Read izere Itomong Ámanzo 13 Bible Online

Itomong Ámanzo 13 - izere bible

Itomong Ámanzo 13

¹Áner kuzarap ákak ne áner kubo̱so̱p tuse kaye̱e̱r áfikuus Antakiya. Ákak kaye̱e̱r ba nye aBarnabas be aSiman aya a tú ku yis ye kukpa kuwe ne aLushiyos a tá nye aner aKurane'me be aManayen (aya a tá ta mak be aHiridus) ne Ashawulu.

²Nizen ba tá sen ya Adakunom iben ne á nye azumi yong Kabik Kazhe̱l'e fe̱ be ba ye, “Ni sak yin aBarnabas be Ashawulu nukim nong ase̱ á tin nye itomong iya mi tan sak ye ba tin nye'me.”

³To̱, nama á tá nye azumi be aduwa, yong á ti saas ibo̱k ritek natoon ace aBarnabas be Ashawulu nong á tá ma ku te ba niren.

⁴Kabik Kazhe̱l'e tom aBarnabas be Ashawulu yong á tseng na aSalukiya a tá se no̱ nukpara ashi a tá be na aSipurus.

⁵Á tá fa se no̱ na aSalamis, yong á kpaan kutaas rife̱ Adakunom na ahiir kutu kuya Adakunom iben kuya áner aYahuda tin no̱o̱s. aYohana ta se̱ ba ninye itomong'e.

⁶Á tsang á tseng koake̱ nuwo̱p'e ma á no̱ na aPafos. Azong ne á nyim be aner aYahuda'me akak a tu ku yis ye aBar-Zhoshuwa. A tsang a nye ike̱re̱ azhing ne a bo̱s abo̱o̱s ye wu nye aner kuzarap Adakunom.

⁷A nye itomong nubo̱k agwo̱m kuwo̱p'e a tu ku yis ye aSozhiyus aBulus afe a ta nye aner a ta ren ike̱ng dide̱ng. Agwo̱m'me tom ye a ru ku yis aBarnabas ne Ashawulu kamok a shim a ta sok rife̱ Adakunom.

⁸Amma aLimas a tá nye aner a ta nye ike̱re̱ azhing (aLimas'ong nye aner a ta nye ike̱re̱ azhing nirem aner aHeleni) fe̱ nyinye̱m be kube̱ aBarnabas ne Ashawulu. A tse̱r a tá roon agwo̱m'me ku nino̱o̱k katsak rife̱ aYeso.

⁹Amma Ashawulu (aya a ta bun a tú ku yis ye aBulus) a tá mu ku shining be Kabik Kazhe̱l'e, a ti sak anyisi ni wu a tá fe̱ ye,

¹⁰“Wan nye igon Ishetan, wan shim ike̱ng iya i ta nye itek nigaan'e baꞌ. Wan mak i shim kuwo̱ro̱k ánerawe nong ta ka mo̱o̱r ba. Wan ta won kuburuk katsak rife̱ Adakunom aꞌa?

¹¹Wan n no̱ nubo̱k Adakunom kyo̱o̱rna. Wan ta te akpato̱o̱n'e ta ba di karo̱ baꞌ ma nizen ikak.” Ne aLimas wor a di kyo̱ndi kune̱n tu ku kis ma karo̱ te whi. Iyong a kpaan kukap ibo̱k kyo̱ndi akpato̱o̱n a tsang a tse̱r aner aya a tana ku ko̱k kubo̱k.

¹²Nizen iya agwo̱mna ame tá fa di ike̱ng iya i ta se̱ aLimas ne a ni no̱o̱k katsak natoon rife̱ Adakunom, kamok wu fok azhing be kubo̱so̱p wu tá fok natoon rife̱ Agwo̱m Ágwo̱m.

¹³Ayong aBulus be mak be áfudang kutseng wu dorok na aPafos nong a tá no̱ nagbang kukpara ashi ne á tseng na aPerga a ta se niben aPamfiliya. aYohana aMarkus tá won ba azong a tú ku bun na aUshalima.

¹⁴Ba wesek kasho̱o̱n a tá tseng na Antakiya niben aBisidiya. Katuk Asabar á se no̱ nutu aduwa á tá sosok kaye̱e̱r'e.

¹⁵Nama á tá fa afumung Itsi aMusa be áfe áner kuzarap tá zibir, ne áko̱k kasho̱o̱n kutu aduwa tom ye a ra fe̱ be ba ye, “Ároneng, ke yin be yin rife̱ riya ri tanin barang ánerawe agap ne i fe̱ yin kusuk tsek.”

