Read izere aRom 1 Bible Online

aRom 1 - izere bible

aRom 1

¹Mi, aBulus i ta nye asam aYeso Kiristi, aya a tin yis nong tá te amanzo wu ne a ti kasa nong ta taas Rife̱ Ritek Adakunom.

²Rife̱ Ritek'e nye rife̱ Adakunom tá tsang a no̱o̱k kuto̱ be áner kuzarap kyo̱ndi á tá zibir kaye̱e̱r Afumung Azhe̱l'e.

³Rife̱ Ritek'e se natoon Igon wu aya a tá nye kuri aDauda nuro̱m.

⁴Kabik Kazhe̱l'e tonong kaye̱e̱r kukyem ye wu ne a nye Igon Adakunom kamok a tú ku dorok nure̱k be kutser. Wu ne a nye Agwo̱m Ágwo̱m yir aYeso Kiristi yir.

⁵Kamok wu ne riyerek wu ne yir ti se̱ yir ritek ne ku yis nong tá te ámanzo nong ta yis yir áya sang á ta nye aner aYahuda baꞌ cice̱r, nong á tin no̱o̱k katsak ne a kuus rife̱'me.

⁶Yin gip, yin ti se yin kaye̱e̱r áya a tá yis nong ta te yin áfe aYeso Kiristi.

⁷Mi ta zibir yin'e cice̱r yin aya ita se yin na aRom, yin áya Adakunom ta shim, a tá ka yis yin nong tà te yin ázhe̱l'e. Ritek be kameneng riye̱ riya ri ta nes nufe Adakunom a ta nye Ada yir ne Agwo̱m Ágwo̱m yir aYeso Kiristi se mak be yin.

⁸Ni ime̱se̱ng'e, mi be riye̱ rikan be Adakunom kaye̱e̱r riyerek aYeso Kiristi kamok yin cice̱r kamok ánerawe fe̱ itak kuno̱o̱k katsak yin koake̱ kaye̱e̱r kazatse.

⁹Adakunom aya mi tu ku nye itomong be riye̱ rizining kaye̱e̱r kutaas Rife̱ Ritek Igon wu aYeso, ren kuri aduwa mi ta yiir nye ne i yiring be yin.

¹⁰Koakye izen iya ne mi nye aduwa'me, mi nye aduwa ye Adakunom rin karak iren nong mi ta ma kyem i be̱ nufe yin mama.

¹¹A kun mi te ke mi n be̱ nufe yin nong ta be̱ sak yin ta se̱ yin kunang Adakunom kufe kabik nong ase̱ tin barang yin agap.

¹²Ike̱ng mi tin fe̱ natoon'e se ye nong mi be yin ta naka tsesek yir kaye̱e̱r kuno̱o̱k katsak yir.

¹³Ároneng, mi shim yin tu ren yin ye mi n shim kube̱ nufe yin gbugbang, amma ike̱re̱ ikak ti roon kube̱. Mi shim ta se̱ áfudang yin ákak ya tana rasak nabik kaye̱e̱r yin kyo̱ndi mi tá se̱ nufe áner aya sang a ta nye áner aYahuda baꞌ.

¹⁴Itomong kuse rice mi natoon áya a tan karak anyisi be áya a ta rusek nawhi ne áya a ta ren ike̱ng be áya a ta ren ike̱ng ikak baꞌ.

¹⁵Iyong ne i sak mi ta be ifeng ke i ka taas yin Rife̱ Ritek'e yin áfe i ta se yin na aRom gip.

¹⁶Mi fok isum kutaas Rife̱ Ritek aYeso baꞌ, kamok ri nye kukyem Adakunom nong a tin shesh koangan afe a tin no̱o̱k katsak, ni ime̱se̱ng'e nye rife áner aYahuda ne áner aya a ta nye áner aYahuda baꞌ, ni kuus.

¹⁷Kamok kaye̱e̱r'e ne a ti tonong iren ku te gye̱r nasho̱o̱n Adakunom, ku te gye̱r'e nye kuno̱o̱k katsak ni ime̱se̱ng'e ma nigang'e. Kyo̱ndi i ta se ni zibir ye, “Aner aya a ta se gye̱r nasho̱o̱n Adakunom [1] ta sor kaye̱e̱r kuno̱o̱k katsak.”

