Read izere Itomong Ámanzo 20 Bible Online

Itomong Ámanzo 20 - izere bible

Itomong Ámanzo 20

¹Nizen iya kuren'e tá gang, ne aBulus yis áfikuus. Nama a tú ku tsesek ba ne a ku nye ba atato̱ a tá dorok a tseng na aMakidoniya.

²A tsang a gorok koake̱ kaye̱e̱r kaben'e ne a tsesek ánerawe dide̱ng. Ni igang'e a no̱ niben aGiris,

³a tá te ife̱n itaar azong. Nizen iya a tse̱r a tá no̱ nukpara ashi nong a ta tseng na aSuriya ne a fok ye áner aYahuda tse̱r a tú ku fe̱r. Iyong a kpa aMakidoniya a tú ku bun.

⁴aSopata a tá nye aro̱m aPirus aya a tá nye áner aBiriya su ku tsaa mak be Aristakus ne aSekundus á tá nye áner aTasalonika, be aGayus a ta nye aner aDarbe ne aTimoti gip, be aTikikus ne aTurofimus a tá nye aner Asiya.

⁵Ba tseng nasho̱o̱n á ta se ni tor yir na aToruwas.

⁶Amma yir no̱ yir nukpara ashi i tá dorok yir na aFilipi nama a tá nye Riye̱ Rikan Kuya aBiredi dar ayisti. Nama inom itoon yir se se̱ yir ribir'e na aToruwas nong i tá te yir Asate azining azong.

⁷Katuk ime̱se̱ng na asate, yir nyim yir naro̱ kazining nong i tá ya yir abiredi. aBulus taas ánerawe Rife̱ Ritek dide̱ng, kamok a tá ren wu tá dorok nayatson'e, yong a ya kasho̱o̱n be rife̱ ma natite katuk.

⁸Iro̱ng tuse whe̱re̱ nutu katoon'e kuya yir tin nyim yir kaye̱e̱r'e.

⁹Acam akak riyerek wu tá nye aYutikus se nusonong na awindo. Izen iya ife aBulus ta yiir kufe̱ kanu iyong ida yiir aYutikus ame ma a ne̱ natoon kutu kufe ataar a tá kpa kaben. A tú ku sok an te kukom'me.

¹⁰Amma aBulus tiik kaben a ta se tiguum nukom acam'me a tú ku kunung ne a fe̱ ye, “Sang tu daam yin baꞌ, a ru nye atser.”

¹¹Iyong aBulus tú bun nutu katoon'e ame a ta se te̱se̱ng abiredi a ta ya. A fe̱ kanu ma kadiding karak, yong a dorok a tá tseng.

¹²Ánerawe sok acam ame á ta tseng be wu kari be kutser, aye̱ ba kare̱p acie̱k'e baꞌ.

¹³Yir se no̱ yir nukpara ashi i ta tseng yir kasho̱o̱n i be yir na Asos nong tase sok yir aBulus azong. aBulus fe̱ be yir ye yir ra sen tseng yir kamok wu ta tseng azong be atak.

¹⁴Nizen iya aBulus'e ti se̱ yir na Asos, yong yir tú ku sok yir nukpara'me i tá tseng yir na aMitilin.

¹⁵Kaya katson'e, yir no̱ yir nukpara ashi i ta dorok yir azong nong i tá tseng yir na aKiyos. Nunom kufe afa'me ne i tar yir i ta no̱ yir na aSamos, ne i bun i wesek yir na aMilitus

¹⁶aBulus tsang a nye kanye̱k a tá wesek na Afisa nukpara ashi'me fan a bu beseng izen na Asiya, kamok wu a se agbashak nong a ta no̱ na aUshalima, ke Adakunom shim ne a se no̱ katuk aPentakos.

¹⁷Izen iya aBulus ta se na aMilitus, a tom ye a ru ku yis áko̱k kasho̱o̱n áfikuus Afisa.

¹⁸Á ta fa be̱ ba ne a fe̱ be ba ye, “Yin ren yin kuri kusor kuya mi ta sor nizen iya mi ta se be yin kum katuk kaya mi tá no̱ niben Afisa.

