Read izere Itomong Ámanzo 2 Bible Online

Itomong Ámanzo 2 - izere bible

Itomong Ámanzo 2

¹Katuk aPentakos, [1] áfikuus cice̱r nyim naro̱ kazining.

²Nizen izining ne ba wor á fok ike̱ng ikak kyo̱ndi amaan kuwun tá ne natoon kaza tá fe̱se̱m tá no̱ kaye̱e̱r kasa kaya ba tú ku se be agap.

³Áyong á di ike̱ng ikak tin wuruk niba kyo̱ndi naban rigyem kuro̱ng i ta naka kasap i tin nyeseng natoon rice koangan ba.

⁴A tú shining ba cice̱r be Kabik Kazhe̱l'e ne á kpaan kufe̱ kanu ni írem ze̱r ze̱r kyo̱ndi Kabik Kazhe̱l'e tá ka no̱o̱k ba kukyem kufe̱'me.

⁵Nizen iyong áner aYahuda ákak aya a tá fok inyim adakunom tú ku se azong na aUshalima ne áya a tá nes koake̱ kaye̱e̱r kazatse.

⁶Á ta fa fok karo̱ tá wo̱ng yong ánerawe whe̱re̱ nyim, koangan kaye̱e̱r ba te zhing kamok á tá fok áfikuus ta sen fe̱ kanu ni írem ba.

⁷Ike̱ng'e tá ka no̱o̱k ba azhing dide̱ng yong á fe̱ ye, “Áner aya a ta fe̱ rife̱ na nye áner aGalili cice̱r aꞌa?

⁸To̱, á nye ane̱ koangan kaye̱e̱r yir fok ba ta fe̱ kanu ni írem yir e̱?

⁹Ákak yir nye áner aPatiya ne ákak nye áner aMedes ne áfe Elamawa, ákak nye áner kuwo̱p aMasopotamiya ze̱e̱r be áfe aYahudiya ne áfe aKapadokiya ne áner aPontus be áfe Asiya.

¹⁰Ákak yir nye áner aFirizhiya ne ákak nye áfe aPamfiliya ze̱e̱r be áfe aMasar ne áner á ta se nikyim aSirin bubarak be aLibiya, be átsen áya a ta nes na aRom cei

¹¹Di, áya a tá nye áner aYahuda be áya a tan won igo̱o̱n ba á tan kuus ife áner aYahuda ne áner aKirit be áfe Arabiya cice̱r. Koangan kaye̱e̱r yir ta fok ba á ta fe̱ natoon ike̱re̱ azhing iya Adakunom tan nye ni írem yir.”

¹²Á te zhing dide̱ng ne a daam ma á naka risim ye, “Ike̱ng iya ba tá nye na tonong akye̱ e̱?”

¹³Áyong a kak ti nye iwhas ye, “A n ma ka so̱ kugbe̱re̱ dide̱ng ma an feng'e.”

¹⁴Ayong aBitrus dorok a tá nyeseng mak be ribir álimazhiri kuso̱k be azining ame, a tá ta kuto̱ naza a tá fe̱ rife̱ nasho̱o̱n rigwo̱m ánerawe ame. A fe̱ ye, “Aroneng áner aYahuda be áner aya a ta sor kaye̱e̱r aUshalima cice̱r wesek yin kuto gye̱r nong ta fok yin ike̱ng iya mi tana fe̱. Won mi ta ka tak yin ike̱ng iya i ta sak yin ta kyem i se̱ yin rikpa'me baꞌ.

¹⁵Sang áner na n feng be kugbe̱re̱ kyo̱ndi yin ta sok yin baꞌ. Karo̱ ru nye kadiding nizham, izen nye itso̱m katonbo̱k tsek.

¹⁶I se anong baꞌ, iyu ne i nye ike̱ng iya aZhowel a tá tsang a fe̱:

¹⁷“ ‘Adakunom fe̱ ye, kaye̱e̱r inom igang'e, mi tà shining ánerawe cice̱r be Kabik Kazhe̱l'e. Inoon yin atek be ányining tà nye kuzarap, Adakunom tà tonong ácam be nanamang katsak wu. Ásho̱n tà ren katsak Adakunom kaye̱e̱r nabos ba.

¹⁸Mi tà shining ásam'i atek be ányining be Kabik Kazhe̱l'e kaye̱e̱r inom igang'e, á tà nye kuzarap.

¹⁹Mi tà tonong ánerawe kukyem mi natoon kaza be ike̱re̱ azhing aze nazatse. Naso̱k be kuro̱ng ne itsing tà tseng naza kyo̱ndi kuwun ta tseng be ane̱n.

²⁰Kunom tà shining ku tà te whi ne kufe̱n seng kyo̱ndi naso̱k. Ike̱re̱ azhing tà wuruk cei nizham agbang kunom. “ ‘Agwo̱m Ágwo̱m tà ra nye.

²¹“ ‘Nizen iyong, koangan a tà yis kaye̱e̱r riyerek Agwo̱m Ágwo̱m tà se̱ kashesh.’

²²“Áner Isarela fok yin rife̱ na, aYeso a tá nye afu Nazaret nye aner aya Adakunom tá ka tom yin'e. Adakunom nye itomong azhing be ife kukyem kaye̱e̱r wu nasho̱o̱n yin, yin ren yin anong be rice yin.

²³Adakunom tsang a ni sak kaye̱e̱r kushim wu ye a ta no̱o̱k aYeso nubo̱k yin, ámaan aner ta ka se̱ mo yin nong yin tú ku tigak yin nukon, a tá ku.

