Read izere aRom 3 Bible Online

aRom 3 - izere bible

aRom 3

¹To̱, akye̱ ne wan tà se̱ ke wan fe̱ ye wan nye áner aYahuda. Izhak tà ka barang mo akye̱ e̱?

²Ei katsak'e, á nar ribir'e nike̱re̱ dide̱ng. Ni ime̱se̱ng'e Adakunom tú no̱o̱k ba rife̱ wu.

³Amma, ke ákak ba ti no̱o̱k katsak baꞌ, ne̱? Ku won dar kuno̱o̱k katsak ba tà sak katsak Adakunom ta te kpe̱de̱ng a?

⁴Ko cie̱k, i se anong baꞌ. Adakunom ne a nye afe katsak dim; ánerawe be abo̱o̱s. Kyo̱ndi i ta se kaye̱e̱r izibir ye, “Nong ase̱ a ta ren ye, wan be katsak ke wan fe̱ kanu Ne wan tonong kanang ye wan nye aner katsak nizen iya a ta sen ka to̱ amok.”

⁵Ke amaan kunye yir tonong kanang ye Adakunom nye gye̱r, ne i fe̱ yir ane̱ e̱? Ta fe̱ yir ye Adakunom nye gye̱r baꞌ, a tin tonong yir riye̱ kubeseng wu a? (Mi ma fe̱ kuri rife̱ rinerawe tsek.)

⁶Ko cie̱k, i se anong baꞌ. Ke i se anong, to̱, Adakunom ta nye ane̱ a ta to̱ kazatse amok e̱?

⁷Ke kudun katsak'i tà sak katsak Adakunom tà wuruk kanang ne i tonong kuyiik Adakunom dide̱ng, to̱, akye̱ sak a tin te̱n amok ye mi nye afe rine̱n e̱?

⁸Ke i se anong, to̱, ne “I ya yir kasho̱o̱n be amaan kunye nong ase̱ ritek tà be̱ a?” Ákak tin bo̱s yir abo̱o̱s ye yir fe̱ yir anong. Amok Adakunom tana to̱ áner kuri ayong, tin kyem niba.

⁹Iyong yir ta fe̱ yir ane̱ makong e̱? Ka yir áner aYahuda yir nar yir ribir ánerawe a? Ko cie̱k. Yir n tonong yir ye áner aYahuda be áya sang á ta nye áner aYahuda baꞌ, cice̱r a se kaye̱e̱r kukyem rine̱n.

¹⁰Kyo̱ndi i ta se kaye̱e̱r izibir ye, “Akak kuse a ta se gye̱r nasho̱o̱n Adakunom baꞌ, ko azining.

¹¹Akak kuse a ta se̱ rikpa'me baꞌ, akak kuse a ta tse̱r Adakunom baꞌ.

¹²Koangan n kirik Adakunom kama, an te akpe̱de̱ng'e. Akak kuse a ta nye ike̱ng itek baꞌ, ko azining.

¹³Nanu ba se kyo̱ndi are̱k a ta se kuye̱, nanu ba n me̱ be abo̱o̱s. Írem ba turung amaan rife̱ kyo̱ndi nado̱m iwhen.

¹⁴Ame̱r be ritok ne a wuruk ni nanu ba.

¹⁵A ti gor kon nyosong naso̱k.

¹⁶Koake̱ ne ba gor rimaan'e be riye̱ riwe ka kuus ba.

¹⁷Á ren iren kusor caang baꞌ.

¹⁸Inyim Adakunom kuse naye̱ ba cie̱k baꞌ.”

¹⁹Yir ren yir ye, koakye ike̱ng iya Itsi ta fe̱, i ti fe̱ natoon áner aya Itsi tin nye itomong natoon ba, fan ákak bu se̱ ike̱ng iya a tana fe̱, ne amok Adakunom se natoon kazatse cice̱r.

²⁰Akak ta se̱ ku te gye̱r nasho̱o̱n Adakunom kamok a ta kuus ike̱ng iya Itsi tá fe̱ ye a ra nye baꞌ. Ike̱ng iya Itsi ta nye se ye, nong i ta tonong ánerawe rine̱n ba ingya.

²¹Amma kyo̱o̱rna an tonong iren ikak ze̱e̱r ánerawe tana te gye̱r nasho̱o̱n Adakunom. A se̱ kuse gye̱r kuyuna be kukuus Itsi baꞌ, Itsi aMusa ne afumung Áner Kuzarap gip a tonong anong gye̱r tatan.

²²Adakunom sak koangan aya a tin no̱o̱k katsak na aYeso Kiristi ta te gye̱r nasho̱o̱n wu. Sang a ti kasa baꞌ.

²³Kamok koangan nye rine̱n, a ti raar nuyiik Adakunom.

²⁴Amma kamok ritek Adakunom tá nyesek warak a sak koangan se̱ ku te gye̱r nasho̱o̱n wu kamok kashesh kaya aYeso tá be̱e̱n'e.

²⁵Adakunom no̱o̱k aYeso nong a tá sor asidaka kure̱ng rine̱n yir. A re̱ng ánerawe rine̱n ba kamok kuno̱o̱k katsak ba natoon kunyosong naso̱k wu. Adakunom nye anong, nong a tá tonong katsak be kuse kutek wu, kamok gbugbang, Adakunom kaye̱e̱r kuwhiwhe̱ wu a ye̱re̱k rine̱n anerawe wha.

²⁶Be anong ne Adakunom tonong nizen na ye wu be rice wu nye aner katsak ne kuse kutek, nong a ta tonong katsak'e ne a sak koangan afe a tin no̱o̱k katsak na aYeso a ta te aner a ta se gye̱r nasho̱o̱n wu.

²⁷Iyong yir tin tsor yir kafok be akye̱ e̱? Ike̱ng ikak kuse baꞌ. Ka i tin tsor yir kafok kamok yir tá kuus yir itsi a? Wayo, yir ta tsor yir kafok baꞌ kamok ike̱ng aYeso tá nye.

²⁸Rife̱ yir se ye anerawe ta te gye̱r nasho̱o̱n Adakunom kamok kuno̱o̱k katsak wu, sang be ku kuus ike̱ng iya Itsi ta fe̱ baꞌ.

²⁹Ka Adakunom nye Adakunom áner aYahuda tsek a? Aser, a nye Adakunom áfe áya sang á ta nye áner aYahuda baꞌ gip aꞌa? Ei, a nye áfe aya sang a ta nye áner aYahuda baꞌ gip,

³⁰kamok Adakunom se azining, a ta sak áya a ta nye izhak ta te gye̱r nasho̱o̱n wu kamok kuno̱o̱k katsak ba, anong ne áya a ta nye izhak baꞌ, ta se̱ kute gye̱r nasho̱o̱n Adakunom kamok kuno̱o̱k katsak ba gip.

³¹Kamok anong, yong yir ta won yir Itsi kamok kuno̱o̱k katsak na a? Wayo, ko cie̱k, ta titsik yir ingya.