Read izere Itomong Ámanzo 3 Bible Online

Itomong Ámanzo 3 - izere bible

Itomong Ámanzo 3

¹Katuk kakak aBitrus be aYohana tseng a be naro̱ kuya Adakunom iben, nizen aduwa nitso̱m itaar ife kunom.

²To̱, aner akak tuse azong a tú ku tes akun'e. A tú ku kok ne a se saas nanukutu agbang kutu kuya Adakunom iben'e, a tá yis ye “Kanukutu Kusas.” Koakye katuk ne a ku sok a tá su ku sak azong nong a tá nye izong nufe áner aya a tana gosok ne á no̱o̱s kaye̱e̱r agbang kutu kuya Adakunom iben'e.

³A tá fa di aBitrus be aYohana n be̱ bubarak á tá no̱, yong a tú ku rip ba itso̱m.

⁴aBitrus be aYohana ti sak anyisi ni wu, ne aBitrus fe̱ be wu ye, “Ni ye̱re̱k yir.”

⁵Ayong aner ame ti sak anyisi ni ba, wu sor ye á tú ku no̱o̱k ike̱ng ikak.

⁶Amma aBitrus fe̱ be wu ye, “Mi be itso̱m ko cie̱k baꞌ, amma ike̱ng iya mi ta be iyong ne mi tà ka no̱o̱k. Kaye̱e̱r riyerek aYeso Kiristi afu Nazaret, dorok ta tseng.”

⁷Ayong aBitrus tú ku ko̱ro̱k kubo̱k riya nong a tá nyeseng tsik, ne atak be akuur aner ame wor a kpa agap.

⁸Ayong aner ame dorok purus, a tá nyeseng ne a san kutseng, a no̱ kaye̱e̱r kubang agbang kutu kuya Adakunom iben ame, a tsang a furuk ne a kerek Adakunom.

⁹Ánerawe tú ku di a ta tsang tseng ne a kerek Adakunom.

¹⁰Ba ren ye aner aya a tá tsang a sosok ne a nye izong nanukutu a tá yis ye Kanukutu Kusas ame. Áyong á te ba zhing be ike̱ng azhing iya ba tá di.

¹¹Ánerawe cice̱r te zhing ne á wor á wuruk be itsi á ta be̱ á se̱ aner ame an yiir aBitrus be aYohana nubang a tá yis ye kubang aSolomon.

¹²aBitrus tá fa di anong, yong a fe̱ be ba ye “Áner Isarela, kamok akye̱ yin te yin zhing ana e̱? Kamok akye̱ yin ti ye̱re̱k yir kyo̱ndi yir ne i sak yir aner na tá tseng be kukyem rice yir ka kamok yir ta ren i kuus yir rife̱ Adakunom gye̱r e̱?

¹³Adakunom aya a ta nye afe Ibrahim ne a nye afe Ishaku ne a nye afe aYakub, Adakunom atukop yir, wu ne a tiyiik asam wu aYeso. Yin tú ku sok yin i tá no̱o̱k yin áko̱k kasho̱o̱n nong á tú ku fe̱r. Yin tú ku rayin nasho̱o̱n aBilatus, aBilatus'e shim a tú ku won gye̱rtatan.

¹⁴Amma yin rayin Azhe̱l'e na, Aya a se gye̱r nasho̱o̱n Adakunom nong yin ta nye yin aBilatus akusuk ye a ra ka tun yin aBarabas aya a tá fe̱s ánerawe ingya.

¹⁵Yin fe̱r yin aner aya wu ne a ta Ritin kutser amma Adakunom tú ku dorok nure̱k. Yir tú ku di yir be anyisi yir.

¹⁶Kukyem riyerek aYeso, kamok kuno̱o̱k katsak wu riyerek aYeso ne aner na ti se̱ agap atak wu. Riyerek aYeso ne kuno̱o̱k katsak wu ta be ne ku tú ku no̱o̱k kute atser cice̱r na, kyo̱ndi yin tu ku ye̱re̱k yin.

¹⁷“Ároneng, mi ren yin nye yin anong kaye̱e̱r kudun kuren kyo̱ndi áko̱k kasho̱o̱n yin ta nye.

¹⁸Adakunom nye anong nikum a tá shining ike̱re̱ iya wu tá tsang a fe̱ nanu áner kuzarap wu ye, aKiristi ta so̱ risam.

¹⁹Kamok anong, shishing yin kuse yin tu ku bun yin nufe Adakunom nong ase̱ a ta ka re̱ng yin rine̱n yin. Yin ta se̱ yin agap afe Kabik nufe Agwo̱m Ágwo̱m,

²⁰wu tà ka tom yin Kiristi, aya a ta nye aner kashesh a tan tsang a ka kasa yin'e.

²¹Wu tà sor azong kaye̱e̱r kaza ma nizen iya Adakunom tana shishing koakye ike̱ng nizham kyo̱ndi wu tá tsang a fe̱ gbugbang ni nanu áner kuzarap wu ázhe̱l'e.

²²aMusa fe̱ ye, ‘Agwo̱m Ágwo̱m yin Adakunom ta ka tun yin aner kuzarap akak kaye̱e̱r kutes yin kyo̱ndi a tin tun kaye̱e̱r yin. Fok yin koakye ike̱ng a tana ka tak yin cei.

²³Koangan afe a ta gaar kufok aner kuzarap'ong a tu ku kam be ánerawe aya á ta nye áfe Adakunom.’

²⁴“Katsak'e, aSamela be ribir áner kuzarap cice̱r aya a tá nye kuzarap nama wu a fe̱ itak izen iyu.

²⁵Yin nye yin inoon áner kuzarap, yin ne i nye yin áner aya a tana ya kutse kushu kuya Adakunom átukop. A fe̱ be Ibrahim ye, ‘Anerawe kazatse na cice̱r ta se̱ ritek kamok kuri wan.’

²⁶Nizen iya Adakunom tá kasa asam wu, a tú ku tom nufe yin ni ime̱se̱ng'e nong a tá ka te yin ritek ne a sak koangan kaye̱e̱r yin ta shishing kuse nong a tá won amaan kunye wu.”