Read izere Itomong Ámanzo 26 Bible Online

Itomong Ámanzo 26 - izere bible

Itomong Ámanzo 26

¹Iyong Agaribus fe̱ be aBulus ye, “A ma ka no̱o̱k iren ta fe̱ rife̱.” Iyong aBulus sok kubo̱k naza a tá fe̱ ye,

²“Adagwo̱m, mi di ye, mi di awe̱ng mi ta nyeseng nasho̱o̱n wan katuur nong ta ka tak kuto̱ kunaan natoon ike̱re̱ áner aYahuda tin te kukun'i.

³Mi nye aner awe̱ng katsak'e kamok wan ren igo̱o̱n be ike̱re̱ áner aYahuda tin ya nanaan natoon'e. Kamok anong mi ta nye izong ye i rin fok kaye̱e̱r ku tatan.

⁴“Áner aYahuda cice̱r ren kuri kusor mi ta sor kum ne mi ru nye igon. Ba ren kuta mi nuwo̱p'i ne kusor'i na aUshalima gip.

⁵Ba ti ren kum gbugbang, ke a shim á ta ka tak, ye mi nye akak kaye̱e̱r áner aFarisi, kugung rice kuya ku ta ro̱ ne ku nar niren kuya Adakunom iben yir cice̱r.

⁶Kyo̱o̱rna, a sen ni to̱ amok katuur kamok mi min te riye̱ nike̱ng Adakunom tá fe̱ ye wu ta no̱o̱k átukop yir.

⁷Ike̱ng iya a tá tsang a fe̱'me nye nazu yir áner Isarela kuso̱k be afa ti te riye̱ ye i tá shining, ma a ti te rice ni itomong Adakunom kunom be katuk. Kunom ra be rigwo̱m, kamok mi ti te riye̱ mi ne áner aYahuda nye kukun'i.

⁸Akye̱ sak yin di yin ye Adakunom ta kyem a sak áfe a tan kus ta dorok baꞌ e̱?

⁹“Mi be rice mi gip mi tsang i di ye kyo̱ndi i se gye̱r mi tana nye koakye ike̱ng mi tana i nye nong ta te̱ne̱ng itak natoon riyerek aYeso afu Nazaret.

¹⁰Ike̱ng iya mi ta nye na aUshalima'ong tsek. Ágbang átsi ne a ti no̱o̱k iren kutes ázhe̱l'e whe̱re̱ nitso̱m ne i kuus kama ku ka fe̱s ba.

¹¹Mi tsees ninaro̱ aduwa ba ne i ku nyesek ba risam dide̱ng, mi ta sak ba nong á tá zhe̱e̱sh aYeso. Mi tú ku di ba kye̱re̱ makiyi ma mi tsees niben kufang nong ase̱ ta ka tabak ba.

¹²“Kaye̱e̱r kutseng'i kukak mi sen tseng i be na aDamaskus. Ágbang átsi ti no̱o̱k iren be kufumung.

¹³Nabas katite kunom, kunom ra be rigwo̱m, Adagwo̱m, mi ta se niren'e mi di akanang aya a ta nar kunom ta ne naza a tin samang natoon'i be áfudang'i.

¹⁴Yir cice̱r yir kpas yir kaben, ne mi fok kuto̱ kukak tá fe̱ be mi nirem áner aYahuda ye, ‘Ashawulu, Ashawulu, akye̱ sak wan ti tabak e̱? Wan no̱o̱k rice wan risam wan ta gaar inaan.’

¹⁵“Iyong mi fe̱ ye, ‘Wan nye angan Agwo̱m Ágwo̱m e̱?’ “Ne Agwo̱m Ágwo̱m'me fe̱ be mi ye, ‘Mi ne i nye aYeso aya wan ta sen ku tabak.

¹⁶Amma dorok nyeseng. Mi ti wuruk ni wan nong ta ka sak ta te aner itomong'i, ne i ta taas ike̱re̱ iya wan tá di natoon'i katuur be iya mi tana ka tonong nasho̱o̱n.

