Read izere 1 aKoranti 15 Bible Online

1 aKoranti 15 - izere bible

1 aKoranti 15

¹Kyo̱o̱rna ároneng, mi shim ta ka yiring yin itak Rife̱ Ritek riya yin tá shan yin, ne i ni nyeseng yin.

²Be Rife̱ Ritek na ne yin ti se̱ yin kashesh ke yin yiir yin rife̱ mi tá ka tak yin kpa. Ma ke i se ye yin ti no̱o̱k yin katsak kpe̱de̱ng tsek.

³Agbang ike̱ng iya mi ta shim ta ka tak yin, se ye aKiristi ku kamok rine̱n yir, kyo̱ndi kufumung rife̱ Adakunom ta fe̱,

⁴ye a tú ne̱r, a tú dorok katuk afe ataar, kyo̱ndi kufumung rife̱ Adakunom ta fe̱.

⁵A ti wuruk na aKefas ne nufe ámanzo kuso̱k be afa.

⁶Nama anong, a bun a ti wuruk na ároneng áfikuus a ta nar inyak iso̱k itoon nizen izining áya kukap ba ta rusek be kutser, amma ákak mereng ida.

⁷A bun a ti wuruk na aYakub ne na ámanzo cice̱r.

⁸Ni igang'e, a bun a ti wuruk natoon'i, mi ta se kyo̱ndi aner a tu ku tes nitik'e.

⁹Mi ti raar kaye̱e̱r ámanzo, mi kyem a tin yis ye amanzo gum baꞌ kamok mi tabak áfikuus dide̱ng.

¹⁰Amma kamok ritek Adakunom ne mi n te ana, ritek wu natoon'i se kpe̱de̱ng tsek baꞌ, cie̱k. Mi n nye itomong dide̱ng ne i nar ribir ámanzo cice̱r. Gip be anong, sang mi ne i nye itomong'e be rice mi baꞌ, ritek Adakunom ne ri nye itomong'e kaye̱e̱r'i.

¹¹To̱, ka mi ka ba ayi, anong ne yir nye yir awazi'me, iyong ne yin ti no̱o̱k yin katsak.

¹²To̱, ke a nye awazi natoon kudorok aKiristi nure̱k, kamok akye̱ ákak yin fe̱ ye kudorok ikom kuse baꞌ e̱?

¹³Ke i nye ye kudorok ikom kuse baꞌ, i nye ye aKiristi dorok nure̱k baꞌ.

¹⁴Ke i nye ye aKiristi dorok nure̱k baꞌ, to̱, aser awazi yir ta nye yir nye abab'e tsek, kuno̱o̱k katsak yin te kpe̱de̱ng gip.

¹⁵Iyong tonong ye yir ti bo̱ yir naborok na Adakunom kamok yir n taas yir ye Adakunom dorok aKiristi nure̱k. Amma a tú ku dorok baꞌ, ke i nye ye a dorok ikom baꞌ.

¹⁶Ke i nye ye a dorok ikom baꞌ, to̱, aKiristi gip a tú ku dorok baꞌ.

¹⁷Ke i nye ye a dorok aKiristi nure̱k baꞌ, to̱, kuno̱o̱k katsak yin te kpe̱de̱ng, i nye ye i rusek yin rine̱n yin.

¹⁸To̱, áya a ta se nida kaye̱e̱r aKiristi wei ma izen izen.

¹⁹Ke i nye ye ku ni te riye̱ yir na aKiristi se kamok kusor yir nazatse na tsek, i nye ye yir te yir ike̱ng kuro̱ riye̱ ne i nar yir koangan nazatse na.

²⁰Amma katsak'e, a dorok aKiristi nure̱k wu ne a nye afe ime̱se̱ng'e kaye̱e̱r áya a tá dorok nure̱k.

²¹Kum i ta nye ye riku be̱ nazatse kamok aner azining, anong ne kudorok ikom gip be̱ kamok aner azining.

