Read izere aRom 4 Bible Online

aRom 4 - izere bible

aRom 4

¹Iyong ta fe̱ yir ane̱ natoon Ibrahim afe a tá nye atukop yir e̱? I kuse ane̱ be wu natoon kuno̱o̱k katsak e̱?

²Ke a fa fe̱ ye Ibrahim se gye̱r nasho̱o̱n Adakunom kamok kunye wu ke wu be ike̱ng iya a tanin tsor kafok natoon'e, amma sang nasho̱o̱n Adakunom baꞌ.

³Izibir rife̱ Adakunom tonong ye, “Ibrahim ti no̱o̱k katsak na Adakunom, ne Adakunom tú ku sok kyo̱ndi aner a ta se gye̱r nasho̱o̱n wu.”

⁴Aner aya a ta nye itomong nong a tu ku karang, ke a tu no̱o̱k ishorong wu, sang i tonong ye a tu nang nawarak baꞌ, amma a tú ku karang ishorong itomong wu.

⁵To̱, aner aya ne a ti fereng ni itomong wu baꞌ, amma a ti fereng na Adakunom, aya afe a ta sak amaan aner ta te gye̱r nasho̱o̱n wu, kuno̱o̱k katsak kuri kuyong tà sak a tù ku sok kyo̱ndi aner a ta se gye̱r nasho̱o̱n Adakunom.

⁶Iyuna ne i nye ike̱ng aDauda tin fe̱ natoon'e, nizen iya a tá fe̱ natoon aner riye̱ rikan aya Adakunom tú ku sok kyo̱ndi a se gye̱r nasho̱o̱n wu, sang kamok itomong aner'e tá nye baꞌ.

⁷A fe̱ ye, “Áner riye̱ rikan ne á nye áner aya a tú ku re̱ng ba rine̱n ba, áya a tú ku kusu ba rine̱n ba.

⁸Aner riye̱ rikan ne a nye aner aya Agwo̱m Ágwo̱m tana fa rine̱n wu baꞌ.”

⁹Riye̱ rikan na nye rife áner aya a tú ku nye ba izhak tsek, ka mak be áya a tá ku nye ba izhak'e baꞌ e̱? Ei, ike̱ng yir ta sen nife̱ yir se ye, “Kuno̱o̱k katsak Ibrahim ne ku sak Adakunom tú ku sok kyo̱ndi aner a ta se gye̱r nasho̱o̱n wu.”

¹⁰To̱, nizen inyaka ne a tu sok kyo̱ndi wu se gye̱r nasho̱o̱n Adakunom e̱? Nama á tá mu ku nye izhak ka nizen a ta mu ku nye'me baꞌ e̱? Ei, kum ne a mu ku nye izhak'e baꞌ.

¹¹Amma a tú ku nye izhak'e nong i tà sor ike̱ng iya i tana tonong ye wu se gye̱r nasho̱o̱n Adakunom. A te gye̱r nasho̱o̱n Adakunom kamok kuno̱o̱k katsak wu nizham a tá ra ku nye izhak. Kamok anong Ibrahim te Ada koangan afe a tin no̱o̱k katsak na Adakunom, amma a ta ma ku nye izhak'e baꞌ, nong ase̱ Adakunom ta sak ba ta te gye̱r nasho̱o̱n wu gip.

¹²Anong ne Ibrahim te ako̱k kasho̱o̱n áya a tú ku nye ba izhak gip, sang kamok á tú ku nye ba izhak tsek baꞌ, amma á kuus kuri kuno̱o̱k katsak ada yir Ibrahim tá be kum ne a mu ku nye izhak baꞌ.

¹³Adakunom no̱o̱k kuto̱ be Ibrahim ne kuri wu ye ba ne a ta ya kutse kazatse na sang kamok Ibrahim ta kuus Itsi baꞌ, amma kamok ku te gye̱r kuya a ta se̱ kamok kuno̱o̱k katsak.

¹⁴Kamok ke i nye ye afe a ta kuus Itsi ne a nye aya a tana ya kutse kazatse to̱, kuno̱o̱k katsak anerawe te kpe̱de̱ng, kuno̱o̱k kuto̱ Adakunom nye ike̱ng ikak baꞌ.

¹⁵Itsi ta kyem i be̱e̱n riye̱ kubeseng Adakunom. Karo̱ kaya ne Itsi tu kuse baꞌ, kutaam tu kuse baꞌ.

¹⁶Kamok anong ánerawe se̱ ike̱ng iya Adakunom tin no̱o̱k kamok kuno̱o̱k katsak ba nong ase̱ ike̱ng iya Adakunom tin no̱o̱k kuto̱'me ta se warak. Inoon Ibrahim cice̱r ta se̱ ike̱ng iya Adakunom tin no̱o̱k kuto̱'me. Ike̱ng iya Adakunom tin no̱o̱k kuto̱ nye ife áner aya a ta kuus Itsi baꞌ, i nye ife koangan aya a tin no̱o̱k katsak kyo̱ndi Ibrahim aya a tá nye Ada yir cice̱r.

¹⁷Kyo̱ndi i ta se kaye̱e̱r izibir rife̱ Adakunom ye, “Mi ta ka sak nong wan ta sor ada ánerawe whe̱re̱.” Adakunom afe wu tin no̱o̱k katsak tú ku sok a tá sor ada yir. Wu ne a nyesek áya a tá kus kutser, rife̱ wu ne ri sak a nye ike̱re̱ i ta tsang i kuse baꞌ.

¹⁸Kute riye̱ Ibrahim te kyo̱ndi kukpe̱de̱ng'e, gip be anong a ya kasho̱o̱n be kute riye̱ ne a ni no̱o̱k katsak. Kamok anong a te ada ánerawe whe̱re̱. Iyu se kyo̱ndi a tá tsang a ku tak ye, “Kuri wan tá te whe̱re̱.”

¹⁹Nizen iyong Ibrahim be aye̱ kyo̱ndi kuso̱k inyak, agap tsang a gang gye̱r tatan kamok a tá tsang a kop amma a shirim kaye̱e̱r kuno̱o̱k katsak wu baꞌ, ka ye izen aSaratu tana bun a tes tsang i gor baꞌ.

²⁰Riye̱ se gak be kuno̱o̱k kuto̱ Adakunom nong a ta won dar a ni no̱o̱k katsak baꞌ, amma a ti barang kukpa agap kaye̱e̱r kuno̱o̱k katsak wu ne a no̱o̱k Adakunom kuyiik.

²¹A bun a ti te riye̱ dim ye Adakunom be kukyem a tana shining ike̱ng iya wu tá fe̱ ye a tà nye.

²²Iyong ne i sak kamok kuno̱o̱k katsak wu ne “Adakunom tú ku sok ye a se gye̱r nasho̱o̱n wu.”

²³Rife̱ a ta fe̱ ye, “A tu sok ye a se gye̱r nasho̱o̱n Adakunom,” sang kamok wu ze̱r tsek ne a ti zibir rife̱ na baꞌ,

²⁴amma a zibir kamok yir, yir gip, yir áya Adakunom ta min sak yir i ta te yir gye̱r nasho̱o̱n wu, yir áya i ti no̱o̱k yir katsak ni wu aya a tá dorok aYeso Agwo̱m Ágwo̱m yir nure̱k.

²⁵Kamok rine̱n yir ne a sok aYeso a no̱o̱k nong a tá ku, a tu ku dorok be kutser nong a tin sak yir ta te yir gye̱r nasho̱o̱n wu.