Read izere Itomong Ámanzo 8 Bible Online

Itomong Ámanzo 8 - izere bible

Itomong Ámanzo 8

¹Ashawulu se azong, a kuus kama kufe̱r Itifanus. Katuk'ong, a tabak áfikuus dide̱ng kaye̱e̱r aUshalima, ma cice̱r á te shaam, ákak be niben aYahudiya ne ákak be niben aSamariya, ámanzo tsek ne á tú ku won

²Ayong áfikuus áka ne á ne̱r Itifanus ne á nye riyo̱m riku wu dide̱ng.

³Amma Ashawulu ya kasho̱o̱n be kutabak áfikuus dide̱ng. A tsang a kar kaye̱e̱r koakye kasa ne a turung atek be ányining ne a ka tes ba nitso̱m.

⁴To̱, áfikuus aya a tá te shaam tsang á nye awazi rife̱ Adakunom koake̱ ne ba tseng.

⁵aFilibus tseng kaye̱e̱r kuwo̱p aSamariya a tá nye awazi itak natoon aKiristi azong.

⁶Nizen iya ánerawe'me tá fok ne á di ike̱re̱ azhing iya a ta nye nanyisi ba, yong cice̱r ba kuto̱ro̱ng ba tú ku bun azong.

⁷Amma amaan nabik yiir itang ikun ne á wuruk kaye̱e̱r iro̱m ánerawe whe̱re̱, áner aya a tá we̱ abas azining be ákun whe̱re̱ te atser.

⁸Iyong sak ánerawe whe̱re̱ nye riye̱ rikan dide̱ng kaye̱e̱r aSamariya.

⁹Aner akak tú kuse riyerek wu aSaminu na aSamariya'me. A tsang a nye ike̱re̱ azhing ma koangan kaye̱e̱r aSamariya te zhing be ike̱ng iya a tá nye. A tsor kafok ye wu nye akak'e.

¹⁰Inoon be ásho̱n ne koangan anerawe ti sak riye̱ ni ike̱ng iya a tá nye ne á fe̱ ye, “Aner na be agbang kukyem kaya a tana kyem a yis ye Kukyem Kuyiik'e.”

¹¹Ánerawe kuus rife̱ wu kamok an baan ne a ka no̱o̱k ba azhing be kuri ike̱re̱ azhing iya a tan me̱ ne a nye.

¹²Amma izen iya ánerawe tin no̱o̱k katsak na awazi aFilibus, ne rife̱ wu natoon rigwo̱m Adakunom be riyerek aYeso Kiristi, yong a tú ku nye ba abatisma cice̱r atek be ányining.

¹³aSiman be rice wu ti no̱o̱k katsak natoon rife̱'me yong a tú nye abatisma. Ne a kuus aFilibus koake̱, a te zhing be ike̱re̱ azhing ife wu tá di aFilibus tá nye.

¹⁴Nizen iya ámanzo aya a tá se na aUshalima tá fok ye áner aSamariya shan rife̱ Adakunom, yong a tú ku tom ba aBitrus be aYohana.

¹⁵Nizen iya ne aBitrus be aYohana tá no̱ na aSamariya, ne a nye áfikuus aduwa nong a ta se̱ Kabik Kazhe̱l'e.

¹⁶Kamok ákak ba tsang a se̱ Kabik Kazhe̱l'e nizen iyong nizham baꞌ, a tsang a ku nye ba abatisma kaye̱e̱r riyerek aYeso mama tsek.

¹⁷Iyong aBitrus be aYohana be̱ a ti saas ibo̱k natoon ace ba nong a tá ka shining ba be Kabik Kazhe̱l'e.

¹⁸Nizen iya aSaminu tá di a tú ku shining be Kabik kamok ámanzo ti saas ibo̱k nace ba, yong a tú ku no̱o̱k ba itso̱m

¹⁹a tá fe̱ be ba ye, “Ni nang yin kukyem kuri kuyu gip nong ase̱ ke mi tin sak kubo̱k natoon aner akak ne a se̱ Kabik Kazhe̱l'e.”

²⁰Amma aBitrus fe̱ be wu ye, “Won wan be itso̱m wan tu wei yin, wan ta di ye wan ta kyem i shan kunang Adakunom be itso̱m.

²¹Wan ti se kaye̱e̱r áfe itomong na baꞌ, kamok riye̱ wan se gye̱r nasho̱o̱n Adakunom baꞌ.

