Read izere Itomong Ámanzo 4 Bible Online

Itomong Ámanzo 4 - izere bible

Itomong Ámanzo 4

¹Nizen iya aBitrus be aYohana tá se be kufe̱ kanu be ánerawe yong atsi be áko̱k kasho̱o̱n áner aya a ta fek kutu kuya Adakunom iben ne áner aSadusi [2] ákak be̱ nufe ba.

²Aye̱ ba beseng dide̱ng kamok ámanzo tá se be ibo̱so̱p ánerawe'me ye aYeso dorok nure̱k, ye iyong tonong ye áner aya a tan kus ta dorok.

³Áyong a yising aBitrus be aYohana nong a tú ku te ba nitso̱m ma kaya katson'e kamok karo̱ tsang ka te kawheshirim.

⁴Anerawe whe̱re̱ aya a tá fok rife̱ riya aBitrus be aYohana tá taas ti no̱o̱k katsak. Áner aya a ti no̱o̱k katsak'e ti barang kube̱ whe̱re̱. Ayong afikuus cice̱r te átek izungu itoon.

⁵Kaya katson'e, ágwo̱m be ásho̱n aner aYahuda ne áfe kubo̱so̱p itsi nyim na aUshalima,

⁶Anas aya a tá nye agbang atsi ti se azong kaye̱e̱r kanyim'e be aKayafas ne aYohana ne Alekzanda be ribir áner akak a tá nye áner kasa agbang atsi'me.

⁷Ayong ba sak ye á ra be̱e̱n aBitrus be aYohana nasho̱o̱n ba. A tá fa ka be̱e̱n ba ne á kpaan ku karisim ba ye, “Yin nye iyuna be kukyem angan e̱? Kaye̱e̱r riyerek angan ne yin ti nye yin ana e̱?”

⁸To̱, aBitrus a tan shining be Kabik Kazhe̱l'e fe̱ be ba ye, “Áko̱k kasho̱o̱n ne ásho̱n yir,

⁹ke i se ye a min yis yir katuur nong ta ka tak yir ka a nye ane̱ akun na tá te atser e̱?

¹⁰To̱, yir shim yin cice̱r be áner Isarela tu ren ye, kaye̱e̱r riyerek aYeso Kiristi, afu Nazaret, aya yin tú ku tigak yin amma Adakunom tú ku dorok nure̱k.

¹¹Wu aYeso'me na ne a nye, “ ‘Kuta kuya yin áfe rino̱k tá rayin, kuyong ne kun te kuta itsik ribor'e.’

¹²“A se̱ kashesh nufe akak ze̱e̱r baꞌ, kamok riyerek rikak kuse ze̱e̱r a tá no̱o̱k anerawe natoon kaza nong a tin se̱ kashesh baꞌ.”

¹³Áko̱k kasho̱o̱n ame tá fa di aBitrus be aYohana tá fe̱ kanu be riye̱ rizining, ne ba bun á ren tse̱ng tse̱ng ye sang á nye áner aya a tá fa afumung ba', amma á nye ánerawe ana mama tsek, yong á te zhing, ne á fe̱ ye áner na mak á sor mak be aYeso.

¹⁴Amma áko̱k kasho̱o̱n ame tá bun á di aner aya a tú ku sak a tá te atser ame nunyesng mak ámanzo ame, yong á ren ike̱ng ku fe̱ baba ba'.

¹⁵Áyong a fe̱ be ámanzo ame ye a ra wuruk á tá ka nang ba karo̱, ne á kpaan ibo̱ro̱ng awan ba ye,

¹⁶“Yir ta nye ane̱ be áner na e̱? Kamok koangan afe a tá sor kaye̱e̱r aUshalima an ren ye áner na dim ne an nye agbang ike̱ng azhing iya yir tana kyem i ton yir'e baꞌ.

¹⁷I ku ko̱ro̱k yir ba kuto ye sang á tu ba fe̱ ike̱ng ikak kaye̱e̱r riyerek na ko cie̱k baꞌ, fan ánerawe gaan bu fok itak'e.”

¹⁸Ayong á bun a tá ka yis ba á ta fe̱ be ba ye, sang a tu ba fe̱ ike̱ng ikak be akak kaye̱e̱r riyerek aYeso nigaan'e baꞌ.

