Read izere Itomong Ámanzo 23 Bible Online

Itomong Ámanzo 23 - izere bible

Itomong Ámanzo 23

¹Iyong aBulus ti sak anyisi na nusonong áko̱k kasho̱o̱n ame a tá fe̱ be ba ye, “Ároneng, be riye̱ rizining mi n nye koakye ike̱ng Adakunom tin sak ye mi ra nye ma nizen iyuna.”

²Ananiya aya a tá nye agbang atsi tá fa fok anong ne a sak áner a tá se nuyeseng bubarak be aBulus'e ye á ra rus kanu'me.

³Iyong aBulus fe̱ be wu ye, “Adakunom tà ma ka rus gip akardak aner. Wan n sonong azong nong ase̱ tin to̱ amok kyo̱ndi Itsi ta shim. Gip be anong wan ra kuus ike̱ng iya Itsi'me ta fe̱ baꞌ nong i tá sak a tin rus.”

⁴Áner aya a tá se nunyeseng bubarak be aBulus fe̱ be wu ye, “Agbang atsi Adakunom ne wan tú ku kas a?”

⁵Iyong aBulus fe̱ be ba ye, “Ároneng, mi ren ye a nye agbang atsi baꞌ. Kamok i se ni izibir ye, ‘Sang tin fe̱ imaan'e natoon ako̱k kasho̱o̱n baꞌ.’ ”

⁶aBulus tá fa di ákak ba nye áner aSadusi ne ákak nye áner aFarisi, yong a ta kuto̱ a tá fe̱ be kusonong ako̱k kasho̱o̱n'e ye, “Ároneng, mi nye aner aFarisi, kutes aner aFarisi. A sen ni to̱ amok kamok mi min te riye̱ ni dorok ikom.”

⁷Iyong ba tá fa fe̱ anong ne nanaan dorok natite áner aFarisi ne áner aSadusi ma kanyim'e naka kabak.

⁸(Áner aSadusi be kuto̱ro̱ng ye sang kudorok ikom kuse baꞌ, ka ámaleka ne itak kabik kuse baꞌ. Áner aFarisi shim ye ike̱re̱ itaar'ong kuse cei.)

⁹Riwo̱ng ti no̱ niba dide̱ng ma áner aya a tá bo̱so̱p Itsi ákak aya a tase kaye̱e̱r kugung rice áner aFarisi dorok á nyeseng ne á ya nanan dide̱ng. Á fe̱ ye, “Yir se̱ yir aner na be rine̱n ike̱ng ikak baꞌ. Kashim kabik kakak ka amaleka ne a fe̱ kanu be wu.”

¹⁰Nanan'e ti barang ma aritek asozha'me fok inyim fan á bu sarak aBulus. Iyong a sak ásozha ákak á tin shan aBulus nubo̱k ba be agap nong a tá tseng be wu naro̱ itomong ba.

¹¹Katuk tá fa nye ne Agwo̱m Ágwo̱m be̱ a nyeseng bubarak be aBulus a tá fe̱ be wu ye, “Naka tsesek. Kyo̱ndi wan tá fe̱ itak'i na aUshalima, anong ne wan tà fe̱ na aRom dim gip.”

¹²Kadiding tá fa karak, áner aYahuda nyim kanu á tá shu ye sang ba tà ya naya ka á tà so̱ ike̱ng ikak baꞌ, ma ba fe̱r aBulus.

¹³Áner aya a tá nye kanye̱k'ong nar áner iso̱k inaas.

¹⁴Iyong á tseng nufe ágbang atsi ne ásho̱n nong á tá fe̱ ye, “Yir n iya yir kushu ye yir tà ya yir ike̱ng ikak baꞌ, ma yir fe̱r yir aBulus nizham.

¹⁵Kamok anong kyo̱o̱rna yin be áko̱k kasho̱o̱n tom yin nufe aritek ásozha ye á ra ka be̱e̱n yin aBulus'e ye yin shim ta bun i fok yin rife̱ wu gye̱r. Yir tu ku fe̱r yir nizham a ta ra be̱ aze.”

¹⁶Amma nizen iya igon angasnyining aBulus tá fok itak'e, yong a tseng naro̱ itomong ásozha ame a ta se tak aBulus.