²²Kamok kyo̱ndi koangan tà ku kamok i ta wuruk yir kaye̱e̱r Adamu, anong ne a tà dorok koangan kaye̱e̱r aKiristi.

²³Koangan nizen ifu, aKiristi afe ime̱se̱ng'e a tu ku dorok, nama nizen iya a tana be̱, áfe a tú ku kuus, a tù ku dorok ba.

²⁴Ne igang'e be̱, izen iya ne a tana no̱o̱k Ada Adakunom rigwo̱m wu nama a ta yirik koakye kuri rigwo̱m be kukyem.

²⁵aKiristi ta nye rigwo̱m, ma a te amudo̱n wu kaben.

²⁶Amudo̱n afe igang'e a tana fe̱r nye riku.

²⁷Kamok i se nuzibir ye, “Adakunom sak koakye nubo̱k wu,” A tá fe̱ ye, “koakye.” I se kanang ye sang Adakunom ti se kaye̱e̱r áfe a ta se nubo̱k aKiristi baꞌ.

²⁸Nizen Adakunom tá nye anong, Igon'e ma se te nubo̱k Adakunom aya a ta won koakye nubo̱k wu nong Adakunom tà sor koakye be akye̱.

²⁹Ke i nye ye kudorok ikom kuse baꞌ, akye̱ ne áya a ta nye ba abatisma rice áfe a tan kus ta nye e̱? Ke i nye ye kudorok ikom kuse baꞌ, akye̱ sak a tu nye ba abatisma'me e̱?

³⁰To̱, kamok akye̱ yir tes yir rice yir kaye̱e̱r kawei koakye izen e̱?

³¹Ároneng, mi ye̱re̱k riku koakye izen, katsak'e yong, mi ti nye kuka be yin kaye̱e̱r aYeso Kiristi Agwo̱m Ágwo̱m yir.

³²Ke mi ko̱n be ámaan ikewum na Afisa be kuto̱ro̱ng rinerawe tsek, akye̱ ne mi tin se̱ e̱? Sang ke i nye áfe a tan kus ta dorok baꞌ, “Won i ta ya ne i so̱ yir, kamok natson ta kus yir.”

³³Sang tu won yin akak ta ka wo̱ro̱k yin baꞌ, “Kusor be ámaan aner beseng kuse kutek.”

³⁴Kubun yin kaye̱e̱r kuto̱ro̱ng yin kutek, won yin kunye rine̱n. Ákak yin ren Adakunom baꞌ. Mi fe̱ iyu nikum tà fok yin isum.

³⁵Kashim ákak ta nye kurip ye, “Ane̱ ne a tà dorok be ikom e̱? Be akye̱ kuri kuro̱m e̱?”

³⁶Afunam akak, ike̱ng iya a ta tus tà ta baꞌ, ma i ku nizham.

³⁷Nizen afe wan ta tuus ike̱ng wan tuus cei be ritin'e baꞌ, amma ica'me tsek, ife alikama, ka kuri kukak.

³⁸Amma Adakunom ne a te ritin nica'me kyo̱ndi wu ta shim. Koakye ica'me be kuri wu.

³⁹Sang koakye be rinam kuro̱m kuri kuzining baꞌ. Ánerawe be kuri rinam kuro̱m kuri kufuba, anong ne ikewum be nanon ne izos. Koangan be rinam kuro̱m ba ze̱r ze̱r.

⁴⁰Ike̱re̱ Adakunom tá nye ife kaza kuse, ife kazatse gip. Ike̱re̱ i ta nye ife kaza be kuri kusas ba, ike̱re̱ i ta se nazatse be kuri kusas kufuba gip.

⁴¹Kuyiik kunom se ze̱e̱r, kufe kufe̱n se ze̱e̱r, kufe ádar se ze̱e̱r, ma adar'e akak se ze̱e̱r be akak be kuyiik.