¹⁹Amma aBitrus be aYohana fe̱ be ba ye, “To̱, ye̱re̱k yin be rice yin ta di yin ka inyaka ta nar kuse gye̱r nasho̱o̱n Adakunom e̱? I fok yir rife̱ yin ka i fok yir rife̱ Adakunom ingya e̱?

²⁰Kamok yir ta kyem i te yir gbik natoon ike̱ng ife yir ta di yir ne i fok yir baꞌ.”

²¹Á ta fa di ba kyem a se̱ aBitrus be aYohana be rine̱n nikum á ta ka whereng ba baꞌ, ayong á rus kubo̱k kaben á tá ka te ba ni iren kamok ánerawe cice̱r kerek be ike̱ng iya i tá nye.

²²Aner aya a tú ku sak a tá te atser'e tá se aye̱ kyo̱ndi iso̱k inaas.

²³Kum a áfa won aBitrus be aYohana ne á kubun nufe ánerawe ba, á tá su ku taas ba ike̱re̱ iya agbang átsi be áko̱k kasho̱o̱n tá fe̱ be ba cice̱r.

²⁴Nizen iyu á tá fok anong ne á nyim rice á tá ta kuto̱ naza á ta nye aduwa nasho̱o̱n Adakunom ye, “Agbang Agwo̱m Ágwo̱m, wan afe i ta nye kaza be kaben ne isho̱ng be koakye ike̱ng i ta se kaye̱e̱r'e.

²⁵Wan ti nye itomong be Kabik Kazhe̱l'e i ta fe̱ nanu asam wan atukop yir aDauda ye, “ ‘Akye̱ sak áya sang a ta nye áner aYahuda baꞌ ta nye riye̱ riwe e̱? Ne á nye akpe̱de̱ng kanye̱k e̱?

²⁶Ágwo̱m kazatse n nye kanye̱k kuren, áko̱k kasho̱o̱n ba se natoon'e, a raba Agwo̱m Ágwo̱m ne aKiristi wu tá kasa.’

²⁷“I se anong, aHiridus be aBuntus Bilatus ne áner aya sang a ta nye aner aYahuda baꞌ nyim rice be áner Isarela, kaye̱e̱r agbang kuwo̱p na, á tá ko̱n be ásam wan ázhe̱l'e aYeso aya wan tú ku kasa a ta te aner kashesh.

²⁸Ba nyim á ta nye ike̱ng iya wan tan sak ta nye kaye̱e̱r kuyiik be kukyem wan.

²⁹Kyo̱o̱rna, Adakunom, di á tan rus kubo̱k kaben, no̱o̱k ásam wan agap riye̱ nong á tin taas rife̱ wan be riye̱ rizining dar inyim.

³⁰Ni sak kubo̱k wan natoon ánerawe nong á ta te atser, nye ike̱re̱ azhing ne ike̱re̱ iya i tana tonong kukyem wan kaye̱e̱r riyerek asam wan azhe̱l'e aYeso.”

³¹Nizen iya ba tá gang kunye aduwa, yong karo̱ kaya ba tú ku nyim'e zuur, ne a ku shining ba be Kabik Kazhe̱l'e ne a taas rife̱ Adakunom be riye̱ rizining dar inyim.

³²Áfikuus cice̱r be kuto̱ro̱ng kuzining ne kudi ba kuzining. Ko akak sok ye ike̱ng iya wu tá be nye ifu wu ze̱e̱r baꞌ. Koangan ba kasap koakye ike̱ng iya aner'e ta be be áfudang wu.

³³Be kukyem dide̱ng ámanzo ya kasho̱o̱n be kutaas ánerawe itak kudorok Agwo̱m Ágwo̱m yir aYeso nure̱k. Ritek whe̱re̱ se natoon koangan kaye̱e̱r ba.

³⁴Akak kaye̱e̱r ba tse̱r ike̱ng ikak sho̱ng baꞌ. Kamok áfe a tá be ako̱ ikap ka nasa ayi cice̱r á re̱e̱s'e nong á be̱s be itso̱m'e,

³⁵ne á be̱s'e nufe ámanzo'me nong á tá kasap koangan'e kyo̱ndi aner'e tá tse̱r.

³⁶Aner aLawi'me akak tuse aya a tú ku yis ye aYusufu, a tú tes na aSipurus. Ámanzo tú ku yis ye aBarnabas (i ta sor ye Aner kutsesek ánerawe).

³⁷A re̱p riko̱ wu rikak nong a tá be̱e̱n be itso̱m'e nasho̱o̱n ámanzo.