¹⁷Iyong aBulus yis akak kaye̱e̱r áko̱k kasho̱o̱n ásozha'me a tá fe̱ be wu ye, “Tseng be acam na nufe aritek yin, a be ike̱ng ikak iya a tana ku tak.”

¹⁸A tseng be acam ame nufe aritek ba. Ne a fe̱ ye, “aBulus aya a tá se nuwhe̱e̱n nitso̱m ne a tom nunaan ye mi ru ku be̱e̱n be acam na nufuan kamok a be ike̱ng ikak a tana ka tak.”

¹⁹Iyong aritek ame yiir kubo̱k acam'me a tú ku ko̱ro̱k nukim nong a tú ku rip ye, “Akye̱ ne wan shim tin tak e̱?”

²⁰Acam ame fe̱ ye, “Áner aYahuda min sak ye ba tà fe̱ be wan ye i ru tseng be aBulus nasho̱o̱n kusonong áko̱k kasho̱o̱n ba natson kyo̱ndi ba shim á ta fok rife̱ wu gye̱r.

²¹Amma sang tu shim baꞌ. Kamok ánerawe a ta nar iso̱k inaas sen ku tor nong á tù ku fe̱r. Án ya kushu ye sang ba tà ya naya ka á tà so̱ ike̱ng ikak baꞌ ma ba fe̱r aBulus. Kyo̱o̱rna á tor wan ta ka shim ba'me.”

²²Iyong aritek ásozha'me te acam ame niren ne a fe̱ be wu ye, “Sang tu tak akak ye wan min tak itak na baꞌ, so̱.”

²³Iyong agbang ásozha'me yis aritek asozha aRom afa nong a tá fe̱ be ba ye, “Nye yin kanye̱k nong ta tseng yin na aKaisariya nabas itsom katobo̱k natuk na, mak be ásozha iso̱k inyak ifa ne ásozha aya a ta ko̱n natoon itsaap iso̱k kanataar be áya a ta ko̱n be ako̱o̱n iso̱k inyak ifa.

²⁴Tse̱r yin itsaap iya aBulus tanin ngarak nong a ta be nufe agwo̱mna aFelis caang.”

²⁵Ako̱k kasho̱o̱n ásozha ame a zibir kufumung ye,

²⁶Kunom ra be rigwo̱m, mi, aKalaudiyus Lasiyas, ne i ta zibir kufumung na, wan Agwo̱mna aFelis, mi ta nye ashou dide̱ng.

²⁷Áner aYahuda an yiir aner na, á fe̱ a tu ku fe̱r. Mi ra tseng be ásozha i tú ku shesh kamok mi fok ye a nye aner aRom.

²⁸Mi shim ta ren ike̱ng iya a tá nye, yong ne mi tseng be wu nasho̱o̱n áko̱k kasho̱o̱n ba.

²⁹Rife̱ ba natoon wu se natoon Itsi ba tsek. Sang an nye rine̱n ike̱ng ikak i ta kyem a tu ku fe̱r ka a tu ku te nitso̱m baꞌ.

³⁰Nizen iya a tin tak ye áner aYahuda n nye amaan kanye̱k natoon wu yong mi tom be wu nufuan zizirik. Mi fe̱ be ba ye á ra fe̱ ike̱ng iya a tá nye nasho̱o̱n wan.

³¹Kamok ásozha'me sok aBulus'e nong á ta tseng'e kyo̱ndi a tá fe̱ be ba. Á tseng'e nuwo̱p Atipatiris natuk.

³²Kaya katson'e, ásozha á ta ko̱n natoon ítsaap'e tseng be wu ne ribir'e kuburung naro̱ itomong ba.

³³Nizen iya ásozha'me ta se no̱ na aKaisariya ne á no̱o̱k agwo̱mna'me kufumung'e ne a ku won aBulus'e nubo̱k.

³⁴Agwo̱mna'me fa kufumung'e ne a rip aBulus ye ka wu nye afu angan e̱? A tá fa fok ye a ne na aKilikiya

³⁵yong a fe̱ ye, “Mi ta fok rife̱ wan amma ma áner aya a ta nye kukun wan be̱.” Iyong agwo̱mna'me fe̱ ye a ra sak aBulus'e nazuri aya aHiridus ne a tá no̱.