⁴²Anong ne i ta se nizen iya a tana dorok ikom. Kuro̱m kuya a ta ne̱r, ku ta bus, amma kuya a tana dorok'e ta bus baꞌ.

⁴³A tus kaye̱e̱r iben fe̱re̱, ne a dorok'e be kuyiik. A tus nizen i ta be agap baꞌ, ne a dorok'e be agap.

⁴⁴A tus kuro̱m kufe rinerawe, ne a dorok'e be kuro̱m kuri kufe kabik, Kum kuro̱m kuri kufe rinerawe tu ku se, katsak'e kuri kufe kabik kuse gip.

⁴⁵Kufumung rife̱ Adakunom fe̱ ye, “Adakunom nye Adamu afe ime̱se̱ng'e be kutser.” Adamu afe igang'e nye kabik kafe ka ta nyesek kutser.

⁴⁶Sang kuro̱m kufe kabik ne ku be̱ ni ime̱se̱ng'e baꞌ, kufe rinerawe ne ku be̱ ni ime̱se̱ng'e nizham rife kabik tá ra be̱.

⁴⁷A nye anerawe afe ime̱se̱ng'e be iben tsek, aner afe afa'me ne naza a tá be̱.

⁴⁸Ánerawe kazatse na se kyo̱ndi aner aya a tú ku nye be iben. Áner áya a tá nye afe kaza á se kyo̱ndi wu afe kaza'me.

⁴⁹Kyo̱ndi yir ta se yir nuro̱m kuri rife̱ rinerawe na anong ne i ta se yir be nuro̱m kuri kufe aner afe kaza na.

⁵⁰Ároneng ike̱ng mi ta sen fe̱ be yin na ye, kuro̱m kufe naso̱k be rinam tà no̱ kaye̱e̱r rigwo̱m Adakunom baꞌ. Anong ne ife i ta bus tà se̱ kutse kaye̱e̱r ife i ta won dar i bus baꞌ.

⁵¹Wesek yin kuto, mi tà ka tak yin ike̱ng ikak i tá se de̱s baꞌ. Sang cice̱r yir ne i ta tsang i mereng yir ida baꞌ, amma cice̱r yir ne a tà shishing kuro̱m yir,

⁵²nizen izining kyo̱ndi kutsor anyisi be kufok rigba rife̱ igang'e. A tà fe̱e̱p rigba, a tà bun a dorok ikom be iro̱m kuri kuya sang ku tana bus baꞌ, ne a shishing iro̱m yir.

⁵³Kamok iya i tana sor ma izen izen ta kis iya i tana baan baꞌ, iya i tana won dar i ku ta kis iya i tana ku'ong.

⁵⁴Izen iya ne ife kusor ma izen izen'ong kis iya i tana baan baꞌ, ne ife i tana won dar ku, kis iya i tana ku, nizen iyong ne a ta shining ike̱ng iya a ta zibir kaye̱e̱r rife̱ Adakunom ye, “An wo̱no̱ng riku, kamok a nar agap wu.”

⁵⁵“Wan riku, agap wan se ake̱ e̱? Wan nado̱m wan no̱ ake̱ e̱?”

⁵⁶Nado̱m riku nye rine̱n, agap rine̱n nye Itsi.

⁵⁷Amma i be yir riye̱ rikan be Adakunom kamok an sak yir n nar yir agap riku kaye̱e̱r Agwo̱m Ágwo̱m yir aYeso Kiristi.

⁵⁸Kamok anong ároneng'i mi ta shim, nyeseng yin be agap, tu te yin tuk tuk baꞌ. No̱o̱k yin rice yin nong ta nye yin itomong Agwo̱m Ágwo̱m yir aYeso dide̱ng koakye izen, kamok yin ren yin ye itomong yin ta nye yin kamok Agwo̱m Ágwo̱m yir aYeso se bap baꞌ.