²⁴Adakunom tú ku dorok nure̱k be kutser, a tú ku kam be amaan risam riku kamok riku kyem ri tú ku yiir baꞌ.

²⁵aDauda fe̱ rife̱ natoon wu ye, “ ‘Mi di Agwo̱m Ágwo̱m nasho̱o̱n mi koakye izen wu se nubo̱k riya mi iyong sak mi tà fok inyim baꞌ.

²⁶Kamok anong riye̱ mi kare̱p, mi tù ku kerek be kanu mi. Mi tà sor kaye̱e̱r kazatse ma izen izen baꞌ gye̱rtatan, gip be anong riye̱ mi se ne̱k kamok mi min te riye̱ ni ike̱ng iya Adakunom tanin nye'me.

²⁷Kamok wan tà tiburum be kutser'i kaye̱e̱r kure̱k baꞌ, ka tà won Azhe̱l'e afuan tà bus baꞌ.

²⁸Wan n min tonong iren kutser. Wan tin shining be riye̱ rikan nasho̱o̱n wan.’

²⁹“Ároneng, áner Isarela, mi fe̱ be yin be riye̱ rizining ye atukop yir aDauda ku ma a tú ku ne̱r. Kure̱k wu se aze mak be yir ma katuur ana.

³⁰Amma a nye aner kuzarap, a ren ye Adakunom tsang shu ye wu tá sak aner akak kaye̱e̱r kuri wu tá te agwo̱m kyo̱ndi wu.

³¹aDauda tá fa di anong yong a fe̱ rife̱ natoon kudorok aKiristi nure̱k, ye sang a tú ku won kaye̱e̱r kure̱k baꞌ. Kuro̱m wu tá bus baꞌ.

³²aYeso'me ayong ne Adakunom tú ku dorok nure̱k be kutser, yir cice̱r yir ren yir ye i se anong dim.

³³Adakunom dorok aYeso nong a tú ku sak nubo̱k riya wu kufe kuyiik ne a ku no̱o̱k Kabik Kazhe̱l'e kyo̱ndi wu tá tsang a fe̱. Ike̱ng iya yin ta di yin ne i fok yin kyo̱o̱rna'me nye kunang kuya aYeso tá min no̱o̱k yir.

³⁴Sang aDauda be rice wu ngarak kaye̱e̱r kaza kyo̱ndi aYeso baꞌ, gip be anong a fe̱ ye, “ ‘Agwo̱m Ágwo̱m fe̱ be Agwo̱m Ágwo̱m'i ye, “Sonong nubo̱k riya mi

³⁵ma mi sak ámudo̱n wan ta kpa natak.” ’

³⁶“Kamok anong, won yin áner Isarela cice̱r tu ren yin ye, aYeso aya yin tú ku tigak yin nukon ame ne Adakunom mu ku sak an te Agwo̱m Ágwo̱m ne a nye aKiristi.”

³⁷Ánerawe tá fa fok anong, rife̱'me tú ku ra ba naye̱ ma a daam dide̱ng. Ne á fe̱ be aBitrus ne ribir ámanzo'me ye, “Ároneng, yir ta nye yir ane̱ e̱?”

³⁸Ayong aBitrus fe̱ be ba ye, “Shishing kuse yin nong a ta ka nye yin abatisma kaye̱e̱r riyerek aYeso. A ta ka re̱ng yin rine̱n yin, nong ta se̱ yin Kabik Kazhe̱l'e kaya Adakunom ta nyesek.

³⁹Adakunom fe̱ ye wu tà ka no̱o̱k, Kabik Kazhe̱l'e, kamok yin be inoon yin ne áner aya a ta se gugo̱k, ne áya Agwo̱m Ágwo̱m yir Adakunom tana ku yis ba.”

⁴⁰Ayong a fe̱ rife̱ gaan be ba ne a ka ko̱ro̱k ba kuto ye, “Shesh yin ace yin kaye̱e̱r amaan kunye kazatse na.”

⁴¹Áner aya a tá shan rife̱ wu se whe̱re̱ yong a tú ku nye ba abatisma. Katuk kayong ánerawe'me ta bubarak áner izungu itaar á ti barang niba.

⁴²Á ti te rice ba nike̱ng iya ámanzo tá ka bo̱so̱p ba'me ne á nyiis naro̱ kazining ne á ya Azhibi naro̱ kazining ne a nye aduwa mak.

⁴³Inyim ro̱ koangan dide̱ng kamok Adakunom tá nye itomong azhing dide̱ng ne ike̱re̱ azhing dide̱ng be ámanzo'me.

⁴⁴Áfikuus cice̱r ya kasho̱o̱n be kunyiis ne koakye ba te izining.

⁴⁵Á re̱e̱s naro̱ be ike̱re̱ iya ba tá be nong á tá kasap itso̱m'me be áner aya a tá se nutser.

⁴⁶Á ya kasho̱o̱n be kunyiis koakye katuk kaye̱e̱r Agbang Kutu Kuya Adakunom iben. Á ya naya mak ninasa ba kaye̱e̱r riye̱ rikan be riye̱ rizining.

⁴⁷Á tiyiik Adakunom ne á kpa kati kaseng nasho̱o̱n ánerawe cei. Agwo̱m Ágwo̱m sak áya a ta ka shesh ba ti barang kute whe̱re̱ koakye katuk.