²²Shishing kaye̱e̱r amaan kuse wan ne i ta nye aduwa be Agwo̱m Ágwo̱m, kashim a ta ka re̱ng rine̱n amaan kuto̱ro̱ng wan ta be kaye̱e̱r riye̱ wan.

²³Kamok mi di wan n shishing rishishim dide̱ng, ma rine̱n ma ka rosom.”

²⁴Ayong aSiman'me fe̱ ye, “Ni nye aduwa nong ike̱re̱ wan tá fe̱ tin se̱ ba'.”

²⁵Nama aBitrus be aYohana tá fe̱ rife̱ ne á nye awazi rife̱ Agwo̱m Ágwo̱m, yong á tú ku bun na aUshalima ne á tsang a nye awazi kaye̱e̱r iwo̱p izhizhe̱k'e ife aSamariya ikak.

²⁶A ta se sor ne amaleka fe̱ be aFilibus ye, “Dorok tá kuus kaye̱r nabas iren i tá wuruk na aUshalima ne i be na aGaza.”

²⁷Ayong aFilibus'e dorok a tá tseng ne a nyim be agbang aner Itopiya akak, aya a ta tsang akufo. A nye itomong be abining akak a tá nye agwo̱m, aKandis, wu ne a nye aner kusaas itso̱m agwo̱m'me. A be na aUshalima nong ta ya Adakunom iben.

²⁸Nizen a ta dorok a sen kubun kari nusonong natoon atso̱m kutseng itsaap wu tá ko̱k, a tá se be kufa kufumung Ishaya aner kuzarap.

²⁹Kabik fe̱ be aFilibus ye a ra tseng a ta se nyeseng bubarak be atso̱m kutseng itsaap tá ko̱k kya.

³⁰Ayong aFilibus serek bubarak be atso̱m'e ne a fok aner ame ta sen fa kufumung Ishaya aner kuzarap. Ne aFilibus ku ye, “Ayong wan se̱ rikpa ike̱ng iya wan ta fa'ong gye̱r a?”

³¹Ne wu a fe̱ ye, “Mi ta nye ane̱ ta se̱ rikpa'me e̱? Ma ke akak ti bo̱so̱p'e ko̱” Iyong a fe̱ be aFilibus ye a ra se sonong mak be wu.

³²Aritek ame tsang a sen fa karo̱ kaya ka ta fe̱ ye, “A tú ku ko̱k kyo̱ndi a ta ko̱k itsamang a ta ni itse̱e̱r A tseng gbik kyo̱ndi kaba turuk kaya áfe a kor ta ban ikor'e.

³³A nyeen be wu ma a tú ku ron katsak. Angan ta kyem a fe̱ natoon kuri wu e̱? Kamok a tú ku kam be kutser wu nazatse.”

³⁴Ayong aritek ame fe̱ aFilibus ye, “Ni tak, aner kuzarap na nife̱ natoon angan e̱? A ti fe̱ natoon rice wu a? Ka a ti fe̱ natoon akak ze̱e̱r e̱?”

³⁵Ayong aFilibus san ku kutaas rife̱ riya ri ta se kaye̱e̱r kufumung rife̱ Adakunom ne ku tak Rife̱ Ritek natoon aYeso.

³⁶Kaye̱e̱r kutseng, á be̱ ba naro̱ kakak ashi tú ku se ne aritek ame fe̱ be aFilibus'e ye, “Di ashi na, akye̱ ta roon ku ninye abatisma ame aze e̱?

³⁷Amma aFilibus fe̱ be wu ye, ‘Ke wan ti no̱o̱k katsak be riye̱ wan cei ne a ka nye abatisma ame.’ Aritek ame fe̱ ye, ‘Ei, mi no̱o̱k katsak ye aYeso Kiristi ne a nye Igon Adakunom.’ ”

³⁸Ayong aritek ame sak itsaap nyeseng, ne aFilibus tiik mak be wu a ta se no̱ kaye̱e̱r ashi'me ne aFilibus nye aner ame abatisma.

³⁹Kum be kuwuruk ba kaye̱e̱r ashi'me, ne Kabik Kazhe̱l wor a sok aFilibus'e nong a tá tseng'e, ne aritek ame ba ku di baꞌ. Ayong aritek'e tseng ako̱o̱n wu be riye̱ rikan.

⁴⁰Amma aFilibus ame se di rice wu na Azotus. Ayong a tsang a tseng ne a nye awazi Rife̱ Ritek kaye̱e̱r iwo̱p ikak cice̱r ma a tseng na aKaisariya.