Read izere Itomong Ámanzo 27 Bible Online

Itomong Ámanzo 27 - izere bible

Itomong Ámanzo 27

¹Nizen iya a tin sak ye yir ra no̱ yir nukpara ashi nong ta tseng yir niben Italiya, yong a won aBulus be áfe itso̱m ákak nubo̱k aritek ásozha aRom akak riyerek wu tá nye aZhuliyos. Akak kaye̱e̱r ásozha a tá yis ye, ásozha aKaisar.

²Yir tá fa no̱ yir kaye̱e̱r kukpara ashi Adaramitiyu, a ta se be kanye̱k a ta dorok nong a tá be ni iwo̱p ikak bubarak be Asiya. I ta fa san yir kutseng yir. Aner aTasalonika akak niben aMakidoniya a tú ku yis ye Aristakus se mak be yir.

³Kaya katson'e yir se no̱ yir na aSidon. aZhuliyos tonong aBulus ritek a tu ku won a ta tseng nufe áfertseng wu nong á tin sak riye̱ ni wu.

⁴I ta dorok yir azong kaye̱e̱r kukpara ashi kuwun yiir ku ni tosom yir. Kamok anong yir faas yir kaben aSayifus fan kuwun bin daam yir.

⁵Nama i tá tar yir agbang kudung ku ta se bubarak be kaben aKilikiya ne aPamfiliya, i tá no̱ yir na aMira kaye̱e̱r iben aLisiya.

⁶Azong ne aritek ásozha aRom'me se̱ kukpara ashi aner Alekzandiriya ku ta be niben Italiya nong a ti te yir kaye̱e̱r'e.

⁷I te yir inom gaan kaye̱e̱r kutseng'e kamok kutseng'e se whiwhe̱. I so̱ yir risam nizham i ta ra se no̱ yir bubarak be aKinidus. Yir ba kyem i ya yir kasho̱o̱n be kutseng'e nabas ayong baꞌ kamok kuwun tá nar agap. I se gorok yir kaben aKirit bubarak be aSalmoni.

⁸I so̱ yir risam, ma i se no̱ yir naro̱ kakak a ta yis ye, Karo̱ akpara ashi tu ku nyeseng caang. Karo̱'me se bubarak be kuwo̱p aLasiya.

⁹I tá tsang i beseng yir izen dide̱ng azong, ma kutseng'e ba saas baꞌ, kamok izen agbang kunom kure̱ng rine̱n tsang ku gor. Iyong aBulus tú ku no̱o̱k ba ibo̱ro̱ng ye,

¹⁰“Áro̱, mi di ye kutseng yir na ta saas baꞌ, yir tin wei yir nukpara ashi'me ka acer yir, ma be kutser yir gip.”

¹¹Amma aZhuliyos, shan rife̱ aBulus baꞌ, a ban shishing a kuus rife̱ aner a ta ko̱k kukpara ashi'me be rife̱ atek kukpara ashi'me ingya.

¹²Karo̱ kunyeseng akpara ashi kaya ka tase na aFinikiya se gye̱r akpara ashi tanin nyeseng rikos baꞌ. Iyong kukap ánerawe fe̱ ye, i ya yir kasho̱o̱n kashim ta se no̱ yir na aFinikiya ta ya yir rikos azong. Karo̱'ong nye karo̱ kunyeseng akpara ashi na aKirit, ka tase ne ka ye̱re̱k katoon be kaye̱r.

¹³Nizen iya kuwun kutek ta ne nabas kaye̱r ta san ku fe̱se̱m whiwhe̱, áfe kuko̱k kukpara ashi'me di ye ba ma se̱ karo̱'me yong. Iyong á tun kutso̱m kukak ku tana yiir kukpara ashi'me naro̱ kazining, a ta tsang a kuus kukyim ashi aKirit.

¹⁴A ta fa sor cie̱k ne kuwun kukak kumaan'e bun ku wuruk nabas katoon nong ku tá fe̱se̱m naro̱ dide̱ng. A yis kuwun'e ye Kuwun Kaye̱r.

¹⁵Kuwun'e fe̱se̱m kukpara ashi yir be agap, yir ba ya yir kasho̱o̱n baꞌ. Ma yir won yir durwe̱e̱r'e nong kuwun'e tá ma gaas kukpara ashi'me.

¹⁶I se gor yir nama rigung rikak a ta yis ye aKauda. I so̱ yir risam i ta ra turung yir akpara ashi azhizhe̱k'e.

¹⁷Nama ba ta ko̱ro̱k kukpara ashi'me kuhiir'e natoon'e á te kaye̱e̱r'e, yong á rosom kukpara ashi yir tin se yir kpa be idun fan ku bu fo. Ne a tiik be acer'e nong kuwun ta gaas kukpara'me kamok sang ba ba kyem ako̱k baꞌ. A nye anong fan ku ba ka barak ba natoon rigung rize̱k aSirtis.

¹⁸Kamok kuren ashi'me, tin tosom yir be agap, kadiding tá fa karak ne ba kpaan kuturung acer a tá se kaye̱e̱r kukpara'me ne á barak kaye̱e̱r ashi.

¹⁹Katuk afe ataar'e ba be ibo̱k ba ne á bun á barak ike̱re̱ itomong kukpara ashi'me ikak.

²⁰I tá fa te yir inom gaan dar kudi kunom ka adar ayi kamok amaan kuwun'e ta yiir'e, nigang'e ma i te yir awa ye tá wei yir tsek.

