Read izere aRom 7 Bible Online

aRom 7 - izere bible

aRom 7

¹To̱, ároneng, kum yin ta ren yin Itsi yin ta ren yin ike̱ng iya mi tin fe̱ natoon'e. Itsi ti nye rigwo̱m natoon aner ke aner'e rusek be kutser tsek.

²Ye̱re̱k yin ta di yin abining kuwe̱ne̱ng, Itsi kuwe̱ne̱ng se natoon wu ke amitek wu ru nye atser, amma ke amitek'e ku, to̱, kuwe̱ne̱ng ku se rice wu baꞌ.

³Kamok anong, ke a bun a nye kuwe̱ne̱ng kukak ne amitek'e ru nye atser, to̱, ne a fe̱ ye a nye rikuna. Amma ke amitek'e ku, a ta bun a sok amitek akak, iyong tonong ye a nye rikuna baꞌ, kamok kuwe̱ne̱ng akak ba se rice wu baꞌ.

⁴Kamok anong ároneng, yin gip yin te yin kyo̱ndi yin kus yin nitak kukuus Itsi, kamok riku aYeso sak yin wher yin nitak Itsi, nong yin ta te yin afe akak ze̱e̱r, wu aya a tú ku dorok nure̱k, nong ase̱ yin tà nye yin itomong itek kamok Adakunom.

⁵Kamok izen iya ife yir tá sor yir kaye̱e̱r kuraar yir kuri kufe rinerawe, Itsi ti wo̱k yir nunye rine̱n kushim riye̱ yir ma kunye yir'ong ti be̱e̱n yir riku.

⁶Amma kyo̱o̱rna, yir sor yir washak dar Itsi kamok yir n te kyo̱ndi ikom'e nike̱ng iya i ta tsang i sak yir te yir ásam'me. Kyo̱o̱rna, yir ma nye yir itomong niren ifas ife Kabik sang niren izen ife Itsi baꞌ.

⁷To̱, iyong yir ta fe̱ yir ane̱ makong e̱? Itsi nye rine̱n a? Ko cie̱k, katsak'e, a fa fe̱ ye Itsi baꞌ, sang ke mi ren ike̱ng iya i ta nye rine̱n baꞌ. Ye kamok Itsi ta fe̱ ye, “Sang tu shishim ike̱ng akak baꞌ,” ke mi ren ike̱ng iya a tá yis ye rishishim baꞌ.

⁸Amma kamok Itsi na ne rine̱n tu se̱ karo̱ nong ri ta sak mi ta kpaan koakye kuri kushim ike̱re̱ riye̱ mi. Kamok a fa fe̱ ye Itsi baꞌ, ke rine̱n se kyo̱ndi kukom.

⁹Gbugbang, mi nye atser nizen iya mi tá tsang i ren Itsi baꞌ, amma mi tá fa ren Itsi'me yong rine̱n funung ne mi ma te kukom'e.

¹⁰Mi ma ren ye, itsi na i tá se ye i tà be̱e̱n kutser i ban i be̱e̱n riku ingya.

¹¹Rine̱n tu se̱ karo̱ kamok Itsi'me, i tin wo̱k i tin fe̱r.

¹²Kamok anong, Itsi be rice wu se zhe̱l, ike̱ng iya i ta fe̱ se zhe̱l. I se gye̱r ne i nye itek.

¹³To̱, iyong ike̱ng i ta nye itek ti be̱e̱n riku a? Wayo, cie̱k, rine̱n ne ri ti be̱e̱n riku nong a ta ren kunik rine̱n, be Itsi ne rine̱n ta wuruk kanang be kurisik wu.

¹⁴Yir ren yir ye Itsi'me nye itak kabik, amma mi be kuse rinerawe, a ti sok a tá re̱p rine̱n'e kyo̱ndi asam.

¹⁵Mi ren ike̱ng ife mi ta nye baꞌ. Kamok ike̱ng ife mi ta shim ke mi nye, iyong ne mi nye baꞌ. Amma iya mi ta shim ta nye baꞌ, iyong ne mi shishing i ban i nye ingya.

¹⁶Ke i nye ye ike̱ng mi ta shim ta nye baꞌ, iyong ne mi ban i nye ingya. To̱, aser Itsi nye ike̱ng itek.

¹⁷Sang mi be rice mi ne i nye ike̱re̱ na baꞌ, amma rine̱n ri ta se kaye̱e̱r'i.

¹⁸Mi ren ye sang ike̱ng ikak itek kuse kaye̱e̱r'i baꞌ, ife rinerawe. Kamok mi shim kunye ike̱re̱ i ta nye itek, amma kunye anong'e ti gaar.

¹⁹Mi nye ike̱ng ikak itek mi ta shim ke mi nye baꞌ, ma mi ban i shishing i nye anyas mi ta shim kunye'me baꞌ.

²⁰To̱, ke i nye ye mi nye ike̱ng ife mi ta shim ta nye baꞌ, aser sang mi ne i nye baꞌ, amma rine̱n ri ta se kaye̱e̱r'i.

²¹Mi ma ren ye ike̱ng na be itomong: Nizen iya mi ta shim ta nye ike̱ng i ta nye itek, ne mi ban i shishing i di imaan'e mak be mi.

²²Kamok kaye̱e̱r riye̱ mi, mi fok kusas Itsi Adakunom.

²³Amma kaye̱e̱r kuro̱m'i, mi fok ike̱ng ikak ze̱e̱r ta nye itomong be iya riye̱ mi ta shim. Ike̱ng i ta sak kuro̱m'i be riye̱ mi ta can, ne i te kyo̱ndi asam kaye̱e̱r kukuus ike̱ng iya i ta se kaye̱e̱r kuro̱m'i.

²⁴Awo̱ tsek be mi, ike̱ng kuro̱ riye̱. Angan tin shesh kaye̱e̱r kuro̱m na ku ta tseng be mi kaye̱e̱r riku e̱?

²⁵Mi be riye̱ rikan be Adakunom kamok a ti shesh be aYeso Kiristi Agwo̱m Ágwo̱m yir. Kamok anong kaye̱e̱r riye̱ mi, mi te asam Itsi Adakunom, amma kaye̱e̱r kuse rinerawe mi te asam ike̱re̱ ife rine̱n tá fe̱ ye i ra nye.