Read izere Itomong Ámanzo 21 Bible Online

Itomong Ámanzo 21 - izere bible

Itomong Ámanzo 21

¹Nama yir tá kam yir be ba, yir se no̱ yir nukpara ashi nong i tá wesek yir nuwo̱p aKos. Kaya katson'e, i tseng yir na aRod, azong ne i be yir na aPatara.

²I se̱ yir kukpara ashi kukak azong ku tá sen tar iben aFoneshiya. Iyong yir no̱ yir i ta tseng yir.

³Yir tá fa ye̱re̱k yir aSapurus ne i faas yir nubo̱k rimen i ta tseng yir na aSuriya. Yir tiik yir na aTaya, kukpara ashi kuya yir tin no̱ yir'e tiik acer azong.

⁴Yir tá fa se se̱ yir áfikuus ákak azong, yir sor yir mak be ba kuko̱s kanataar azong. Kabik Kazhe̱l'e tá ka tak ba ye á ra fe̱ be aBulus ye sang a tú tseng na aUshalima baꞌ.

⁵Amma izen kudorok yir tá fa nye ne yir ya yir kasho̱o̱n be kutseng yir. Áfikuus ányining ba atek ne inoon cice̱r ti te yir niren ma nama kuwo̱p'e. I tigbok yir akuur i ta nye yir aduwa nanu agbang kudung.

⁶Nama yir ta naka nye yir atato̱, yir se no̱ yir nukpara ashi ne ba kubun kari.

⁷Yir ya yir kasho̱o̱n be kutseng yir. I dorok yir na aTaya i tá tseng yir na aTolemayis. I se nye shou yir áronyining yir áfikuus azong ne i te yir kunom kuzining mak be ba.

⁸Kaya katson'e yir dorok yir ta be yir na aKaisariya nong i ta se no̱ yir nasa aFilibus aya a tá nye aner awazi Rife̱ Ritek. A tá nye akak kaye̱e̱r áner kanataar áfe a tá kasa na aUshalima.

⁹A be ángas anaas a tan nye iwe̱ne̱ng baꞌ, ángas wu'me be kunang kuzarap.

¹⁰Nama i tá te yir inom gaan azong ne aner kuzarap akak riyerek wu tá nye Agabus, ne na aYahuda nong a tá be̱.

¹¹A tá fa be̱ nufe yir ne a sok kudun aBulus tin rosom kutin wu a tin rosom ibo̱k be atak wu a tá fe̱ ye, “Kabik Kazhe̱l'e fe̱ ye ana ne áner aYahuda a ta se na aUshalima tà rosom atek kudun na, ne á no̱o̱k áner aya a ta nye áner aYahuda baꞌ.”

¹²Yir tá fa fok yir anong ne yir be ribir áner aya a tá se azong nye yir aBulus akusuk ye sang a tu tseng na aUshalima'me baꞌ.

¹³Iyong aBulus fe̱ ye, “Akye̱ sak yin tos yin e̱? Yin tse̱r yin ikap'i ta te̱r a? Mi n no̱o̱k riye̱ mi sang kamok a tin rosom tsek baꞌ, ko a tin fe̱r na aUshalima kamok riyerek aYeso a ta nye Agwo̱m Ágwo̱m gip, to̱ tsek.”

¹⁴A tá fa gaar kufok rife̱ yir yong i tú ku won yir durwe̱e̱r'e i ta fe̱ yir ye, “Won Agwo̱m Ágwo̱m tu nye ike̱ng iya wu ta i se gye̱r.”

¹⁵Nama inom cie̱k, yir nye yir kanye̱k i ta tseng yir na aUshalima.

¹⁶Áfikuus ákak kaye̱e̱r aKaisariya ti kuus yir i tá tseng yir nasa kakak tana ku sor yir. Kasa'me nye kafe aner aSapurus'e akak riyerek wu ta nye aManason, a nye akak kaye̱e̱r afikuus agbugbang'e.

¹⁷Nizen i ta se no̱ yir na aUshalima, ároneng áfikuus ti shan yir be riye̱ rikan.

¹⁸Kayatson'e, aBulus be ribir yir tseng nufe aYakub, áko̱k kasho̱o̱n ikilisiya cice̱r se azong.

¹⁹Nama aBulus tú nye ba ashou a tú taas ba koakye ike̱ng iya Adakunom ta nye kaye̱e̱r áner aya a ta nye áner aYahuda baꞌ ni itomong wu tá nye.

²⁰Á tá fa fok anong ne á kerek Adakunom. Iyong á fe̱ be aBulus ye, “Aroneng wan di wa, áner aYahuda whe̱re̱ min no̱o̱k katsak. Cice̱r ba á ti be rifup kukuus Itsi aMusa.

²¹A ma ka taas ba ye wan bo̱so̱p áner aYahuda'me áya a ta sor ni iwo̱p áner á ta nye áner aYahuda baꞌ ye á ra won Itsi aMusa, ye á tu nye inoon ba izhak baꞌ, ye á ra won igo̱o̱n yir.