¹⁸Adakunom sen tonong riye̱ kubeseng wu ri ta ne naza natoon áya a ta zhe̱e̱sh Adakunom ne amaan kunye ánerawe áya a ta she̱re̱k katsak kaye̱e̱r amaan kunye ba.

¹⁹Kamok koakye ike̱ng iya a tana ren natoon Adakunom se kanang nufuba kamok Adakunom ne a tú ku tonong ba.

²⁰Kamok kuse Adakunom kuya sang a ta kyem a di be anyisi baꞌ, nye kukyem kufe izen izen ne kuse wu ku ta tonong ye wu nye Adakunom, amma kum nizen iya a ta nye kazatse a tú ku tonong ba kanang kaye̱e̱r ike̱re̱ a tá nye nong fan akak bu se̱ ike̱ng iya a tanin fe̱ kanu natoon'e.

²¹Ba ren Adakunom gye̱r tatan, á ra ku tiyiik kamok a ta nye Adakunom ka á tonong riye̱ rikan ba baꞌ. Amma kuto̱ro̱ng ba se kpe̱de̱ng'e ingya, ne a te titak kaye̱e̱r aye̱ ba.

²²Ba sor ye ba be ritseng, amma á nye áfunam'e.

²³Nikum ke ba ya Adakunom ayiik'e aya sang a ta ku baꞌ iben, amma ba bun a shishing áya ike̱re̱ iya ba tá nye i ta tas ánerawe aya a tana ku, be ike̱re̱ itsi kyo̱ndi nanon ne ikewum be ike̱re̱ iya i ta wo̱k be kafa.

²⁴Kamok anong, Adakunom tú won ba nong á tá nye ike̱re̱ imaan'e iya aye̱ ba tá shim, yong á kok iro̱m ba a tin nye ike̱re̱ isum.

²⁵Á shishing katsak Adakunom be abo̱o̱s. Á ya ike̱re̱ iya a tá nye iben ma á ku nye ba itomong nikum ke a nye aya a tá nye koakye ike̱ng'e, wu afe a ta kyem a tana ku kerek ma izen izen, anong!

²⁶Kamok anong, Adakunom tú ku won ba nong á tá kuus ike̱re̱ isum iya aye̱ ba tá shim. Ányining nye rikuna be ányining áfudang ba, anong ne Adakunom nye baꞌ.

²⁷Anong ne, átek wosong ányining nong a ta no̱ nikuus átek áfudang ba. Átek nye ike̱re̱ isum be átek áfudang ba, kamok anong a tú ku no̱o̱k ba risam ri ta se te̱re̱ be ike̱re̱ imaan'e ife ba tá nye.

²⁸Kum ánerawe'me ta gaar kushan Adakunom, Adakunom tú ku won ba kaye̱e̱r amaan kuto̱ro̱ng ba yong a ma tsang a nye ike̱re̱ iya i tá taas ke ba nye baꞌ.

²⁹An shining be iriri ike̱re̱ iya i ta se gye̱r nasho̱o̱n Adakunom baꞌ, be rikpe̱ ne kudi ike̱ng ne amaan kuto̱ro̱ng. Igak ku naka shishim be ku naka fe̱s be kuren ne ku naka wo̱ro̱k be amaan kunye. Ba te áfe imok,

³⁰ne á fe̱ me̱r be akak. Á di Adakunom kye̱re̱ ne á shonong ne á kok rice naza ne á naka tiyiik. Á gung rice nong á tá nye anyas, á gaar kufok rife̱ átek ba.

³¹Á be kuto̱ro̱ng baꞌ, á fe̱ rife̱ a shishing baꞌ, á shim akak baꞌ, á be kuro̱ riye̱ baꞌ.

³²A ren Itsi Adakunom iya i ta fe̱ ye a ra fe̱s áner aya a ta nye ike̱re̱ kuri iyu gye̱rtatan, amma á nye ike̱re̱ kuri iyong'e tsek baꞌ, amma á kuus kama áya a ta nye anong.