Read izere aRom 2 Bible Online

aRom 2 - izere bible

aRom 2

¹Kamok anong, wan be ike̱ng kufe̱ baꞌ, wan afe i ta to̱ akak amok. Be ike̱ng ife wan tin to̱ akak amok'e, wan naka to̱ amok'ong kamok wan nye ike̱re̱'ong.

²Yir ren yir ye amok Adakunom tà to̱ aner aya a ta nye ike̱re̱ kuri iyong se gye̱r.

³Kamok anong ke wan afe i ta nye anerawe tsek, wan to̱ akak amok natoon ike̱re̱ iya wu tá nye, amma ne wan nye ike̱re̱'ong, wan di ye wan tà wher amok Adakunom a?

⁴Ka wan zhe̱e̱sh agbang ritek Adakunom be kutsesek wu ne kuse whiwhe̱ wu e̱? Wan ren ye ritek Adakunom tá sak wan tá shishing kuse wan aꞌa?

⁵Amma kamok kushonong wan i ta gaar kushishing kuse wan, wan naka tusung amok Adakunom natoon rice wan ma katuk riye̱ kubeseng Adakunom, nizen iya a tana to̱ kazatse amok kaye̱e̱r katsak.

⁶Adakunom tà no̱o̱k “Koangan ishorong wu te̱re̱ be ike̱ng iya a tá nye.”

⁷Áner áya a ta tsesek kaye̱e̱r kunye ike̱re̱ itek nong a ta se̱ nakerek be kuyiik ne kutser kufe izen izen, ba ne Adakunom tà ka no̱o̱k ba ishorong kutser kufe izen izen.

⁸Amma áya a ta shim rice ne á gaar katsak ne á nye amaan kunye, a tù ku karang ba be riye̱ kubeseng ne riye̱ riwe.

⁹Koangan afe a ta nye ike̱re̱ imaan'e, a tà so̱ risam ne a fok kuro̱'me, a ta san'e be áner aYahuda ne áya sang á ta nye áner aYahuda baꞌ, ni kuus.

¹⁰Amma koangan afe a tá nye ike̱re̱ itek, Adakunom tù ku no̱o̱k kuyiik be nakerek ne kameneng riye̱. A tà san'e be áner aYahuda ne áya sang á ta nye áner aYahuda baꞌ nikuus.

¹¹Kamok Adakunom daam ka wan nye angan e̱ baꞌ.

¹²Koangan afe a tá nye rine̱n kamok sang a ta ren Itsi aMusa baꞌ, a tà wei sang be Itsi'me baꞌ, amma afe a ta nye rine̱n ne a ren Itsi aMusa'me a tù ku to̱ amok be Itsi'me.

¹³Sang áya a foos Itsi ne a se gye̱r nasho̱o̱n Adakunom baꞌ, amma áya a ta kuus ike̱ng iya Itsi'me tá fe̱, ne a se gye̱r nasho̱o̱n Adakunom.

¹⁴(Katsak'e, ke aner aya sang a ta nye áner aYahuda baꞌ, be Itsi baꞌ, gip be anong nizen ikak a nye ike̱re̱ iya Itsi ta fe̱ ye a ra nye kyo̱ndi kuto̱ro̱ng ba tú ku no̱o̱k ba. Iyong tonong ye ba áya a tá sor dar Itsi te Itsi be rice ba.

¹⁵Kunye ba tonong ye ike̱re̱ Itsi tá fe̱ ye a ra nye se kaye̱e̱r ba, kuto̱ro̱ng aye̱ ba tonong anong gip. Kamok izen ikak kuto̱ro̱ng aye̱'me tonong ye ba taam, nizen ikak ne i ku tonong ba ye ba taam baꞌ.)

¹⁶Anong ne i bu se katuk Adakunom tana sak aYeso tana to̱ ike̱re̱ iya anerawe ta ne̱r kaye̱e̱r riye̱ amok, kyo̱ndi mi ta fe̱ kaye̱e̱r Rife̱ Ritek mi tá ka taas yin.

¹⁷To̱, wan afe i ta fe̱ ye wan nye áner aYahuda, wan ti fereng natoon Itsi ne i ni itsor kafok ye wan ren Adakunom,

¹⁸ne i fe̱ ye wan ren ike̱ng iya Adakunom ta shim ne i ren ike̱ng iya i ta nar kuse gye̱r kamok a tá ka bo̱so̱p'e ye Itsi fe̱ anong.

¹⁹Wan ren gye̱r ye wan ne i ta ko̱k akpato̱o̱n kuse̱ ne i sor akanang nufe áner aya a ta sor kaye̱e̱r awhi,

²⁰ne i bo̱so̱p azizik'e ike̱re̱ ne i bo̱so̱p azhizhe̱k'e gip, kamok Itsi ta bo̱so̱p ike̱re̱ cei ne i ka tonong katsak'e.

²¹To̱, wan afe i ta bo̱so̱p ánerawe'me, wan naka bo̱so̱p e̱ a? Wan afe i ta taas ye, rife̱ Adakunom roon itsang, wan nye itsang aꞌa?

²²Wan afe i ta fe̱ ye, sang a tu nye rikuna baꞌ, wan nye aꞌa? Wan afe i ta di ike̱re̱ itsi kye̱re̱ wan nye itsang naro̱ itsi aꞌa?

²³Wan afe i ta tsor kafok be Itsi aMusa, wan zhe̱e̱sh Adakunom nizen iya wan ta gaar kukuus Itsi'me aꞌa?

²⁴Kyo̱ndi i ta se ni izibir ye, “Kamok yin áner aYahuda ne áya sang á ta nye áner aYahuda baꞌ, zhe̱e̱sh riyerek Adakunom.”

²⁵Izhak a ta ka nye'me se gye̱r ke wan kuus Itsi'me. Ke wan kuus ike̱ng iya Itsi ta fe̱ baꞌ, wan se tite̱re̱ be aner aya a tu ku nye izhak baꞌ.

²⁶Ke áner aya sang á tú ku nye ba izhak baꞌ, kuus ike̱ng iya Itsi aMusa ta fe̱, aser, a tu ku di ba tite̱re̱'e be áner aya a tá ká nye ba izhak aꞌa?

²⁷Aner aya a tú ku nye izhak baꞌ, amma ne a kuus Itsi'me gye̱r, wu tà ka to̱ amok, wan afe i ta ren Itsi i tan nye izhak gye̱rtatan i ra kuus ike̱ng iya Itsi'me ta fe̱ baꞌ.

²⁸Aner aYahuda afe katsak nye aner aya a tu ku nye izhak nuro̱m tsek baꞌ. Izhak ife katsak ne i nye izhak iya a ta tse̱e̱r aner tsek baꞌ.

²⁹Aner aYahuda afe katsak ne a nye aya a ta nye áner aYahuda kaye̱e̱r riye̱ wu, izhak ife katsak nye izhak ife Kabik ta nye kaye̱e̱r riye̱, sang ife Itsi aMusa baꞌ. Adakunom ne a kerek aner kuri ayong sang anerawe baꞌ.