Read izere 1 aKoranti 14 Bible Online

1 aKoranti 14 - izere bible

1 aKoranti 14

¹Ni te yin iso̱r ni itse̱r kushim, ne i be yin ife̱ng kunang Kabik Kazhe̱l, atuk kuya a tanin nye kuzarap baꞌ.

²Kamok aner aya a ta fe̱ ni írem iduk, sang a fe̱ be ánerawe baꞌ. A fe̱ be Adakunom kamok akak ren ike̱ng iya a tin fe̱ baꞌ. A fe̱ ike̱re̱ akak ta kyem a ren baꞌ, kaye̱e̱r kabik wu.

³Amma aner aya a ta nye kuzarap fe̱ rife̱ riya ri tana no̱k ánerawe ne kutsesek ne ri sak aye̱ ta shirim.

⁴Aner aya a ta fe̱ ni írem iduk no̱k rice wu tsek, amma afe a ta nye kuzarap sak áfikuus ta rasak nabik.

⁵Kamok anong, mi shim ke koangan kaye̱e̱r yin fe̱ ni írem iduk gye̱rtatan, amma mi ra shim yin tu nye yin kuzarap ne i nar. Afe a ta nye kuzarap nar aya a ta fe̱ ni írem iduk, ma ke a se̱ aner a tana kirik ike̱ng iya a ta fe̱, nong áfikuus ta rasak nabik.

⁶Ároneng, ke mi be̱ nufe yin i be̱ i fe̱ be yin ni írem iduk, akye̱ kuri ike̱ng ne mi ta ka barang yin'e e̱? Ma ke mi ta tak yin ike̱ng iya Adakunom tin tonong, ka mi ta ka barang mo yin kuren ike̱ng, ka kuzarap, ka ta ka bo̱so̱p yin ike̱ng ikak ayi.

⁷Ike̱re̱ iya i ta be kutser baꞌ, iya a tin bom abom kyo̱ndi asharuwa be izom, akak ta kyem a ren kuto̱ abom'e baꞌ, ma ke a rom izom ka a te̱p asharuwa'me kanang kyo̱ndi kuto̱ abom'e ta se.

⁸Ke a fe̱e̱p rigba itsom gye̱r baꞌ, angan ta nye kanye̱k nong a ta be ni itsom'e e̱?

⁹Anong ne i se be yin. Ke yin fe̱ yin kanu ni irem a ta fok baꞌ, akak ta kyem a ren ike̱ng iya yin tin fe̱ yin baꞌ. I te kyo̱ndi yin korok yin riwo̱ng kpe̱de̱ng tsek.

¹⁰Írem kuse ze̱r ze̱r nazatse na, ko inyaka sor ike̱ng ikak nufe aya a ta fe̱.

¹¹Ke mi kyem iren ike̱ng iya akak ta sen fe̱'me ni írem iduk baꞌ, i nye ye mi te aner atsen nufu, ne wu ma te atsen nunaan gip.

¹²Anong ne i se be yin, kum yin ta min te yin riye̱ ni itse̱r ike̱re̱ Kabik ta nyesek, ni no̱o̱k yin agap ni itse̱r kuno̱o̱k kuya ku tana no̱k áfikuus nabik.

¹³Kamok anong, koangan afe a ta ren a fe̱ ni írem iduk a ra nye aduwa nong a tù ku no̱o̱k kunang kuni taas ike̱ng iya wu ta fe̱.

¹⁴Ke mi nye aduwa ni írem iduk, kabik'i ne ka nye, amma riye̱ mi se̱ ike̱ng ikak baꞌ.

¹⁵To̱, akye̱ ne mi ta nye e̱? Mi tà nye aduwa nabik'i, ne i bun i nye be riye̱ mi. Mi tà bom abom kukerek Adakunom be kabik'i, ne i bun i bom be riye̱ mi.

¹⁶Ke wan kerek Adakunom be kabik wan, to̱, aner aya a ta ka foos ta san'e ane̱ a ta fe̱ ye “Anong” sang wu ta fok irem'e baꞌ natoon riye̱ rikan wan ta sen nye'me e̱?

¹⁷Wan kerek Adakunom gye̱rtatan, amma aner ayong se̱ ike̱ng ikak i tana ku tobok baꞌ.

¹⁸Mi shim ta tonong Adakunom riye̱ rikan kamok mi ta kyem i fe̱ ni írem iduk ne i ka nar yin cei.

¹⁹Amma i tin nar mi ta fe̱ ike̱re̱ itoon tsek nanyim afikuus nong á ta fok, be i tana fe̱ ike̱re̱ izungu kuso̱k (10,000) ne á fok baꞌ.