¹⁹Mi nye Agwo̱m Ágwo̱m itomong kaye̱e̱r kumees rice dide̱ng be nanyisi rice gip be risam mi ta so̱ nubo̱k áner aYahuda.

²⁰Yin ren yin ye mi ti yo̱ro̱k be ku ka taas yin ike̱ng iya i tana ka se̱ yin mo baꞌ. Mi ta bo̱so̱p yin'e kanang ne i no̱o̱s ninasa ánerawe.

²¹Mi n taas áner aYahuda be áner aHeleni ye á ra shishing kuse ba á tu ku bun nufe Adakunom dim ne á ni no̱o̱k katsak na Agwo̱m Ágwo̱m yir aYeso.

²²“Kyo̱o̱rna, Kabik min sak ye i ra tseng na aUshalima. Mi ren ka akye̱ ne i tin se̱ azong baꞌ.

²³Igak ike̱ng iya mi ta ren nye, Kabik Kazhe̱l'e min tá ye kaye̱e̱r koakye agbang kuwo̱p kuya mi tú ku sor, mi ta so̱ risam dide̱ng ne a ni rosom itso̱m.

²⁴Amma gip be anong, mi sok ye kutser'i nye ike̱ng ikak baꞌ. Kum ke mi kyem i gang ike̱ng iya mi tan sak nasho̱o̱n ne i gang itomong iya Agwo̱m Ágwo̱m yir aYeso ta min no̱o̱k (itomong kutaas ánerawe ritek Adakunom) iwe̱r'e yong.

²⁵“Kyo̱o̱rna mi ren ye sang akak kaye̱e̱r yin áya mi tan tsang i gorok ne i ka taas yin itak rigwo̱m Adakunom tà ba ni di baba baꞌ.

²⁶Kamok anong, mi shim ta ka tak yin katuur, rine̱n akak kuse natoon rice mi baꞌ.

²⁷Kamok sang mi ti yo̱ro̱k be ku ka taas yin koakye ike̱ng iya Adakunom ta shim ke a nye baꞌ.

²⁸Ni sak yin riye̱ rice yin, ne kukpara kuya Kabik Kazhe̱l'e ta ka sak yin'e nong ta sor yin áko̱k kasho̱o̱n. Ya yin kasho̱o̱n be kufek áfikuus Adakunom áya wu tá shan be naso̱k Igon wu.

²⁹Mi ren ye nama mi tana tseng, amaan ágabu tà be̱ no̱ kaye̱e̱r yin nong á tin kpa nukpara'me.

³⁰Kaye̱e̱r yin gip, ákak tà dorok nong á ta buruk katsak'e nong ase̱ áfikuus akak tà ka kuus ba.

³¹Kamok anong, sak yin riye̱. Yiring yin, mi n te aye̱ ataar ne i ka nyesek yin itabak katuk be kunom be nanyisi rice.

³²“Kyo̱o̱rna, mi ta won yin nubo̱k Adakunom. Ritek wu se mak be yin. Wu ta sak yin tin barang yin kukpa agap ne a ka no̱o̱k kutse kaye̱e̱r áner aya wu ta sak an te zhe̱l.

³³Mi kun min te riye̱ nitso̱m ka ares akak baꞌ.

³⁴Yin be rice yin gip, yin ren yin ye mi n nye itomong be ibo̱k'i na i tin se̱s ike̱ng iya mi tin sor mak be áner aya á ta se be mi.

³⁵Kaye̱e̱r koakye ike̱ng mi tá nye, mi ta ka tonong yin ye be kunye itomong ana dar karuur ne i se̱ yir áner aya a ta agap dim. Yiring yin be rife̱ Agwo̱m Ágwo̱m yir aYeso a tá fe̱ ye, ‘Aner kuno̱o̱k ike̱ng be riye̱ rikan ne a nar aya a tu ku no̱o̱k.’ ”

³⁶aBulus tá fa fe̱ anong ne a tigbok akuur mak be ba cice̱r a tá nye aduwa.

³⁷Á tos cice̱r ba ne a naka kur, ne a ku nye atato̱.

³⁸A nye riye̱ riwe dide̱ng be kuri rife̱ a tá fe̱ ye sang á ta ba ku di nigaan'e baꞌ. Ayong á se te aBulus niren a ta se no̱ nukpaar ashi a tá tseng.