Read izere Itomong Ámanzo 14 Bible Online

Itomong Ámanzo 14 - izere bible

Itomong Ámanzo 14

¹To̱, nizen iya aBulus be aBarnabas ta se na Ikoniya, a se no̱ kaye̱e̱r kutu aduwa áner aYahuda kyo̱ndi á tan me̱ ne á nye. Iyong a taas rife̱ Adakunom azong be katsak ma ánerawe whe̱re̱ á tá nye áner aYahuda be áya a ta nye áner aYahuda baꞌ ti no̱o̱k katsak na aYeso.

²Áner aYahuda áya a ta gaar ku nino̱o̱k katsak tees áner aya a ta nye áner aYahuda ma a ta sak ba di áfikuus kye̱re̱.

³aBulus be aBarnabas ta inom gaan azong ne a taas rife̱ Adakunom be riye̱ rizining. Adakunom tonong ye itak ritek wu nye katsak kamok a ta no̱o̱k ba kukyem a tin nye ike̱re̱ azhing be ife kukyem.

⁴Aner kuwo̱p'e naka kabak abas afa, akak kuus kama áner aYahuda ne ákak kuus kama ámanzo.

⁵Áner aYahuda be áner aya ta nye áner aYahuda baꞌ, ne áko̱k kasho̱o̱n ba ti sak kyo̱o̱n ye a ta nye kye̱re̱ be ámanzo ne á ku barak ba be ata.

⁶Ámanzo fok itak'e yong á teng a be na aListira ne aDarbe á ta nye íwo̱p aLikoniya be kaben ka ta se nukim.

⁷Á se ya kasho̱o̱n be kutaas rife̱ Adakunom azong.

⁸Aner akak tuse na aListira aya a tú ku tes akun'e, a kun kyem a tseng be atak wu nigaan'e baꞌ.

⁹A sonong a tá foos ike̱ng iya aBulus tá fe̱. aBulus ti sak anyisi ni wu yong a di aner ame tá min no̱o̱k katsak ye wu tà te atser.

¹⁰Iyong a fe̱ be wu ye, “Dorok nong ta nyeseng be atak wan.” Azong ne aner ame wor a furuk a ta kpaan kutseng.

¹¹Ánerawe ta fa di ike̱ng iya aBulus ta nye ne a ta kuto̱ naza a ta fe̱ nirem áner aLikoniya ye, “Ádakunom m be̱ aze nufe yir kaye̱e̱r kuro̱m anerawe.”

¹²Iyong á ti te riyerek na aBarnabas ye aZeyus ne á ni te riyerek na aBulus ye aHames kamok a fe̱ kanu ne a nar.

¹³Karo̱ atsi aZeyus tu ku nye itsi se nama kuwo̱p'e. Atsi'me be ribir ánerawe be̱e̱n amung ne afure nagbang kanukutu kuwo̱p'e. Á shim ke á ninye aBulus be aBarnabas asidaka.

¹⁴Nizen aBulus be aBarnabas tá fok anong ne á sarak ares a ta se niro̱m ba nong á ta dorok be itsi á ta se se̱ rigwo̱m ánerawe'me. Iyong a ta kuto̱ naza á ta fe̱ ye,

¹⁵“Aro̱, akye̱ sak yin ta nye yin ana e̱? Yir gip yir nye yir ánerawe kyo̱ndi yin tsek. Yir ma ka be̱e̱n yin Rife̱ Ritek ye yin ru won yin kunye akpe̱de̱ng ike̱re̱ na nong tu ku bun yin nufe Adakunom afe kutser aya a ta nye kaza be kaben ne isho̱ng be ike̱re̱ iya i ta se kaye̱e̱r'e peer.

¹⁶Gbugbang, Adakunom won ánerawe ta kuus igo̱o̱n ba tsek.

¹⁷Gip be anong, Adakunom tonong katsak natoon rice wu kaye̱e̱r ike̱re̱ itek iya wu ta nye. A ta nyesek yin iza kaye̱e̱r kuse kutek wu ne a sak naya te nishamang. A ta nyesek yin naya kuya ne a sak aye̱ yin ta kare̱p.”

¹⁸Gip be anong rife̱ riya ámanzo tá fe̱, a can be ánerawe nizham á ta ra ka roon ba ku ka nye ba asidaka.

¹⁹Iyong áner aYahuda ákak áya a tá ne na Antakiya ne Ikoniya be̱ á ta whap ánerawe ma á barak aBulus be ata. Á tú ko̱k á tú ku tun nuwo̱p'e, ba sor ye an ku.

²⁰Nizen áfikuus tá nyim á tu ku gorok, yong a dorok a tu ku bun kaye̱e̱r kuwo̱p'e. Nayatson'e, aBulus be aBarnabas dorok a ta tseng na aDarbe.

²¹aBulus ne aBarnabas taas rife̱ Adakunom na aDarbe ma ánerawe whe̱re̱ te áfikuus. Iyong á tú ku bun ba na aListira ne Ikoniya,

²²ne á tsang á tsesek áfikuus ne a ku nyesek ba itabak ye á ra yiir rife̱ riya ba ta min no̱o̱k katsak be agap. Ne á fe̱ ye “Ma be risam dide̱ng nizham yir tà ra no̱ yir kaye̱e̱r rigwo̱m Adakunom.”

²³aBulus be aBarnabas tú kasa ba áko̱k kasho̱o̱n ikilisiya be kunye aduwa ne azumi ne á ku won ba nubo̱k Agwo̱m Ágwo̱m aya ba tin no̱o̱k katsak.

²⁴Nama á tá gor niben áner aPisidiya ne á be niben aPamfiliya.

²⁵Á taas rife̱ Adakunom na aPerga ne á tseng na Italiya.

²⁶Azong ne á se no̱ nukpara ashi nong á tu ku bun na Antakiya, nuwo̱p kuya a tú ku nye ba aduwa ni ime̱se̱ng'e nong ase̱ ritek Adakunom ta se mak be ba kaye̱e̱r itomong ba tá gang kyo̱o̱rna.

²⁷Á tá fa se no̱ na Antakiya'me ne á tusung áfikuus á ta ka taas ba ike̱re̱ iya Adakunom tan nye nubo̱k ba. Á tá taas ba kuri iren iya Adakunom tá karak nong ase̱ áner aya a tá nye áner aYahuda baꞌ tin no̱o̱k katsak.

²⁸aBulus be aBarnabas te inom gaan azong be áfikuus'e.