²²To̱, yir tà nye yir ane̱ e̱? Ko a nye ane̱ ba tà fok ye wan m be̱ aze.

²³Kamok anong, nye ike̱ng iya yir tana ka tak yir. Áner anaas kuse aze á tan nye kushu.

²⁴Tseng mak be ba nong ta se te zhe̱l ne wan karang itso̱m kute zhe̱l ba'me nong á tu ku kor ba. Be anong ne koangan tà ren ye ike̱ng iya a tin fe̱ natoon wan nye abo̱o̱s, amma wan kuus Itsi aMusa.

²⁵Amma natoon áfikuus áya sang á ta nye áner aYahuda baꞌ, yir n zibir yir kufumung ye sang a tu ya naya a ta nye kamok itsi baꞌ. A tu nye rikuna baꞌ. A tu ya rinam ike̱ng iya a ta tsibik kuto̱'me ka be naso̱k baꞌ.”

²⁶Kayatson'e aBulus tseng mak be áner ame á tá se naka kusu nong á ta te zhe̱l. Iyong a tseng nagbang kutu kuya Adakunom iben nong ase̱ a ta tonong inom kute zhe̱l'e tana gang nong a ta nye asidaka kamok koangan ba.

²⁷Nizen inom kanataar'e ta be barak i ta shining, áner aYahuda ákak áya a tá ne niben Asiya di aBulus na agbang kutu kuya Adakunom iben. Iyong á whap ánerawe nong á tá se yiir aBulus.

²⁸Ne á tasak ye, “Áro̱ áner Isarela, be̱ yin tin se̱ mo yir. Di yin, aner na ne a tsang a kar koake̱ ne a fe̱ ike̱re̱ imaan'e natoon ánerawe yir be Itsi yir ne kutu kuya Adakunom iben yir. Ma a n be̱e̱n be aner aHeleni kaye̱e̱r kutu kuya Adakunom iben nong a ta te kye̱re̱ be karo̱ Kazhe̱l'e na.”

²⁹(Ba fe̱ anong kamok á kun di aTurofimus a ta nye aner Afisa mak be aBulus kaye̱e̱r kuwo̱p. Ba sor ye ka aBulus i no̱ be wu kaye̱e̱r kutu kuya Adakunom iben'e.)

³⁰Áner kuwo̱p'e cice̱r wor á dorok á tá wuruk koake̱ be itsi. Á tá be̱ yiir aBulus. Á tú ku ko̱k á tu ku tun kaye̱e̱r agbang kutu kuya Adakunom iben'e, ne á wor á whe̱se̱ng nanukutu'me.

³¹Á se be kanye̱k ku kufe̱r ne itak'e tseng nufe aritek asozha aRom ye kudaam n no̱ na aUshalima.

³²Iyong a wor a bo̱ ásozha'me ne ako̱k kasho̱o̱n ákak nong á tá tseng be itsi naro̱'me. Ánerawe'me tá fa di aritek ame be ásozha wu ta saase, yong á won kutsor aBulus.

³³Aritek asozha'me be̱ bubarak a tú ku yiir ne a sak a tu ku rosom be idun atso̱m ifa. Ne a rip ye a nye angan e̱? A nye akye̱ e̱?

³⁴Ákak tasak á tá fe̱ ike̱ng ikak ne ákak fe̱ ikak ze̱e̱r. Aritek'e tá fa se̱ katsak'e baꞌ, kamok ánerawe tá korok ikun, yong a sak ye a ra tseng be aBulus'e naro̱ itomong ba.

³⁵Nizen aBulus ta fa be̱ naro̱ a tu ku ngarak, ne ánerawe nye kyo̱ndi á tin kpa niba ma ásozha ame tu sok.

³⁶Rigwo̱m ánerawe'me á tu ku kuus ba tang ikun ye, “A gang be wu.”

³⁷Nizen ásozha'me tá be̱ bubarak a ta no̱ be aBulus naro̱ itomong ba, yong aBulus fe̱ be aritek ásozha'me ye, “Wan ta shim ta ka rip ike̱ng ikak a?” Iyong aritek ásozha'me fe̱ be aBulus ye, “Wan fok irem aner aHeleni a?

³⁸Aser, wan ne i nye aner aMasar aya a tá sak anerawe ta ko̱n kuren be rigwo̱m ma wan ko̱k kasho̱o̱n amaan aner izungu inaas aya á ta se kaye̱e̱r katse a ta fe̱s ánerawe nuko̱s kama aꞌa?”

³⁹Iyong aBulus fe̱ ye, “Mi nye aner aYahuda, mi ne na aTarsus niben aKilikiya. Mi ne na agbang kuwo̱p. Kusuk ni won nong ta fe̱ kanu be ánerawe na.”

⁴⁰Aritek ásozha'me tá fa ku no̱o̱k iren ne aBulus dorok a ta nyeseng naro̱ a tu ku ngarak ne a sok kubo̱k naza ye ánerawe ra te gbik. Ánerawe'me ta fa te gbik yong a fe̱ be ba nirem aner aRaniya.