Read izere aRom 13 Bible Online

aRom 13 - izere bible

aRom 13

¹Koangan ra kuus ike̱ng iya rigwo̱m iben ta fe̱ ye a ra nye dim kamok akak ta kyem a te ako̱k kasho̱o̱n baꞌ, sang ke Adakunom ne a tu ku no̱o̱k baꞌ. Áko̱k kasho̱o̱n afe yir ta be yir cice̱r Adakunom ne a tu no̱o̱k.

²Kamok anong, koangan ne a ko̱n be áko̱k kasho̱o̱n, a ko̱n be ike̱ng iya Adakunom ta sak. Áner aya a ta nye anong yis amok Adakunom natoon rice ba.

³Kamok aner aya a ta tseng gye̱r ta fok inyim rigwo̱m baꞌ, ma ke aya a ta tseng gye̱r baꞌ. Wan shim ta di riye̱ kubeseng áko̱k kasho̱o̱n baꞌ a? To̱, nye ike̱ng iya i ta se gye̱r.

⁴Kamok wu nye asam Adakunom nong a ta ka tobok yin gye̱r. Amma ke wan nye aner kunye imaan'e, to̱, ne wan fok inyim, kamok sang ishe̱n rigwo̱m'e se nubo̱k wu kpe̱de̱ng tsek baꞌ. Áko̱k kasho̱o̱n nye asam Adakunom, aya a tana tonong riye̱ kubeseng Adakunom nizen a tana whereng áner aya a ta nye imaan'e.

⁵Kamok anong, i se gye̱r ta kuus yin ike̱ng iya rigwo̱m iben ta fe̱, sang kamok ba tana ka to̱ yin amok tsek baꞌ, amma kamok nong kuto̱ro̱ng aye̱ yin ta se gye̱r.

⁶Ike̱ng iya i ta sak yin ta karang yin itso̱m iben, kamok áko̱k kasho̱o̱n nye ásam Adakunom áya a ta no̱o̱k izen ba kamok itomong kube ánerawe.

⁷Karang yin koangan ike̱ng iya a ta ka kuus yin. Ke a ta kuus yin koakye kuri itso̱m iben ne i karang, ke itso̱m ares yin ne yin karang yin. Fok yin inyim aya a ta tas ke a fok inyim wu, ne i tiyiik yin aya a ta tas ke a ku tiyiik.

⁸Sang tu yiir yin ike̱ng akak baꞌ, amma yiir naka shim yin inga kamok aner aya a ta shim afudang shining ike̱ng iya Itsi ta fe̱.

⁹Kamok Itsi fe̱ ye, “Sang tu nye rikuna baꞌ, Sang tu fe̱r akak baꞌ, Sang tu nye itsang baꞌ, Sang tu be rinyisi rikan baꞌ,” be ribir ike̱re̱ ikak Itsi ta roon'e, a ta kyem a gung cice̱r a ta fe̱ ye, “Shim afegbak wan kyo̱ndi wan ta shim rice wan.”

¹⁰Ke wan shim afegbak wan, wan tu ku nye anyas baꞌ. Kamok anong, ke wan shim afegbak wan ne i nye ye wan nye koakye ike̱ng Itsi ta fe̱.

¹¹To̱, kuus yin ike̱re̱ na kamok yin ren yin kuri izen afe yir tin se yir. Izen n nye ife yin tana shiming yin nida, kamok izen kashesh yir n be̱ bubarak kyo̱o̱rna nar nizen iya yir tin no̱o̱k yir katsak ni ime̱se̱ng'e.

¹²Katuk m be̱ barak ka ta gor, kadiding n be̱ barak ka ta karak. Kamok anong, i wobok yir amaan kunye afurin nukim ne i te yir ike̱re̱ itsom ife akanang.

¹³Won i tu sor yir kusor kutek kuya ku tana tonong ye yir nye yir aya a ta se kaye̱e̱r akanang, sang ku so̱ iriri ike̱re̱ ne a feng baꞌ, ne a gung rice nong á ta nye ike̱re̱ isum ka ku nye kukpe̱de̱ng'e ne rikuna baꞌ. I tu ko̱ro̱ng yin ka tin no̱ yin kaye̱e̱r rishishim baꞌ.

¹⁴Amma i ban i naka kis yin be aYeso Kiristi Agwo̱m Ágwo̱m yir, sang i tu kuus yin amaan kuse rinerawe baꞌ.