²¹Ánerawe tá fa te inom gaan dar kuya naya, yong aBulus dorok a tá nyeseng nasho̱o̱n ba nong a tá fe̱ be ba ye, “Áro̱, a fa fe̱ ye yin kuus yin rife̱ mi ke yir dorok yir na aKirit baꞌ. Sang ke yir no̱ yir kaye̱e̱r kawei ne risam ana baꞌ.

²²Amma kyo̱o̱rna mi ta nye yin izong ye i ra naka tsesek yin, kamok akak yin ta wei baꞌ, ma ke kukpara ashi na tsek.

²³Natuk nashirim amaleka Adakunom akak, aya mi ta sor afu ne i ku nye itomong, be̱ a nyeseng nukim'i.

²⁴A ta fe̱ ye, ‘Sang tu fok inyim baꞌ, aBulus. Ma a tseng be wan nufe aKaisar. Kamok wan Adakunom kaye̱e̱r ritek wu ta shesh áfe kutseng wan cice̱r.’

²⁵Kamok anong naka tsesek yin, áro̱, mi ti no̱o̱k katsak na Adakunom ye ike̱ng iya a tá fe̱ be mi ta se anong.

²⁶Gip be anong, kuwun na tin tun yir natoon rigung rize̱k rikak.”

²⁷Natuk katuk afe kuso̱k be inaas kum ne kuwun'e ru ni gaas yir nagbang kudung Adiriya. Nabas katite katuk áfe a ta ko̱k kukpara'me di kyo̱ndi yir n be̱ yir barak ta se̱ yir kaben.

²⁸Iyong á maas kutsik kudung'e, a se̱ kuse amita kutak kuso̱k inyak be iso̱k ifa. I fa ya yir kasho̱o̱n cie̱k ne á bun á maas ne á se̱ kutsik'e se amita kutak iso̱k katonbo̱k.

²⁹Inyim tú ro̱ ba ye kashim kukpara'me ta se carak agbang kuta. Iyong á barak atso̱m anaas kaye̱e̱r ashi nabas kama kukpara'me nong atso̱m'e tá yiir kukpara ashi'me karo̱ kazining. Á whe̱e̱n anyisi nong á tá nye izong ye ke kadiding ra rak zizirik.

³⁰Amma áfe kuko̱k kukpara ashi'me tse̱r á tá teng. Iyong á tiik kukpara ashi kukak kuhiir'e kaye̱e̱r kudung'e. Á ta ma nye kyo̱ndi ba tse̱r á tá barak atso̱m a tana yiir kukpara ashi'me karo̱ kazining nabas kasho̱o̱n.

³¹Iyong aBulus fe̱ be aritek ásozha aRom'me ne ribir ásozha'me ye, “Sang ke áner na fan mak be yir kaye̱e̱r kukpara ashi na baꞌ, akak kaye̱e̱r yin tà gaar baꞌ.”

³²áSozha'me tá fa fok anong yong á te̱se̱ng idun á tin rosom ahiir kukpara'me nong a tá won ashi ta tseng'e.

³³Kadiding tá fa be̱ barak ka ta karak, yong aBulus tú ku nye ba izong ye, á ra yas. A fe̱ ye, “Katuur kuko̱s kuso̱k be anaas na kum yin be aye̱ naza dar kute ike̱ng ikak nanu.

³⁴Kamok anong mi ta nye yin izong ye i ra yas nong tin shan yin kutser. Kakuyong rice akak yin tá wei baꞌ.”

³⁵aBulus'e ta fa fe̱ anong ne a sok abiredi a ta tonong riye̱ rikan'e be Adakunom nasho̱o̱n ba cice̱r. Ne a te̱se̱ng, a tá kpaan kuya'me.

³⁶Iyong cice̱r ba ti barang kuse agap, koangan kaye̱e̱r ba ya naya.

³⁷Yir áfe i ta se yir kaye̱e̱r kukpara ashi'me cice̱r i se yir áner kuso̱k inyak ifa ne iso̱k kanataar be igataar.

³⁸Nama koangan ta ya naya a wha, ne ba turung alikama ne á barak kaye̱e̱r ashi nong ase̱ kukpara ashi'me ta te fen.

³⁹Kadiding tá fa karak, áfe kuko̱k kukpara ashi'me ba kyem á ren karo̱ kaya ba tú ku se baꞌ. Ma á di karo̱ kakak be rize̱k nukim'me, yong a nye kanye̱k nong á ta se bo̱mo̱ng kunyeseng natoon rize̱k'e.

⁴⁰Iyong á te̱se̱ng itun iya a tin rosom kukpara ashi'me naro̱ kazining nong a tá won kaye̱e̱r ashi. Nizen iyong ne á bis idun a tin rosom ike̱ng kuko̱k kukpara ashi'me. Iyong a ko̱ro̱k ike̱ng iya kuwun tin gaas kukpara ashi'me kasho̱o̱n a ta ma tseng nukim kudung'e.

⁴¹Amma i ta tseng yir naro̱ kuren ashi'me yong kukpara ashi'me se carak iben ma rice kukpara'me no̱ kaye̱e̱r iben'e ma ku ba kyem ku sees baꞌ. Iyong kukpara ashi'me san ku zarak nabas kama kamok kuren ashi'me.

⁴²Iyong ásozha ame tse̱r á ta fe̱s áfe itso̱m'me fan akak ba bu tang riwo̱k a ta whe̱r.

⁴³Amma aritek ásozha aRom'me ta shim a ta shesh aBulus, yong a tú ku roon ba'me. Ne a fe̱ be ba ye áner aya a ta ren riwo̱k ra san kufuruk nong á ta wo̱k a ta tseng nukim kudung'e.

⁴⁴Ribir ba ti ngarak nikon ne natoon ikpis kukpara kuya ku ta fo ame. Be anong ne koangan tar caang.