Read izere aRom 15 Bible Online

aRom 15 - izere bible

aRom 15

¹Yir afe kuno̱o̱k katsak yir ta be agap won i tu tobok yir aya a ta be agap nabik baꞌ, sang i tu nye yir ike̱re̱ iya i tin se yir gye̱r tsek baꞌ.

²Won koangan kaye̱e̱r yir tu kare̱p afegbak wu riye̱ kamok i se gye̱r anong be wu ne i ku barang mo agap kaye̱e̱r kuno̱o̱k katsak.

³Kamok aKiristi be rice wu gip, a naka kare̱p riye̱ baꞌ. Kyo̱ndi i ta se ni izibir ye, “Ritok ákak ta ka kas ti bun ni mi.”

⁴Koakye ike̱ng iya a tá zibir gbugbang, a zibir nong a tin bo̱so̱p yir'e, nong ase̱ rife̱ Adakunom tin bo̱so̱p yir kutsesek nong ta se̱ yir ike̱ng tanin te yir riye̱.

⁵Won Adakunom aya a ta nyesek kutsesek ta ka tsesek yin ne a ka no̱o̱k yin kuto̱ro̱ng kuri kuzining kyo̱ndi aYeso aKiristi.

⁶Be anong ne yin ta tiyiik yin Adakunom a ta nye Ada aYeso Kiristi Agwo̱m Ágwo̱m yir be riye̱ rizining ne kanu kazining.

⁷Naka yiir yin ibo̱k ifa kyo̱ndi aKiristi ta ka yiir yin nong ase̱ Adakunom ta se̱ nakerek.

⁸Kamok mi sen ka tak yin ye ike̱ng i ta sak aKiristi tá aner aya a tá nye áner aYahuda itomong, se nong a tá tonong katsak rife̱ Adakunom, nong ase̱ ike̱ng iya Adakunom tá fe̱ ye a tá nye gbugbang be átukop yir, ta shining

⁹nong áya sang á tá nye áner aYahuda baꞌ, ta kerek Adakunom kamok kuro̱ riye̱ wu. Kyo̱ndi i ta se ni izibir ye, “Kamok anong, mi tà ka kerek kaye̱e̱r áya sang á ta nye áner aYahuda baꞌ, mi tà bom abom tin kerek riyerek wan.”

¹⁰Rife̱ Adakunom bun rife̱ gbak ye, “Yin áya sang i ta nye yin áner aYahuda baꞌ, nye yin riye̱ rikan mak be áner Adakunom.”

¹¹Ri bun ri fe̱ gbak ye, “Kerek yin Agwo̱m Ágwo̱m, Yin áya sang i ta nye yin áner aYahuda baꞌ cice̱r. yin ánerawe cice̱r ku kerek yin.”

¹²Ishaya bun a fe̱ gbak ye, “Akak kaye̱e̱r kuri aZhese ta wuruk, a ta dorok a tin nye rigwo̱m natoon áya sang á ta nye áner aYahuda baꞌ, ne áya sang á ta nye áner aYahuda baꞌ, tin te riye̱ ni wu.”

¹³Won Adakunom aya a ta nyesek ánerawe kute riye̱ ta ka shining yin be riye̱ rikan ne kusor caang kamok yin tin no̱o̱k yin katsak ni wu. Be anong ne yin shining yin dide̱ng be ku ni te riye̱ kamok kukyem Kabik Kazhe̱l'e.

¹⁴Ároneng, mi be rice mi ren ye yin be rice yin, yin be yin kuse kutek dide̱ng ne i ren yin ike̱ng dide̱ng ma i kyem i naka bo̱so̱p yin'e.

¹⁵Mi ma ka zibir yin ike̱re̱ ikak de̱s nong ta bun ta ka yiring yin'e gbak. Mi nye anong kamok ritek Adakunom tin no̱o̱k,

¹⁶nong ta te aner itomong aYeso Kiristi nufe áya sang á ta nye áner aYahuda baꞌ. Mi nye itomong ritsi i ta taas Rife̱ Ritek Adakunom, nong aya sang a ta nye áner aYahuda baꞌ, ta sor asidaka Adakunom tana shan, áya Kabik Kazhe̱l'e tu ku sak ba á ta te zhe̱l.