¹⁶Ayong aBulus nyeseng a tá sok kubo̱k naza ye, ánerawe ra te gbik. Iyong a fe̱ be ba ye, “Áner Isarela be yin áya i ta nye yin áner Isarela baꞌ, áya i ta ya fok yin inyim Adakunom, wesek yin kuto nong tá fok yin.

¹⁷Adakunom afe áner Isarela kasa átukop yir a ta sak ba ta fuus nizen iya ba tá nye ásam niben aMasar. Adakunom tú tun ba na aMasar be kukyem wu.

¹⁸A ti sak riye̱ natoon ba nizen á ta se kaye̱e̱r katse ma á te aye̱ iso̱k inaas.

¹⁹A sak ba ya áner iben aKenan kanataar nitsom. A sok kaben ba a tá no̱o̱k ánerawe wu ánerawe Isarela nong a ta ya kutse'me.

²⁰A nye ike̱re̱ na cei kaye̱e̱r aye̱ a tana bubarak aye̱ inyak iso̱k inaas be iso̱k itoon (450). “Nama anong, Adakunom tá no̱o̱k ba áner a tana ku to̱ ba amok ma nizen aSamela ta nye kuzarap.

²¹Nizen áner Isarela tá tse̱r ye a ra ka te na agwo̱m, aSamela tu no̱o̱k ba Ashawulu a ta nye aro̱m aKish a ta nye aner izo̱ro̱k aBanyami. A nye rigwo̱m ma aye̱ iso̱k inaas.

²²Nama Adakunom tá sak Ashawulu won rigwo̱m'e ne a sak aDauda ye, ‘Mi n se̱ aDauda a ta nye aro̱m aZhese, aner afe mi ta shim kaye̱e̱r riye̱ mi. A ta nye koakye kuri ike̱ng ife mi ta shim ke wu nye.’

²³“Kaye̱e̱r kuri aDauda ne Adakunom tun aYeso a tá nye aner kashesh Isarela kyo̱ndi wu ta tsang a fe̱.

²⁴aYeso kpaan itomong wu nama aYohana tá tsang a nye ánerawe awazi rife̱ ye a ra shishing kuse ba nong a ta ka nye ba abatisma.

²⁵Nizen iya aYohana tá be̱ barak a tá gang itomong wu yong a fe̱ ye, ‘Yin di yin ye mi nye angan e̱? Sang mi ne i nye aner aya yin ta sen tor yin'e baꞌ. Aner ayong saase nama mi. Mi kyem ta bisik idun akpatak wu gum baꞌ.’

²⁶“Ároneng, inoon atukop yir Ibrahim be yin áner i ta nye yin áner Isarela baꞌ, áya i ta fok yin inyim Adakunom, kutom itak kashesh kuya Adakunom ta tom na'me nye kufe yir cice̱r.

²⁷Áner aUshalima be ágwo̱m ba cice̱r ren ye aYeso ne a nye aner kashesh ba. Gip be anong, nizen iya a tú ku fe̱r, á shining rife̱ aner kuzarap riya a ta fa koakye Asabar.

²⁸Á kyem a tu se̱ be rine̱n riya ri ta kyem a tana ku fe̱r baꞌ gye̱rtatan, gip be anong á fe̱ be aBilatus ye a ru ku fe̱r.

²⁹Nama á tú ku nye ike̱re̱ iya a tá tsang a zibir natoon wu peer ne a ku tiik nukon kuya a tú ku tigak mo á tú ku mees nure̱k.

³⁰Amma Adakunom tú ku dorok nure̱k'e.

³¹A yiir tosong rice wu nufe áner aya a tá tsang a tseng mak be wu na aGalili ma na aUshalima. Ba ne á nye áner aya a tana taas ánerawe yir katsak'e natoon wu.

³²“Yir sen ka taas yin Rife̱ Ritek na natoon ike̱ng iya Adakunom tá fe̱ ye wu ta nye atukop yir'e.

³³A min nye yir'e nabon ba kamok a dorok aYeso nure̱k. Kyo̱ndi i ta se ni izibir kaye̱e̱r kufumung aZabura afe afa ye, “ ‘Wan nye Igon'i, katuur mi sor Ada wan.’

³⁴“Adakunom tú dorok nure̱k a ta ba bun a ku nigaan'e baꞌ. Kyo̱ndi i ta se nuzibir ye, “ ‘Mi ta ka no̱o̱k yin ritek riya mi ta fe̱ ye mi ta no̱o̱k aDauda.’