¹⁷Mi ta ka shesh nubo̱k ánerawe wan ne áner á ta nye áner aYahuda baꞌ. Mi ta ka tom nufu ba.

¹⁸Wan ta ka karak ba anyisi nong á tà won awhi ne á be̱ na akanang. Á ta won kukuus Ishetan ne á be̱ nufe Adakunom nong ase̱ a ta ka re̱ng ba rine̱n ba, ne a ka sak ba be áya a ta se zhe̱l kamok kuno̱o̱k katsak ba ni mi.’

¹⁹“Kamok anong, Adagwo̱m, mi won dar i nye ike̱ng iya a tin tonong naza baꞌ.

²⁰Ni ime̱se̱ng'e, mi san kutaas áner aDamaskus rife̱ Adakunom ne áya a ta se na aUshalima ne áfe iben aYahuda cice̱r. Mi bun i taas áya sang á ta nye áner aYahuda baꞌ, ye á ra shishing kuse ba nong á tu ku bun nufe Adakunom ne á nye ike̱re̱ iya i tana tonong ye ba n shishing kuse ba.

²¹Ike̱ng iya i tá sak áner aYahuda ti yiir nubang agbang kutu kuya Adakunom iben ne á ta tse̱r a tin fe̱r'ong.

²²Amma Adakunom ti se̱ mo ma nizen iyu, kamok anong ne mi nyeseng aze i ta taas asho̱n be inoon. Sang mi fe̱ ike̱ng ikak ze̱e̱r be rife̱ áner kuzarap ne iya aMusa tá fe̱ baꞌ.

²³Á ta fe̱ ye aKiristi ta so̱ risam. A ta nye ime̱se̱ng'e kaye̱e̱r áya a tana dorok. Be anong a ta be̱e̱n ánerawe wu áner aYahuda be áya sang á ta nye áner aYahuda baꞌ, akanang itak kashesh.”

²⁴aBulus ta se be i fe̱ kuto kufu, yong aFestus ta kuto̱ a ta fe̱ ye, “aBulus, rice wan se gye̱r baꞌ. Kuren ike̱ng wan'e ta ka sak ta yirim.”

²⁵Amma aBulus fe̱ ye, “Kunom ra be rigwo̱m, mi yirim baꞌ. Ike̱ng iya mi ta fe̱ na se gye̱r, i nye katsak.

²⁶Mi ta fe̱ kanu be Adagwo̱m be riye̱ rizining kamok wu dun ike̱ng ikak kaye̱e̱r ike̱re̱ mi ta fe̱ na baꞌ. Mi ren wu n tiburum be ike̱ng ikak kaye̱e̱r ike̱re̱ na.

²⁷Adagwo̱m, wan ti no̱o̱k katsak na áner kuzarap aꞌa? Mi ren wan ti no̱o̱k katsak.”

²⁸Ayong Agaribus fe̱ be aBulus ye, “Wan di ye wan tà ko̱ro̱k riye̱ mi nong ta te afikuus kaye̱e̱r kaban izen cie̱k ana a?”

²⁹Ayong aBulus fe̱ ye, “I ta sok izen ka i ta sok izen baꞌ, mi nye aduwa be Adakunom ye sang wan, wan ze̱e̱r baꞌ, amma koangan a ta sen ni foos katuur ta te kyo̱ndi mi, sang nurosom ana baꞌ.”

³⁰Ayong agwo̱m'me ne agwo̱mna be aBanis ne áner aya á kyem a tana ku fe̱r ka a tu ku te nitso̱m baꞌ.

³¹Á tá fa wuruk ba naro̱ amok'e ne á fe̱ ye, “Ei, aner na nye ike̱ng iya i ta tas a tana ku te nitso̱m ka a tu ku fe̱r baꞌ.”

³²Ayong Agaribus fe̱ be aFestus ye, “A fa fe̱ ye aner na nye ku kun nufe aKaisar baꞌ, ke a ku won a ta tseng.”