahuda fok kusas'e iyong a ya kasho̱o̱n a tá yiir aBitrus. (A nye anong nizen a ta se be Riye̱ Rikan Kuya aBiredi dar ayisti.)

⁴Nama a tá yiir aBitrus, yong a tú ku te nitso̱m nong a tá sak ásozha kuso̱k be igataar tú ku fek. aHiridus shim a tú ku tun nong a tu ku to̱ amok nasho̱o̱n ánerawe nama riye̱ rikan aPasova.

⁵Kamok anong aBitrus sor nuwhe̱e̱n nitso̱m. Áfikuus yiir kunye aduwa be Adakunom dide̱ng kamok wu.

⁶Natuk katuk kaya aHiridus tana ku tun nong a tú ku to̱ amok nasho̱o̱n ánerawe, aBitrus se be ida natite ásozha afa. A tú ku rosom be idun atso̱m nabas afa, ásozha afa se nuyeseng nanu kutu'me a ta sen fek'e.

⁷Gbashak amaleka Agwo̱m Ágwo̱m wor a wuruk azong kaye̱e̱r kutu itso̱m ame ne karo̱ te kanang. Amaleka'me ra aBitrus nape̱me̱ng, a tú ku shiming. A fe̱ be wu ye, “Dorok gbashak.” Iyong idun atso̱m ame wuruk cice̱r nibo̱k aBitrus i tá kpas kaben.

⁸Ne amaleka ame fe̱ be wu ye, “Te ares wan be akpatak wan.” aBitrus tá fa nye anong ne amaleka'me fe̱ be wu ye, “Naka kis be kures wan nong tin kuus.”

⁹aBitrus tú ku kuus á tá wuruk nutu itso̱m'e. A ra ren ye ike̱ng iya amaleka tá nye'ong nye katsak baꞌ, wu di ye ike̱ng'e nye nabos.

¹⁰A gor á tú ku te rigwo̱m ásozha rife̱ ime̱se̱ng'e ne a gor a ku te rife̱ afa'me. Á ma be̱ nanu kutu a tá nye be atso̱m á tanin wuruk a ta no̱ kaye̱e̱r kuwo̱p. Kanukutu'me karak be rice wu ne ba gor á tá wuruk. Á tá fa tseng kasho̱o̱n gak, ne amaleka ame wor a ti zhau ne a won aBitrus azong.

¹¹Azong ne aBitrus ra ma te kparak makong a tá fe̱ ye, “Ma kyo̱o̱rna ne mi ra ma ren ye Agwo̱m Ágwo̱m ne a tom amaleka wu katsak'e nong a tin shesh nubo̱k aHiridus be áner aYahuda kaye̱e̱r ike̱ng iya ba tá tse̱r á tin nye'me.”

¹²aBitrus tá fa di anong ne a tseng numa aMarya a tá nye anyining aYohana a tá bun a tú ku yis ye aMarkus. Ánerawe tsang a nyim whe̱re̱ azong a ta se be kunye aduwa.

¹³aBitrus tá fa rus kanukutu kafe kufang yong kanamang kakak ka tá nye asam riyerek wu ta nye aRoda be̱ ka shim.

¹⁴A tá fa fok kuto̱ aBitrus a ren riye̱ kare̱p dide̱ng. Ayong a tú ku bun be itsi dar kukarak kanukutu'me a tá se fe̱ ye, “aBitrus ne a se nanukutu.”

¹⁵Ayong ánerawe'me fe̱ be wu ye, “Wan tse̱r ta ririm a?” Kanamang'e yiir'e karkar ye aner'e nye aBitrus. Ayong ba fe̱ ye, “Aner'e ta nye amaleka wu gak ayi.”

¹⁶Amma aBitrus yiir kutsor kanukutu'me. Nizen iya ba tá fa karak a tú di ne á te zhing.

¹⁷aBitrus ma nye be kubo̱k ye a ra te gbik, nong a tú ku taas ba kuri iren iya Agwo̱m Ágwo̱m tú ku tun nitso̱m'me. A fe̱ ye, “Tseng se tak yin aYakub be ribir áro̱ afikuus.” Ayong a dorok a tá tseng naro̱ kakak.

¹⁸Kadiding tá fa karak, ne ásozha ame no̱ kaye̱e̱r kudaam makiyi ma á naka risim ye, “aBitrus n no̱ ake̱ e̱?”

¹⁹Nama aHiridus tá sak a tú ku tse̱r a tú se̱ baꞌ, yong á sak a tú ku risim ba ne a ku fe̱s ba. aHiridus dorok na aYahudiya nong a tá tseng na aKaisariya a se te inom ifa azong.

²⁰Nizen iyong, aHiridus be riye̱ riwe be áner aTaya ne áfe aSidon. Ayong áner aTaya be áfe aSidon'me tseng mak nong á ta se tse̱r igaas nufe aHiridus nama ba tan gorok nu aBilatus a tá nye akak kaye̱e̱r áfe kunye itomong kaye̱e̱r kasa aHiridus. Áner aTaya be áfe aSidon'e tse̱r igaas kamok naya kuya ba tá nes niben aHiridus tin nye rigwo̱m.

²¹Iyong á ti sak kunom. Katuk'e yong aHiridus te ares rigwo̱m wu a tá sonong ni itsik rigwo̱m wu a tá fe̱ kanu be ánerawe cice̱r.

²²Ayong ánerawe'me ta kuto̱ naza a tá fe̱ ye, “Kuto̱ na nye kufe adakunom akak sang kufe anerawe baꞌ.”

²³Zizirik amaleka Agwo̱m Ágwo̱m sak kuro̱k tú ku yiir aHiridus kamok a tá shim ánerawe tú ku tiyiik ne á nar Adakunom.

²⁴Amma rife̱ Adakunom tibarang kuno̱ kaye̱e̱r ánerawe ne áfikuus nibarang kute whe̱re̱.

²⁵Nizen aBarnabas be Ashawulu tá gang itomong ba na Antakiya, ayong á tú bun na aUshalima mak be aYohana aya a tú ku yis ye aMarkus.