³⁵“Kyo̱ndi a tan zibir ye, ‘Wan tà won asam wan azhe̱l'e nong a ta bus baꞌ.’

³⁶“Nizen iya aDauda ta nye itomong Adakunom ta shim, a ta fa ku ne a ku ne̱r naro̱ a ta ne̱se̱k átukop wu, kuro̱m wu bus.

³⁷Amma aYeso aya Adakunom tú ku dorok kaye̱e̱r kure̱k, kuro̱m wu bus baꞌ.

³⁸“Kamok anong ároneng, mi shim ke yin ren yin ye ike̱ng iya aYeso ta nye ne i sak a ta taas yin itak kure̱ng rine̱n.

³⁹Mi shim ke yin ren yin ye kamok wu ne koangan azining afe a tin no̱o̱k katsak ni wu ta se̱ kashesh kaya Itsi aMusa ta kyem i no̱o̱k baꞌ.

⁴⁰Sak yin riye̱ fan ike̱ng iya áner kuzarap tan fe̱ bu ni shining natoon yin.

⁴¹“ ‘Wesek yin ato, yin áfe kuzhe̱e̱sh karo̱. Ze̱e̱m yin ace yin amma tà kus yin. Kamok mi tà nye ike̱ng ikak nizen yin iya yin tanin no̱o̱k yin katsak baꞌ ko a fa fe̱ ye akak ta tak yin.’ ”

⁴²Nizen iya aBulus be aBarnabas ta sen wuruk kaye̱e̱r'e kutu aduwa áner aYahuda yong ánerawe fe̱ be ba ye á ra bun á be̱ á tá ya kasho̱o̱n be rife̱ natoon ike̱re̱ iya ba tan fe̱ kanu natoon'e katuk Asabar afe kasho̱o̱n.

⁴³Ánerawe ta fa naka kaas, yong áner aYahuda be áya a ta nye áner aYahuda baꞌ, áya a tá won kukuus igo̱o̱n ba á te áner aYahuda kuus aBulus be aBarnabas. Iyong aBulus be aBarnabas'e fe̱ be ba ye a ru ya kasho̱o̱n kaye̱e̱r ritek Adakunom.

⁴⁴Katuk Asabar afe kasho̱o̱n'e, ánerawe á ta sor kaye̱e̱r kuwo̱p'e cice̱r nyim nong á tá fok rife̱ Adakunom.

⁴⁵Amma áner aYahuda tá fa di rigwo̱m ánerawe ta nyim, yong a kpaan rishishim dide̱ng ne á fe̱ rimaan'e natoon ike̱ng iya aBulus ta sen fe̱'me.

⁴⁶Iyong aBulus be aBarnabas fe̱ be ba be riye̱ rizining ye, “Gye̱r ke yir san ku ka taas yin rife̱ Adakunom nizham. Kum yin ta gaar yin i ta tonong yin kaye̱e̱r kuse yin ye yin raar yin tana se̱ yin kutser kufe izen izen, iyong ne i sak ta ka won yin i ta kirik nufe áner aya a ta nye áner aYahuda baꞌ.

⁴⁷Kamok Agwo̱m Ágwo̱m fe̱ be yir be agbang kuto̱ ye, “ ‘Mi ma ka sak ta sor aya a tana tonong áner aya a ta nye áner aYahuda baꞌ akanang. Wan ta tseng be kashesh ma nigang kazatse.’ ”

⁴⁸Áner áya a ta nye áner aYahuda baꞌ ta fa fok anong ne aye̱ ba kare̱p ne á tiyiik rife̱ Adakunom. Áner áya Adakunom ta tsang a kasa nong á ta se̱ kutser kufe izen izen ti no̱o̱k katsak.

⁴⁹Rife̱ Adakunom ti barang kuno̱ koake̱ kaye̱e̱r kaben cice̱r.

⁵⁰Amma áner aYahuda tees ányining akak a tá nye áritek'e aya a tá fok inyim Adakunom ne aritek kuwo̱p'e. Á no̱o̱k aBulus ne aBarnabas risam dide̱ng ne á ku ro ba nuwo̱p'e.

⁵¹Iyong ámanzo ame waar ares ba nong i ta sor asheda natoon ba nong a tá tseng na Ikoniya.

⁵²Áfikuus Antakiya nye riyre̱p dide̱ng ne a ka shining ba be Kabik Kazhe̱l'e.