Read izere Itomong Ámanzo 24 Bible Online

Itomong Ámanzo 24 - izere bible

Itomong Ámanzo 24

¹Nama kuko̱s kutoon yong Ananiya a ta nye agbang atsi tseng na aKaisariya mak be ásho̱n ákak ne aloya akak a tu ku yis ye aTatulus. Á se te kukun aBulus nufe agwo̱mna.

²A ta fa yis aBulus kaye̱e̱r'e ne aTatulus san kufe̱ ike̱ng wu tin te kukun aBulus nufe aFelis ye, “Yir n sor yir caang aye̱ gaan nizen wan kamok kudi gugo̱k wan ne yir se̱ yir kusor yir shishing ana kaye̱e̱r kaben yir na.

³Ánerawe yir cice̱r ren anong, kunom ra be rigwo̱m. Yir te be yir riye̱ rikan dide̱ng.

⁴Amma fan i ba ka beseng yir izen, mi ta nye izong kusuk te kuta riye̱ tin fok yir cie̱k tsek.

⁵“Yir se̱ yir aner na a shim kusor caang baꞌ. A tsang a whap áner aYahuda koake̱ nazatse na nong á tà ko̱ro̱ng. Wu ne a nye ako̱k kasho̱o̱n áfe a ta se nigung rice aner aNazaret áfe kukuus aYeso.

⁶Ma a shim a ta te kye̱re̱ be agbang kutu kuya Adakunom iben, yong ne yir tú yiir yir. Yir shim a tu ku to̱ amok kyo̱ndi Itsi yir ta fe̱.

⁷Amma ako̱k kasho̱o̱n aLisiya be a tú ku shan nubo̱k yir be agap

⁸Ke wan tu risim be rice wan gip wan tà fok katsak ike̱ng yir tin fe̱ yir na cice̱r.”

⁹Áner aYahuda gip á kuus kama kukun'e, ye koakye ike̱ng a tá fe̱ nye katsak.

¹⁰Nizen agwo̱mna'me tá no̱o̱k aBulus iren nong a ta fe̱ kuto̱ kufu. Iyong aBulus'e fe̱ ye, “Mi ren wan n te aye̱ gaan ne i to̱ áner kaben na amok, kamok anong mi be riye̱ rikan ta ka tak kuto̱ kunaan.

¹¹Wan ta kyem i rip katsak'e gip ta fok, i nar inom kuso̱k be afa baꞌ, mi tá be̱ na aUshalima ni iya Adakunom iben.

¹²Áfe a ta te kukun ti se̱ ni iya nanaan be akak kaye̱e̱r agbang kutu kuya Adakunom iben baꞌ. Sang akak kun ni se̱ niwhap ánerawe ninaro̱ aduwa aner aYahuda ka naro̱ kakak ze̱e̱r kaye̱e̱r kuwo̱p baꞌ.

¹³Ike̱re̱ ba ta fe̱ ye mi nye'ong akak ba ta kyem nyeseng be agap nong a ta tonong ye ike̱re̱'ong nye katsak baꞌ.

¹⁴Ei, mi shim ye mi ya Adakunom átukop yir iben ni Iren na ba ta fe̱ ye i nye kugung rice áner aNazaret. Mi ti no̱o̱k katsak natoon koakye ike̱ng i ta se ni izibir kaye̱e̱r Itsi aMusa be afumung áner kuzarap.

¹⁵Mi n bun min te riye̱ na Adakunom kyo̱ndi áner na ye a ta dorok aya a ta nye azhe̱l'e ne aya a ta nye amaan'e.

¹⁶Iyong ne i sak, koakye izen mi shim ta sor be agak riye̱ nasho̱o̱n Adakunom ka ánerawe baꞌ.

¹⁷“Nama mi ta te aye̱ gaan nufang, mi tu bun na aUshalima nong ta be̱ tobok áner yir áya a ta se nudaam ne i nye abeko.

¹⁸Mi sen nye anong'e nizen iya ba tin se̱ kaye̱e̱r agbang kutu kuya Adakunom iben nama mi tan gang kunye ike̱re̱ itsi ta fe̱ ye i ra nye, mi se zhe̱l. Ba ti se̱ be rigwo̱m ánerawe ka be riwo̱ng be ánerawe baꞌ.

¹⁹Amma áner aYahuda ákak á ta ne niben Asiya tuse azong, gye̱r ke ba ne á be̱ aze nong á ta nye kukun'i nasho̱o̱n wan ke ba fa be rife̱ rikak natoon'i.

²⁰Ka áner aya a ta se aze ra tak rine̱n riya ba ta se̱ natoon'i nizen iya á tá nye kukun'i nufe áko̱k kasho̱o̱n yir.

²¹Ma ke rife̱ mi ta fe̱ nizen iya mi tá ta kuto̱ nasho̱o̱n ba i ta fe̱ ye, ‘A sen ni to̱ amok nasho̱o̱n yin katuur kamok itak kudorok ikom nure̱k.’ ”

²²Iyong aFelis a ta tsang a ren itak Iren aYeso'me ko̱ro̱k amok'e ye, “Ma izen iya ne aLisiya a ta nye aritek ásozha be̱ mi ta ra te̱n amok'e.”

²³aFelis fe̱ be aritek ásozha'me ye a ra fek aBulus gye̱r sang a tu mak a ku firik baꞌ, ye a ra won áfertseng wu tin sak riye̱ ni wu.

²⁴A ta fa te inom gaan ne aFelis be̱ mak be abining wu aDursila a ta nye abafe aYahuda. A tom ye a ru ku yis aBulus. A wesek kuto a ta foos ike̱ng iya aBulus ta fe̱ natoon itak ku nino̱o̱k katsak na aYeso Kiristi.

²⁵Nizen iya aBulus tá fe̱ rife̱ natoon kuse kutek nasho̱o̱n Adakunom be kuyiir rice ne amok a tana to̱ kazatse'me, aFelis fok inyim. Iyong a fe̱ ye, “I kyem anong, tseng makong. Izen iya mi ta di i ti se gye̱r, mi ta tom a ta ka yis.”

²⁶aFelis fe̱ anong ne a ni te riye̱ ye kashim aBulus tu ku no̱o̱k itso̱m. Iyong a yiir toos zhir zhir ne a fe̱ kanu be wu.

²⁷Amma nama aye̱ afa ne aPokiyus aFestus ngarak ni itsik rigwo̱m. aFelis shim a ta kare̱p áner aYahuda riye̱ yong a won aBulus nitso̱m.