Read izere 1 aKoranti 12 Bible Online

1 aKoranti 12 - izere bible

1 aKoranti 12

¹To̱, kyo̱o̱rna, ároneng, natoon kunang Kabik Kazhe̱l'e, mi shim yin tú sor kaye̱e̱r kudun kuren baꞌ.

²Yin ren yin nizen iya yin tá nye yin áfurin, a tá wo̱ro̱k yin nong i ta kuus yin ike̱re̱ itsi iya i ta be kutser baꞌ.

³Kamok anong mi shim yin tu ren yin ye, aner akak kuse aya a ta be Kabik Adakunom a tana fe̱ ye, “A ra fiming aYeso baꞌ.” Akak kyem a ta fe̱ ye, “aYeso nye Agwo̱m Ágwo̱m” baꞌ, ma ke a be Kabik Kazhe̱l'e.

⁴To̱, kunang Kabik Kazhe̱l'e se iriri'me, amma Kabik kazining ne a nyesek.

⁵Iriri itomong kuse, amma Agwo̱m Ágwo̱m'me se azining.

⁶Ike̱re̱ kunye kuse iriri'me, amma Adakunom'me se azining, ne a nyesek koangan kukyem kunye'me cei.

⁷Ike̱re̱ iya Kabik Kazhe̱l'e ta no̱o̱k koangan, nye ife i ta naka tosok mo yir.

⁸Kabik Kazhe̱l'e kazining ne a no̱o̱k akak kukyem, ne a no̱o̱k akak kuren ike̱ng.

⁹Akak a tu ku no̱o̱k kunang kuno̱o̱k katsak. Ne akak kunang kusak áfe iro̱k ta te atser.

¹⁰Akak a tu ku no̱o̱k kunang kunye ike̱re̱ azhing, akak a tu ku no̱o̱k kunang kunye kuzarap. Akak a tu ku no̱o̱k kunang kukaas iriri nabik. Akak a tu ku no̱o̱k kunang kukyem kufe̱ ni írem iduk, akak gbak a tu ku no̱o̱k kunang kutaas ike̱ng ákak tá fe̱ ni írem iduk'e.

¹¹Kabik kazining ne a nye ike̱re̱ na cice̱r, ne a no̱o̱k koangan kyo̱ndi wu ta shim.

¹²Kyo̱ndi kuro̱m ánerawe ta se agung'e kuzining be ikap ze̱r ze̱r, ikap ze̱r ze̱r amma kuro̱m se kuzining. To̱, aKiristi se anong.

¹³Di, Kabik Kazhe̱l'e a ti nye yir abatisma kaye̱e̱r kuro̱m kuzining cice̱r yir, aner aYahuda ka aya sang a ta nye aner aYahuda baꞌ, ka asam ka aner a ta nye asam baꞌ, a min no̱o̱k yir Kabik kazining cice̱r yir nong ta so̱ yir.

¹⁴Kuro̱m anerawe se agung'e azining tsek baꞌ, ku be ikap ze̱r ze̱r.

¹⁵Ke kutak fa fe̱ ye, “Kamok mi ta nye kubo̱k baꞌ, mi nye ikap kuro̱m baba baꞌ.” Iyong ne i ta sak ku ta won dar sor ikap kuro̱m baꞌ.

¹⁶Ke kuto fe̱ ye, “Mi nye rinyisi baꞌ, kamok anong mi ba nye ikap kuro̱m baba baꞌ.” Iyong ne i ta sak ri ta won dar isor ikap kuro̱m baꞌ.

¹⁷Ke a fa fe̱ ye kuro̱m anerawe cice̱r nye rinyisi tsek, ke kuro̱m'e fok kuto be akye̱ e̱? Ke a fa fe̱ ye kuro̱m anerawe cice̱r nye kuto tsek, ke a fok iko̱o̱n be akye̱ e̱?

¹⁸Adakunom nye kuro̱m anerawe nong a ta ma saas koakye ikap gye̱r naro̱ wu ta shim.

¹⁹Ke a fa fe̱ ye, akusum kuro̱m anerawe nye ikap izining tsek, ke ribir kuro̱m'e se ake̱ e̱?

²⁰To̱, kuro̱m se kuzining ne ku be ikap ze̱r ze̱r.

²¹Rinyisi ta kyem ri fe̱ be kubo̱k ye, “Akye̱ ti gung be wan e̱?” Rinyisi ta kyem kufe̱ anong baꞌ. Rice ta kyem ri fe̱ be kutak ye, “Akye̱ ti gung be wan e̱?”

²²I ta te anong baꞌ, ikap'e iya i ta zhe̱e̱sh yir, yir ta kyem ta sor yir dar ba baꞌ.

²³Ikap kuro̱m iya yir ta zhe̱e̱sh yir, iyong ne yir nar ku ni sak yir riye̱ niba. Anong ne ikap'e iya i ta tas ke a di baꞌ, iyong ne i nar ke i ni sak yir riye̱ ingya.

²⁴Ikap kuro̱m iya i ta sas kuye̱re̱k, yir tin daam mo yir baꞌ. Adakunom nye kuro̱m a sak ikap'e iya yir ta di yir ye i se yiik baꞌ, iyong ne i se yiik.

²⁵Fan ikap kuro̱m'me bu won dar á gung rice nong koangan tin daam be afudang.

²⁶Kamok anong, ke abas akak naka man ne ribir'e fok kuro̱'me. Ke a kerek abas akak ne ribir'e nye riye̱ rikan.

²⁷Kyo̱o̱rna, yin ne i nye yin kuro̱m aKiristi cice̱r yin, koangan kaye̱e̱r yin nye abas akak.

²⁸Kaye̱e̱r áfikuus, Adakunom kasa ámanzo a ta te áfe ime̱se̱ng'e, afe afa nye áner kuzarap, afe ataar nye áfe kubo̱so̱p ánerawe'me. Ákak nye áfe kunye itomong azhing, ne áfe kusak áfe iro̱k ta te atser, ne áfe a tana tobok ánerawe. Ne ákak áfe kube ánerawe, nigang'e áfe a tana fe̱ ni írem iduk.

²⁹Cice̱r ba nye ámanzo a? Ka Cice̱r ba nye áner kuzarap a? Cice̱r be nye áner kubo̱so̱p a? Ka Cice̱r ba nye itomong azhing a?

³⁰Cice̱r ba sak áfe iro̱k te atser a? Cice̱r ba fe̱ ni írem iduk a? Cice̱r ba kyem a taas ike̱ng iya a ta fe̱ ni írem iduk'e a?

³¹Amma ni te yin riye̱ ni itse̱r kunang kuya ku ta se yiik ne ku nar. Mi ta ka tonong yin iren iya i ta nar itek.