Read izere Itomong Ámanzo 18 Bible Online

Itomong Ámanzo 18 - izere bible

Itomong Ámanzo 18

¹Nama anong aBulus dorok na Atina nong a tá tseng na aKoranti.

²Azong a se se̱ aner aYahuda'me akak riyerek wu tá nye Akila, a nye aner aPontus. A ne nuwo̱p Italiya a tá be̱ be abining wu aBiriskila kaye̱e̱r inom'e yong kamok agwo̱m aKalaudiyus sak áner aYahuda ye á ra dorok cice̱r ba á ta won kaben aRom. Iyong aBulus tseng a tú ku di ba.

³Itomong ba tá nye kunye abur, kuri kuzining be aBulus, yong aBulus sor mak be ba. Ne á ya kasho̱o̱n be kunye itomong mak.

⁴Koakye kunom Asabar aBulus no̱ kaye̱e̱r atu aduwa ba nong a tá ya nanan be ba. A shim tá ko̱ro̱k kuto̱ro̱ng áner aYahuda be áner aHeleni.

⁵Nizen iya aSila be aTimoti ta ne na aMakidoniya, á be̱ se aBulus n no̱o̱k rice wu cice̱r ni inye áner aYahuda awazi Rife̱ Ritek, ne a tonong kanang ye aYeso ne a nye aKiristi'me.

⁶Amma nizen iya áner aYahuda tá gaar rife̱ aBulus ma á kpaan ku kukas. Kamok anong aBulus waar ares wu, a tá fe̱ be ba ye, “Rine̱n yin se rice yin. Mi be rine̱n akak rice mi ba'. Igang'e be katuur mi ba sen tseng nufe áya a ta nye áner aYahuda baꞌ.”

⁷Iyong aBulus dorok nutu aduwa'e nong a tá be nasa aner akak a tú ku yis ye aTitiyus Zhustus, a tá fok inyim Adakunom, kasa wu se bubarak be kutu aduwa dide̱ng.

⁸Iyong aKiripus a tá nye ako̱k kasho̱o̱n kutu aduwa'me be áfekari wu cice̱r ti no̱o̱k katsak na aYeso Kiristi. Anong ne áner aKoranti whe̱re̱ aya a tá fok rife̱ aBulus ti no̱o̱k katsak gip, yong a tú ku nye ba abatisma.

⁹Katuk kakak, Adakunom fe̱ be aBulus natuk kaye̱e̱r nabos ye, “Sang tu fok inyim baꞌ, ya kasho̱o̱n be kunye awazi Rife̱ Ritek, sang tu te gbik baꞌ.

¹⁰Kamok mi se mak be wan. Akak sen ka kpa a ta ka man baꞌ, kamok ánerawe whe̱re̱ kaye̱e̱r kuwo̱p na nye anaan.”

¹¹Iyong aBulus te riye̱ rizining be ribir azong ne a ka bo̱so̱p ba rife̱ Adakunom.

¹²Amma nizen iya aGaliyo tá te agwo̱m Akaya, áner aYahuda nyim kanu á ta se kpa aBulus. A tú ku yiir a tá tseng be wu naro̱ kuto̱ amok.

¹³Á fe̱ ye, “Aner na tse̱r a ta kirik aye̱ áner yir nong á ta ya Adakunom iben niren iya Itsi yir ta roon'e.”

¹⁴Nizen iya aBulus tá tse̱r a tá fe̱ kanu ne aGaliyo fe̱ be áner aYahuda ye, “A fa fe̱ ye yin áner aYahuda sen nife̱ yin natoon ike̱ng ikak imaan'e ka agbang rine̱n ayi, ke mi ka fok yin.

¹⁵Amma kum ike̱ng'e tá nye itak rife̱ be ayerek itsi yin, se gang yin'e awan yin. Mi ta ka to̱ yin amok natoon ike̱re̱ kuri iyu baꞌ.”

¹⁶Iyong a tú ku tun ba kaye̱e̱r kutu amok'e.

¹⁷Á yir aSastanu ako̱k kasho̱o̱n kutu aduwa nong a tú ku tsor nasho̱o̱n karo̱ amok'e. Amma aGaliyo ti daam baꞌ.

¹⁸aBulus te inom gaan na aKoranti. A dorok a tá won áfikuus a ta se no̱ nukpara ashi a tá tseng na aSuriya mak be aBiriskila ne amitek wu Akila. A tseng a kor rice wu [7] na aKankiriya nizham a tá ra se no̱ nukpara ashi'me kamok kushu afe wu tsang a ya.

¹⁹Á tá fa se no̱ na Afisa ne aBulus won aBiriskila be Akila azong. A se no̱ nutu aduwa nong a tá ya nanan be ba.

²⁰Iyong á tú ku nye izong ye a rin barang kute inom gak be ba, amma a rawu.

²¹Amma nizen iya a tana ku won ba, a fe̱ ye “Mi ta bun i be̱ ke Adakunom shim.” Ne a dorok nong a tá se no̱ nukpara ashi a ta won Afisa'me.

²²Nizen iya a ta se no̱ na aKaisariya, ayong a ngarak a tá se nye áfikuus ashou nong a tá ma tseng na Antakiya.

²³A tá fa te inom cie̱k ne a dorok na Antakiya ame. A tsang a tseng koake̱ niben aGalati ne aFirizhiya ne a tsang a tsesek áfikuus cice̱r.

²⁴To̱, aner aYahuda'me akak riyerek wu tá nye Apolos, a nye aner kuwo̱p Alekzandiriya, a be̱ na Afisa. A ren rife̱ dide̱ng, a ren ike̱re̱ iya i ta se kaye̱e̱r afumung rife̱ Adakunom dide̱ng.

²⁵A tú bo̱so̱p iren Agwo̱m Ágwo̱m dide̱ng, a taas itak aYeso be ifeng ne a bo̱so̱p katsak natoon aYeso. Amma a ren itak abatisma aYohana cie̱k tsek.

²⁶Ayong a kpaan ku nye awazi Rife̱ Ritek dar inyim kaye̱e̱r kutu aduwa. Nizen iya aBiriskila be Akila tú ku fok, ne á ku yis á ta tseng be wu kari ba nong á tin barang ku kutonong katsak iren Adakunom gye̱r gye̱r.

²⁷Nizen Apolos ta tse̱r a ta tseng na Akaya yong áfikuus tú ku tsesek ne á zibir kufumung a tana se no̱o̱k áfikuus nikum a tú ku shan ibo̱k ifa. A tá fa se no̱ na Akaya ne a ni se̱ áner aya ritek Adakunom ta sak á te áfikuus.

²⁸Kamok a canang áner aYahuda nizen iya a tá ya nanan nasho̱o̱n ánerawe. A tonong ye afumung rife̱ Adakunom tonong ye aYeso ne á nye aKiristi'me.