Read izere Itomong Ámanzo 17 Bible Online

Itomong Ámanzo 17 - izere bible

Itomong Ámanzo 17

¹Nizen iya aBulus be aSila tá gor na Amfipolis be Apoloniya ne á tseng na aTasalonika, naro̱ kaya kutu aduwa áner aYahuda tuse.

²Ayong aBulus tseng a tá se no̱ kyo̱ndi a tan me̱ ne a nye, Asabar ataar kum a tá yiir i ya nanan be ba kaye̱e̱r afumung rife̱ Adakunom.

³A yiir i ka tosok ba kanang ye, aKiristi so̱ risam, a bun a dorok nure̱k. A bun a fe̱ be ba ye, “aYeso na mi ta sen ka taas yin itak wu na, wu ne a nye aKiristi'me.”

⁴Iyong áner aYahuda ákak ne áner aHeleni akak afe a tá fok inyim Adakunom ne ányining akak whe̱re̱ aya a tá nye áritek'e, cice̱r ti no̱o̱k katsak rife̱ aBulus be aSila'me, ne á gun rice mak be ba.

⁵Amma áner aYahuda'me ákak tú shishim ba. Iyong á se tse̱r inoon kuwun ninaro̱ rizhik nong a tá nye rigwo̱m ne á kpaan kuren kaye̱e̱r kuwo̱p'e. Á dorok gbashak a tá tseng numa aZhason ni itse̱r aBulus be aSila nong ase̱ a tu ku tun ba a ta no̱o̱k rigwo̱m ánerawe nufang.

⁶Amma a tá fa ku se̱ ba azong baꞌ, ne á yising aZhason be áfikuus akak. Á tá ka ko̱k ba a tá tseng be ba nufe ágwo̱m kuwo̱p'e ne á tasak ye, “Áner aya a ta tsang á zho̱ro̱p kazatse na koake̱ be kuren an be̱ aze kyo̱o̱rna,

⁷ma aZhason ma ka shan ba kari wu. Á gaar kukuus itsi aKaisar ta no̱o̱k ye agwo̱m akak kuse ze̱e̱r a tu ku yis ye aYeso.”

⁸Nizen iya ágwo̱m kuwo̱p'e be ribir ánerawe'me tá fok anong ne á korok ikun.

⁹A sak ma aZhason be ribir áfudang wu karang itso̱m whe̱re̱ nizham a tá ra ku won ba á tá tseng.

¹⁰Kum karo̱ tá fa te katuk ne áfikuus te aBulus be aSila niren nong a tá be na aBiriya. Á tá fa se no̱ azong tsek ne á tseng nutu aduwa áner aYahuda.

¹¹To̱, áner aYahuda á tá se na aBiriya be kuse kutek ne á nar aya a tá se na aTasalonika, kamok á shan Rife̱ Ritek'e be ifeng dide̱ng. Á ti sak riye̱ á tá fa kufumung rife̱ ye̱r ye̱r ne á maas á tá di ka ike̱ng iya aBulus tá fe̱ nye katsak'e.

¹²Kamok anong, áner aYahuda whe̱re̱ ti no̱o̱k katsak. Anong ne anyafe aHeleni'me ákak whe̱re̱ aya a tá nye aritek'e be áner aHeleni'me akak whe̱re̱ ti no̱o̱k katsak gip.

¹³Nizen áner aYahuda aya á tá se na aTasalonika tá fa fok ye aBulus sen nye awazi Rife̱ Ritek na aBiriya, yong á tseng azong gip, nong á tá se whap ánerawe a tá kpaan kuren.

¹⁴Gbashak áfikuus ákak wor a dorok be aBulus'e á ta se ku sak nukim agbang kudung, amma aSila be aTimoti tú ku fan na aBiriya'me.

¹⁵Áner aya a tase tsaa aBulus tseng be wu na Atina. Iyong aBulus tú ku tom ba nufe aSila be aTimoti ye á ra wor a ku kuus na Atina.

¹⁶Izen iya aBulus tá se be kutor kube̱ aSila be aTimoti na Atina, a di ike̱re̱ itsi tá kun shining koake̱ kaye̱e̱r kuwo̱p'e ma ike̱ng'e tú ku daam dide̱ng.

¹⁷Kamok anong a yiir ya nanan kaye̱e̱r atu aduwa be áner aYahuda ne áner aHeleni aya a tá fok inyim Adakunom. Koakye kunom ne aBulus'e ya nanan be áya wu tá se̱ naro̱ rizhik.

