Read izere Itomong Ámanzo 28 Bible Online

Itomong Ámanzo 28 - izere bible

Itomong Ámanzo 28

¹Yir tá fa tar yir caang ne i fok yir ye a yis rigung'e ye rigung aMalta.

²Áner kuwo̱p'e ti tonong yir ritek makiyi. Ayong á ti shan yir ibo̱k ifa cice̱r yir ne á ni kas yir kuro̱ng kamok iza sen kpa ne karo̱ shirim.

³aBulus tusung ikon nong a tin te nuro̱ng'e. Iyong iwhen ikak i tá be nado̱m wuruk kamok kuro̱ng'e ta zhoosh, i tá karam nubo̱k aBulus a tu fan she̱ng.

⁴Áner kuwo̱p'e tá fa di iwhen'e tá re̱ nubo̱k aBulus, yong á fe̱ ye, “Katsak'e, aner na nye aner a ta fe̱s ánerawe. A wher ashi gye̱rtatan, gip be anong rine̱n rusek rice wu.”

⁵aBulus ziming kubo̱k wu a ta barak iwhen'e kaye̱e̱r kuro̱ng ike̱ng ikak imaan'e tuse baꞌ.

⁶Ánerawe'me sor ye á tá mos ne á kpa kukom'e, a fa ra kubaan á di ike̱ng ikak nye baꞌ, yong á shishing kuto̱ro̱ng ba á ta fe̱ ye a nye adakunom kukak.

⁷Ako̱ akak tu kuse bubarak azong a tá nye áfe aPubiyus, wu ne a nye ako̱k kasho̱o̱n kuwo̱p'e. A ti shan yir ibo̱k ifa a tá tseng be yir kari wu. A ti sak riye̱ ni yir ma inom itaar.

⁸Atek aPubiliyus'e nye atser baꞌ, a se nameneng be kuro̱m kuzhosh ne atini. Ayong aBulus no̱ kaye̱e̱r'e a tá su ku nye aduwa a tin sak kubo̱k ritek natoon wu ne a ku sak a tá te atser.

⁹Nama a ta nye anong, yong ribir áfe iro̱k á ta se nuwo̱p'e cice̱r be̱s ne a ku sak ba a ta te atser.

¹⁰Á ti tiyiik yir niren ze̱r ze̱r. Izen tá fa nye yir tana se no̱ yir nukpara ashi ta tseng yir, yong a ti nyesek yir iriri ike̱re̱ iya yir ta shim yir.

¹¹Nama ife̱n itaar, yir se no̱ yir nukpara ashi aner Alekzandiriya kukak ku ta kos azong rigung'ong. Kukpara ashi'me be nawu nafe̱e̱s acam afa kaye̱e̱r'e á ta nye ike̱re̱ itsi.

¹²Yir tá fa se no̱ yir na aSirakus, i te yir inom itaar azong.

¹³Yir bun i dorok yir azong i tá tseng yir na aRigiyum. Nama kuko̱s kuzining, kuwun kukak ku ta nes nabas kaye̱r fe̱se̱m karo̱, kaya katson'e yir ba se no̱ yir na aPutiyoli.

¹⁴Azong yir se se̱ yir aroneng áfikuus ákak, á tin nye yir izong ye i ra te yir Asate azining azong be ba. Be anong ne yir tseng yir na aRom.

¹⁵Ároneng afikuus áya a ta se na aRom ta fa fok ye yir saase yir, yong á be̱ ma naro̱ rizhik Apiyus be karo̱ kakak a ta yis ye Karo̱ Kufan áfe Kutseng Kafe Ataar, nong á tin shan yir niren. aBulus tá fa ku di ba ne a nye riye̱ rikan be Adakunom ne a ni barang kuse agap.

¹⁶Yir tá fa no̱ yir na aRom ne a won aBulus ta se sor kusor wu be asozha akak a tú ku fek.

