Read izere Itomong Ámanzo 6 Bible Online

Itomong Ámanzo 6 - izere bible

Itomong Ámanzo 6

¹Nizen iyong, álimazhiri ti barang kute whe̱re̱, yong áner aYahuda aya a tá fok irem aHeleni kpaan anyinye̱m be áfudang ba áner aYahuda aya a tá fok Aramiya. Áner aYahuda aya a tá fok irem aHeleni kpaan anyinye̱m ye izen iya ne a dorok i kasa naya sang a yiring be ányining ba áya atek ba tan kus baꞌ.

²Iyong ámanzo kuso̱k be afa ame yis áfikuus cice̱r naro̱ kazining nong á tá fe̱ ye, “I se gye̱r yir ta won awazi rife̱ Adakunom, nong tu ku bun yir ni itak naya baꞌ.

³Kamok anong ároneng, kasa yin áner kanataar kaye̱e̱r yin aya a ta ren ike̱ng ne á be kuse kutek ne Kabik Kazhe̱l'e. Yir tà ka won yir ba itomong kukasap naya.

⁴Yir tin te yir rice ni inye aduwa be kubo̱so̱p ánerawe rife̱ Adakunom.”

⁵Áfikuus'e cice̱r fok kusas ibo̱ro̱ng iya ba tá no̱o̱k, ayong á kasa aFilibus ne aPurokorus be aNikano ne aTimon be aParmenas ne aNikolas a tá nye aner Antakiya, aya sang a tá nye aner aYahuda, amma a no̱ ni ikuus igo̱o̱n ba.

⁶Á be̱ be ba nasho̱o̱n ámanzo ne ámanzo'me nisaas ibo̱k natoon ace ba, á tú ku nye ba aduwa.

⁷Ánerawe dide̱ng ti barang kufok rife̱ Adakunom ma áfikuus ti barang kute whe̱re̱ koakye katuk kaye̱e̱r aUshalima. Átsi aner aYahuda whe̱re̱ ti barang kushan rife̱ Adakunom.

⁸Aner akak a tú ku yis ye Itifanus, a nye aner a tá ritek ne kukyem Adakunom tá se mak be wu dide̱ng, a nye ike̱re̱ azhing ne itonong iya i tá kukyem Adakunom nasho̱o̱n ánerawe.

⁹Áner aYahuda akak aya a tá ne niben aSirin ne na Alekzandiriya áya a tá no̱o̱s nutu aduwa a tá yis ye kutu áfe kuse “Washak”, [3] á nyim kanu be áfudang ba aya a tá ne niben aKilikiya ne na Asiya nong á tá ya nanan be Itifanus.

¹⁰Amma Kabik Adakunom no̱o̱k Itifanus kukyem kuri kukak kuya a tin fe̱ kanu be ba, akak ba kyem a ya nanan be wu baꞌ.

¹¹Ayong á whap áner akak kyo̱o̱n ye á ra fe̱ ye, “Yir tú ku fok Itifanus ta sen zhe̱e̱sh aMusa ne Adakunom.”

¹²A tá fa nye anong ne á whap ánerawe dide̱ng be áko̱k kasho̱o̱n ne áfe kubo̱so̱p Itsi ma aye̱ beseng. Ayong a yiir Itifanus a ta tseng be wu nasho̱o̱n áko̱k kasho̱o̱n ne ásho̱n aner Isarela.

¹³Ayong áko̱k kasho̱o̱n anerawe ame be̱s be naborok nakak ye, “Aner na koakye izen a yiir i fe̱ kpe̱de̱ng be azhe̱l karo̱ na ne natoon Itsi aMusa.

¹⁴kamok yir tú ku fok yir a tá sen fe̱ ye aYeso afu Nazaret tà yirik karo̱ na ne a shishing igo̱o̱n iya aMusa tin bo̱so̱p yir'e.”

¹⁵Koangan afe a tá se azong ti sak anyisi natoon kaye̱e̱r áfe kusonong ame Itifanus, ne á di kanyisi wu tá te kyo̱ndi kanyisi amaleka.