²⁰Ároneng, won yin kuto̱ kyo̱ndi inoon. Kaye̱e̱r amaan kunye te yin kyo̱ndi inoon nazhizhe̱k'e, amma be yin kuto̱ro̱ng kuri kufe risho̱n.

²¹I se ni izibir kaye̱e̱r rife̱ Adakunom ye, “Mi ta fe̱ rife̱ be áner na be áner aya a ta nye írem iduk ne irem átsen, gip be anong a tin fok baꞌ, Adakunom fe̱ anong.”

²²To̱, aser, kufe̱ ni írem iduk tonong áfikuus ike̱ng ikak baꞌ ma ke áfurin. Kuzarap se kamok áfe a tan no̱o̱k katsak sang kamok áya a won dar á no̱o̱k katsak baꞌ.

²³Kamok anong, izen iya ne áfikuus nyim cice̱r ne koangan fe̱ ni írem iduk, áya a ta ren ike̱ng iya yin ta sen nye yin'e baꞌ, ka áfurin ti no̱ kaye̱e̱r'e, aser á ta fe̱ ye yin n yirim yin aꞌa?

²⁴Amma ke afurin ka aner áya a ta ren ike̱ng iya yin ta sen nye yin'e baꞌ, ti no̱ kaye̱e̱r yin nizen iya koangan ta sen nye kuzarap, ike̱ng iya wu tá fok tù ku tonong ye wu nye afe rine̱n ne a di kuraar wu be ike̱ng iya wu ta fok'e cei.

²⁵A tà te̱s ike̱re̱ iya i ta se nune̱re̱ng kaye̱e̱r riye̱ wu. Be anong ne a tà kpa kaben nasho̱o̱n Adakunom a tu ku ya iben ne a fe̱ ye, “Katsak'e, Adakunom se mak be yin.”

²⁶Ároneng, ike̱ng mi tin fe̱ natoon'e se ye, nizen iya yin nyim yin, ke akak se be abom kukerek Adakunom, ne akak sen bo̱so̱p ánerawe'me, ne akak fe̱ ike̱ng iya Adakunom tu ku tonong, ne akak sen fe̱ ni írem iduk, ne akak kirik ike̱ng iya a ta fe̱. A ra nye koakye nong a tin no̱k áfikuus kaye̱e̱r kabik.

²⁷Ke ákak ta fe̱ ni írem iduk, á tu nar áner afa ka ataar baꞌ, á ra fe̱ azizirik azizirik. Ma akak ra kirik ike̱ng ba ta fe̱.

²⁸Ke akak tuse afe a tana kirik'e baꞌ, aner'e ra te gbik kaye̱e̱r kanyim áfikuus'e. A ra fe̱ be rice wu ne Adakunom tsek.

²⁹Áfe a tana nye kuzarap tu nar áner afa ka ataar á tana fe̱ kanu baꞌ, ribir'e ra ye̱re̱k tatan nong a ta di ike̱ng ba ta sen fe̱'me.

³⁰Ke Adakunom tonong akak ike̱ng ikak a ta se nusonong, afe a ta se be rife̱ ni ime̱se̱ng'e ra te gbik.

³¹Nye yin kuzarap cice̱r yin azizirik azizirik, nong koangan ta se̱ kuren ne kutsesek.

³²Nabik kunye kuzarap se nubo̱k aner kuzarap'e.

³³Kamok Adakunom yir nye Adakunom aya a ta nye ike̱re̱ kpe̱de̱ng baꞌ, amma a nye afe kusor caang. Kyo̱ndi i ta se be áfikuus ninaro̱ kuya Adakunom iben cice̱r,

³⁴ányining ra sor gbik naro̱ kuya Adakunom iben. Kamok a tu no̱o̱k ba iren kufe̱ kanu baꞌ, a ra kuus ike̱ng iya a ta sen nye'me kyo̱ndi Itsi ta fe̱.

³⁵Ke á shim á ta ren ike̱ng ikak, á ra rip atek ba ninasa, kamok i nye ike̱ng isum aner abining ta fe̱ kanu naro̱ kuya Adakunom iben.

³⁶Rife̱ Adakunom san'e nufe yin, ka awan yin tsek ne n fok yin rife̱'me e̱?

³⁷Ke akak kaye̱e̱r yin di ye wu nye aner kuzarap ka a be kunang Kabik ta nyesek, to̱, a ra ren ye ike̱re̱ mi ta ka zibir yin'e na nye ike̱ng iya Agwo̱m Ágwo̱m tin tak.

³⁸Ke aner'e ti daam be rife̱ na baꞌ, a tin daam ni wu baꞌ.

³⁹Kamok anong ároneng, ni te yin riye̱ ninye kuzarap tu roon yin kufe̱ kanu ni írem iduk baꞌ.

⁴⁰Amma a ra nye koakye gye̱r sang kpe̱de̱ng baꞌ.