¹⁷Nama inom itaar, aBulus tusung áko̱k kasho̱o̱n aner aYahuda naro̱ kazining cice̱r. Nizen iya a tá nyim, aBulus fe̱ be ba ye, “Ároneng, sang mi n nye áner yir rine̱n ka mi won dar i kuus igo̱o̱n átukop yir baꞌ. Gip be anong, á ti yiir na aUshalima nong a tá no̱o̱k áner aRom.

¹⁸Áner aRom'me ta ye̱re̱k ike̱ng iya mi tá nye ka á ti se̱ be rine̱n baꞌ. Á shim a tin won kamok á ti se̱ be rine̱n ike̱ng ikak i ta kyem á tanin fe̱r baꞌ.

¹⁹Amma nizen iya aner aYahuda tá raba ye sang á tin won baꞌ, iyong ne i sak mi ta tseng be amok'e nufe aKaisar. Sang i se ye mi nye ku kun áner'i baꞌ.

²⁰Kamok anong ne mi fe̱ ye, mi shim ta ka di yin nong ta fe̱ kanu be yin. A min rosom aze na be atso̱m kamok kute riye̱ aner Isarela ta min te ni wu.”

²¹Iyong á fe̱ be wu ye, “Yir n se̱ yir kufumung kukak áner aYahuda ta zibir natoon kuse kumaan wan baꞌ. Aner aYahuda akak aya a ta ne azong ne a be̱ a min tak yir ike̱ng ikak natoon wan baꞌ.

²²Amma yir shim ta fok yir kuto̱ro̱ng kufuan, kamok yir ren yir ye ánerawe koake̱ fe̱ itak imaan'e natoon kugung rice na.”

²³Iyong á ti sak kunom a tana nyim be aBulus. Ánerawe whe̱re̱ be̱s azong naro̱ wu tú ku sor. Nadiding ma nawheshirim a yiir ku kutaas ba rife̱ natoon rigwo̱m Adakunom ne a tse̱r iren a tana sok aye̱ ánerawe nong á ta kuus aYeso ne a ninye itomong be Itsi aMusa ne afumung áner Kuzarap.

²⁴Ákak kaye̱e̱r ba shim ike̱ng iya aBulus tá fe̱, amma ákak ti no̱o̱k katsak baꞌ.

²⁵Kamok anong nanan ti no̱ kaye̱e̱r ba yong á san ku naka kaas nama aBulus ta fe̱ rife̱ be ba ye, “Aser, Kabik Kazhe̱l'e fe̱ katsak be átukop yin, a tá fe̱ be Ishaya aner kuzarap ye,

²⁶“ ‘Tseng nufe aner'ong ta se fe̱ be ba ye, “Yin tà yiir foos yin'e, amma ta ren yin ike̱ng iya a tin fe̱ baꞌ. yin tà yiir kuye̱re̱k yin'e amma ta ren yin ike̱ng iya i ta sor baꞌ.”

²⁷Kamok aye̱ áner na n te di kuta, á fok kuto baꞌ, á whe̱se̱ng anyisi ba. Fan á bu ye̱re̱k be anyisi ba ne á fok be ato ba. Ke á se̱ rikpa rife̱'me be aye̱ ba ne á ku bun nunaan, ne mi ka sak ba á ta te atser.’

²⁸“Kamok anong, mi shim yin tú ren yin ye Adakunom n tom itak kashesh wu nufe áner aya a ta nye áner aYahuda baꞌ. Ba tà wesek kuto.”

²⁹[Nama aBulus tá fe̱ anong, yong áner aYahuda dorok ne á tsang á ya nanan awan ba.]

³⁰aBulus te aye̱ afa kaye̱e̱r kasa wu tin sor ne a karang itso̱m'e koakye kufe̱n ne a shashang áner aya a tá be̱s nufu ibo̱k ifa.

³¹A nye awazi Rife̱ Ritek dar inyim azong kamok sang a tú ku roon'e ba', a nye awazi natoon rigwo̱m Adakunom ne a bo̱so̱p ánerawe'me itak aYeso Kiristi a ta nye Agwo̱m Ágwo̱m.