¹⁷Kamok anong ne mi ya kuka kaye̱e̱r aYeso Kiristi kamok itomong'i nasho̱o̱n Adakunom.

¹⁸Mi ta kyem i nye riye̱ ritser nong tin fe̱ ike̱ng ikak natoon'e baꞌ, ma ke ike̱ng iya aKiristi tin sak mi tan nye. Ike̱ng mi ta nye'me nye mi ta be̱e̱n áya sang á ta nye áner aYahuda baꞌ, ta kuus Adakunom kamok rife̱ mi be kunye mi,

¹⁹kaye̱e̱r kukyem kunye ike̱re̱ azhing ne itomong azhing, kaye̱e̱r kukyem Kabik. Kum a ta san'e na aUshalima ma a gorok'e ma na Ilirikum, mi taas Rife̱ Ritek natoon aKiristi cei.

²⁰Koakye izen mi shim ke mi se taas Rife̱ Ritek naro̱ kaya sang a ta ren aKiristi baꞌ, nong fan i bu se kyo̱ndi mi bun i sen no̱k natoon ribor akak.

²¹Kyo̱ndi i ta se ni izibir, “Áya á tu ku tak ba itak wu baꞌ, tu ku di, áya a ta kun ku fok baꞌ, tu ku ren.”

²²Ike̱ng iya i ta sak a ta yiir ku ni roon kube̱ nufe yin'ong.

²³Kyo̱o̱rna mi n gang itomong'i kaye̱e̱r kaben na nama aye̱ whe̱re̱ mi n shim ku be̱ nufe yin.

²⁴Mi se be kanye̱k kutseng na Abaniya, ke mi tseng, mi ta gor na aRom. Nama mi ra kusor be yin cie̱k, ne yin min tobok yin nong ta weer.

²⁵Amma kyo̱o̱rna, mi se niren ku be na aUshalima nong ta se no̱o̱k ázhe̱l'e áfe Adakunom kutom ba.

²⁶Afikuus á ta se na aMakidoniya ne áfe Akaya nye riye̱ rikan nong a ta tusung ike̱re̱ a tana no̱o̱k ázhe̱l'e áfe Adakunom áfe a ta se na aUshalima áya a ta be ike̱ng ikak baꞌ.

²⁷A nye riye̱ rikan nong á ta nye anong, i sor itomong ba a tana nye dim. Ke i nye ye áner aYahuda tin se̱ áner aya sang a ta nye áner aYahuda baꞌ nike̱re̱ kabik, i se gye̱r ke ba min se̱ áner aYahuda nike̱re̱ ife kuro̱m.

²⁸Ke mi gang itomong na, mi di kutom na no̱ nubo̱k ba dim, mi ta tseng na Abaniya, amma ta tire̱e̱r nufe yin.

²⁹Mi ren nizen iya mi tana be̱ nufe yin, mi tà be̱ be agbang ritek Kiristi.

³⁰Ároneng, mi ta nye yin izong kaye̱e̱r riyerek aYeso aKiristi Agwo̱m Ágwo̱m yir, ye i ra gung yin rice be mi kaye̱e̱r kucan'i ne i nye yin aduwa kamok'i. Nye yin anong kamok kushim yin kuya Kabik Kazhe̱l'e ta ka no̱o̱k yin.

³¹Nye yin aduwa nong mi tà whe̱r nubo̱k áya a ta se na aYahuda á ta nye áfurin. Nye yin aduwa gbak ye áfikuus á ta se azong ta shan ike̱ng iya mi ta be ni kuno̱o̱k ba,

³²nong ase̱ ke Adakunom shim, mi ta be̱ nufe yin be riye̱ rikan ne i be̱ song mak be yin.

³³Won Adakunom aya a ta nyesek kameneng riye̱ tuse mak be yin cice̱r. Anong!