Read izere 1 aKoranti 6 Bible Online

1 aKoranti 6 - izere bible

1 aKoranti 6

¹Ke akak yin be rife̱ be afudang wu afikuus, akye̱ sak a ta tseng be wu nufe aner aya sang a ta nye afikuus baꞌ e̱? Gye̱r ke a tseng be wu nufe aner aya a ta nye afikuus aꞌa?

²Yin ren ye ázhe̱l'e ne á tà to̱ kazatse na amok aꞌa? Ke yin ne i ta to̱ yin kazatse amok, yin kyem i tà to̱ yin amok natoon ike̱re̱ izhizhe̱k'e aꞌa?

³Yin ren yin ye yir ne i tà to̱ yir ámaleka amok aꞌa? Shita ike̱re̱ kazatse na baꞌ.

⁴Kamok anong ke yin be yin rife̱ natoon ike̱re̱ kuri iyong, ne yin kasa yin akak kaye̱e̱r yin nong a ta te afe kuto̱ amok, aner'e tu nye aner aya a tan kyem ike̱ng ikak kaye̱e̱r afikuus baꞌ.

⁵Mi fe̱ iyu nong ta fok yin isum. Aser, a ta kyem a se̱ akak kaye̱e̱r yin a tan kyem a ta to̱ amok ke kudaam ti no̱ kaye̱e̱r afikuus aꞌa?

⁶Nikum ke yin se̱ yin aner a tana ka to̱ yin amok, ne aner'e tseng be afudang wu naro̱ amok, nufe áner aya sang a ta nye afikuus baꞌ.

⁷Kum yin ta tsees yin kukun áfudang yin iyong tonong kuraar yin nakuruk. I nar a ta ka beseng yin riye̱ aꞌa? I nar a ta ka mo̱o̱r yin tsek aꞌa?

⁸Yin be rice yin, ne i naka mo̱o̱r yin ingya, ne i naka nye yin imaan'e yin aner be aronyining.

⁹Yin ren yin ye ákardak áner tà won dar a no̱ kaye̱e̱r rigwo̱m Adakunom aꞌa? Sang tu won yin akak ta ka wo̱k yin baꞌ, áner aya a ta nye rikuna ka áya a ta kuus ike̱re̱ itsi ka áfe a ta nyiis kuro̱m be áfe a sang a tan nye kuwe̱ne̱ng baꞌ, ka átek áfe ányining ta ka nyesek ba itso̱m nong á tà mereng be ba, ka átek á ta mereng be átek,

¹⁰ka ákpatang ka áfe kuye̱re̱k ka áya a ta mak a sok kugbe̱re̱ ka áfe a ta kas naro̱ ka áfe a tà mo̱o̱r ánerawe ta won dar a no̱ kaye̱e̱r rigwo̱m Adakunom baꞌ aꞌa?

¹¹Anong ne ákak yin tsang a se, a ra ka kusu yin nong a ta sak yin n te yin zhe̱l. Yin n te yin gye̱r nasho̱o̱n Adakunom kaye̱e̱r riyerek Agwo̱m Ágwo̱m yir aYeso Kiristi ne Kabik Adakunom yir.

¹²“Mi ta kyem i nye koakye mi ta shim.” Amma sang koakye ne i ra se gye̱r be mi baꞌ. “Mi ta kyem i nye koakye mi ta shim.” Amma mi ta ra te asam koakye baꞌ.

¹³Ákak fe̱ ye, “A nye kafa kamok naya, naya kamok kafa,” ikak ta ra sor ma izen izen baꞌ. Adakunom tu ku whe̱se̱ng ba cice̱r. A nye kuro̱m kamok rikuna baꞌ, amma nong a tin tiyiik Adakunom, ne Adakunom ni sak riye̱ nuro̱m'e.

¹⁴Adakunom kaye̱e̱r kukyem wu a sak Agwo̱m Ágwo̱m dorok nure̱k, a tà sak yir tà dorok yir gip.

¹⁵Aser, yin ren yin ye iro̱m yin nye ikap kuro̱m aKiristi aꞌa? Mi ta sok ikap kuro̱m aKiristi nong tin nyim kuro̱m be inyak agwo̱m a? I ta te anong baꞌ, cie̱k.

¹⁶Yin ren yin ye aner aya a ta men be inyak agwo̱m n te azining be wu nuro̱m aꞌa? Kamok rife̱ Adakunom fe̱ ye, “Aner afa'me ta te kuro̱m kuzining.”

¹⁷Aner aya a ta gun rice wu be Agwo̱m Ágwo̱m n te kuro̱m kuzining be wu kaye̱e̱r kabik.

¹⁸Kuteng yin kunye kye̱re̱. Sang koakye kuri rine̱n ánerawe ta nye ne ri beseng kuro̱m wu baꞌ, amma aner aya a ta nye kye̱re̱ be kuro̱m wu, beseng kuro̱m wu.

¹⁹Yin ren yin ye kuro̱m yin nye karo̱ kusor Kabik Kazhe̱l'e aꞌa? Wu ne a se kaye̱e̱r yin, aya Adakunom tá ka no̱o̱k yin aꞌa? Yin sor yin kusor rice yin baꞌ,

²⁰a tá sheshek yin. Kamok anong tiyiik yin Adakunom be iro̱m yin.