Read izere aRom 14 Bible Online

aRom 14 - izere bible

aRom 14

¹Shan yin aner aya sang kuno̱o̱k katsak wu tan kpa agap baꞌ, amma tu ku tser yin be rine̱n ike̱ng ikak ke kuto̱ro̱ng wu se ze̱e̱r be kufe yin baꞌ.

²Kuno̱o̱k katsak akak, tu ku won a ta ya koakye ike̱ng wu ta se̱, amma aner aya kuno̱o̱k katsak wu ta be̱ agap baꞌ, ya awan rikon tsek.

³Aner aya a ta kyem a ya koakye kuri naya afe wu ta shim, a tu zhe̱e̱sh aner aya a ta won dar a kyem a ya koakye kuri baꞌ. Anong ne aner aya a ta won dar aya koakye kuri naya tu di rine̱n aner aya a ta ya koakye kuri naya baꞌ, kamok Adakunom mu ku shan.

⁴Wan nye angan tana to̱ asam akak amok e̱? Asam'me tu nye itomong itek, ka a tu won dar a nye, iyong nye itomong atekasa wu. A tà nye itomong itek kamok Agwo̱m Ágwo̱m tu ku se̱ mo a ta nye itomong'e.

⁵Akak sok kunom kukak yiik ye ku nar ribir'e. Ne akak sok ye inom'e cei se kuri kuzining. Koangan ra sok be agap kaye̱e̱r riye̱ wu ye ike̱ng iya wu ta nye, nye katsak.

⁶Koangan afe a ta sok kunom kukak yiik ye ku nar ribir'e nye anong nong a tin tiyiik Agwo̱m Ágwo̱m wu. Koangan afe a ta ya koakye kuri rinam nye anong nong a tin tiyiik Agwo̱m Ágwo̱m wu. Kamok nong a tin tonong riye̱ rikan be Adakunom be rinam'e. Aner aya a ta ya koakye kuri rinam baꞌ, nye anong gip nong a tin tiyiik Agwo̱m Ágwo̱m wu kamok nong a tin tonong riye̱ rikan wu be Adakunom.

⁷Kaye̱e̱r yir, akak sor kamok rice wu baꞌ. Sang akak yir ku kamok rice wu baꞌ.

⁸Ke yir sor yir be kutser, to̱, i sor yir kamok Agwo̱m Ágwo̱m, ke i kus yir, to̱, i kus yir kamok Agwo̱m Ágwo̱m. Kamok anong, yir tu sor yir be kutser ka i tu kus yir, yir nye yir afe Agwo̱m Ágwo̱m.

⁹aKiristi ku a ta bun a dorok be kutser nong a ta sor Agwo̱m Ágwo̱m áfe aya a tan kus ne áya a ta nye atser.

¹⁰Wan ne̱? Akye̱ sak wan to̱ afudang wan amok e̱? Ka akye̱ sak wan zhe̱e̱sh afudang wan e̱? Yir cice̱r tà nyeseng yir nasho̱o̱n itsik rigwo̱m Adakunom.

¹¹Kamok i se ni izibir ye, “Agwo̱m Ágwo̱m fe̱ ye, ‘Mi shu ye, koangan ta tigbok akuur nasho̱o̱n'i, koangan ta fe̱ be kanu wu ye mi ne i nye Adakunom.’ ”

¹²Kamok anong, koangan yir ta tak ike̱ng iya wu tá nye nasho̱o̱n Adakunom.

¹³Kamok anong, tu naka to̱ yir amok baꞌ. Koangan ra sok kaye̱e̱r riye̱ wu ye sang wu ta sor ike̱ng iya i tana sak akak tanin turuk kutak ka a tin kpa baꞌ.

¹⁴Mi ren, mi bun i no̱o̱k katsak na Agwo̱m Ágwo̱m yir aYeso ye naya nakak kuse na ta won dar na se zhe̱l be kunik wu baꞌ. Amma ke akak ra di ye ike̱ng ikak se zhe̱l baꞌ, to̱, nufu ne i se zhe̱l baꞌ.

¹⁵Ke ike̱ng iya wan ta ya beseng afudang wan riye̱, to̱, i nye ye wan tu ku tonong kushim baꞌ. Sang tu won naya wan ta ya ta sor iren i tana beseng afudang wan, aya aKiristi ta ku kamok wu baꞌ.

¹⁶Sang tu won ike̱ng i ta se gye̱r nasho̱o̱n wan, ta sor ike̱ng iya a tanin fe̱ imaan'e natoon'e baꞌ.

¹⁷Kamok itak rigwo̱m Adakunom nye itak kuya ne a so̱ baꞌ, amma itak kuse gye̱r nasho̱o̱n Adakunom ne kusor caang be riye̱ rikan kaye̱e̱r Kabik Kazhe̱l'e.

¹⁸Koangan afe a ta nye aKiristi itomong niren iyong, wu ne a kare̱p Adakunom riye̱, ne ánerawe shim anong gip.

¹⁹Kamok anong, won i tu nye yir koakye ike̱ng i tana kyem i nye yir i tana be̱e̱n kusor caang be anong i tana ka tsesek yir.

²⁰Sang i tu beseng yin itomong Adakunom kamok itak naya baꞌ. Koakye kuri naya se zhe̱l, amma i se gye̱r anerawe ta ya ike̱ng i tana sak afudang wu tanin turuk kutak baꞌ.

²¹I nar ta gaar kuya rinam ka kuso̱ ashi anap, ka ta nye ike̱ng ikak i tana sak afudang wu tana kpa.

²²Kamok anong, won kuto̱ro̱ng wan tin be natoon ike̱re̱ na tu se wan be Adakunom wan tsek. Aner riye̱ rikan ne a nye aner aya a tin be riye̱ gak natoon ike̱ng iya riye̱ wu tú ku no̱o̱k ye a ra nye baꞌ.

²³Amma aner aya a tin be agak riye̱ natoon ike̱ng iya wu ta sen ya'me, nye rine̱n nasho̱o̱n Adakunom kamok a tin no̱o̱k katsak natoon ike̱ng'e baꞌ. Koakye ike̱ng iya sang i ti fereng natoon kuno̱o̱k katsak baꞌ, nye rine̱n.