¹⁸Anong ne áner Abikuriya ákak ne áfe aSitoyik'e akak aya a tá ren ike̱ng dide̱ng nyim nong á tá ya nanan be wu. Ákak ba fe̱ ye, “Akye̱ ne agwo̱m riwo̱ng na shim a tá fe̱ e̱?” Ákak bun á fe̱ ye, “A shim ke ánerawe kuus itsi iduk gak ayi.” Á fe̱ anong kamok ba tá fok aBulus ta fe̱ rife̱ natoon aYeso ne itak kudorok ikom nure̱k.

¹⁹Iyong a sok aBulus á tá tseng be wu naro̱ kusonong ba na Arasa. Á fe̱ be wu ye, “Yir shim ta ren yir ike̱ng ifas wan ta bo̱so̱p ánerawe'me na nye akye̱ e̱?

²⁰Ike̱re̱ ikak wan ta bo̱so̱p sor ike̱ng ifas nufe yir. Yir shim ta ren yir, ike̱re̱ wan tan fe̱ na nye akye̱ dim e̱?”

²¹(Ánerawe Atina cice̱r be átsen áya a tá sor azong sok izen ba dide̱ng ni ifos itak ike̱re̱'me.)

²²Iyong aBulus dorok a tá nyeseng nasho̱o̱n ba naro̱ kusonong'e na Arasa a tá fe̱ ye, “Áner Atina, mi di ye yin ren kuus yin itsi be katsak.

²³Kamok nizen iya mi tá tseng i gorok kaye̱e̱r kaben'e. Mi di abagadi akak a ta min zibir ye: KAMOK ADAKUNOM AYA SANG A TU KU REN BAꞋ. To̱, wu aya yin tu ku ya yin iben amma sang yin ra ku ren yin baꞌ, wu ne mi shim ta ka tak yin.

²⁴“Adakunom aya a tá nye kazatse be ike̱re̱ iya i ta se kaye̱e̱r'e cei, wu aya a ta nye Agwo̱m Ágwo̱m kaza be kaben sor ninaro̱ na ya ánerawe ne a tá no̱k be ibo̱k ba baꞌ.

²⁵Sang a tse̱r kutobok nufe anerawe baꞌ. A tse̱r ike̱ng ikak nufe anyin baꞌ kamok wu ne a no̱o̱k koangan kutser be isong ne koakye ike̱ng ánerawe ta tse̱r.

²⁶Wu ne a sok aner azining nong a tin nye ánerawe ze̱r ze̱r, nong á ta sor ba ninaro̱ ze̱r ze̱r kaye̱e̱r kazatse na. Kum ne an nye anerawe baꞌ, wu sak izen be karo̱ kaya koangan tanin sor.

²⁷Adakunom nye anong nong ase̱ anerawe tù ku tse̱r kashim ne a ku se̱. A se gugo̱k be akak kaye̱e̱r yir baꞌ, gye̱rtatan.

²⁸‘Kamok kaye̱e̱r wu ne yir ti sor yir ne i kyem i tseng yir ne i sor yir be kutser.’ Kyo̱ndi áfe abom yin ákak tá fe̱, ‘Yir nye yir inoon wu.’

²⁹“Kamok anong, kum yir ta nye yir inoon Adakunom, sang yir tu di yir ye wu se kyo̱ndi ike̱ng iya anerawe be izinariya ka azurfa ka ata, be ritseng wu baꞌ.

³⁰Gbugbang, Adakunom ti daam be ike̱ng iya ánerawe tá nye kaye̱e̱r kudun kuren baꞌ. Kyo̱o̱rna, Adakunom fe̱ be ánerawe koake̱ ye a ra shishing kuse ba.

³¹Kamok Adakunom'me n sak kunom kuya a tana be̱ nong a tà to̱ kazatse amok kaye̱e̱r katsak. A tonong koangan anerawe ye iyong nye katsak kamok a tú dorok nure̱k.”

³²Nizen iya ba tá fok aBulus tá fe̱ itak kudorok ikom nure̱k, yong á tú ku mas. Ákak fe̱ ye, “Yir shim tin barang yir kufok itak na gbak.”

³³Ba tá fa fe̱ anong ne aBulus dorok a tú ku won ba naro̱ kusonong'e.

³⁴Akak cie̱k kaye̱e̱r ba kuus rife̱ aBulus ne á ni no̱o̱k katsak. Kaye̱e̱r ba akak nye aDiyonisiyus aya a tá nye akak kaye̱e̱r afe kusonong Arasa'me be abining akak riyerek wu tá nye aDamaris ne ákak ba gip.