Read izere 1 aKoranti 7 Bible Online

1 aKoranti 7 - izere bible

1 aKoranti 7

¹To̱, Kyo̱o̱rna natoon ike̱re̱ yin tin zibir yin'e, i se gye̱r anerawe ta sor dar kuwe̱ne̱ng.

²Amma kamok kunye kye̱re̱ tu ku se kaye̱e̱r yin, koangan ra sok abining wu ne koangan abining ra be amitek wu.

³Aner amitek ra no̱o̱k abining wu ike̱ng iya i ta se gye̱r ke a no̱o̱k ife kuwe̱ne̱ng, anong ne abining'e gip, a ra no̱o̱k amitek wu.

⁴Kuro̱m abining kuwe̱ne̱ng nye kufu wu ze̱r baꞌ, kunye kufe amitek wu gip. Anong ne i se, kuro̱m aner a tá nye kuwe̱ne̱ng nye kufu wu ze̱r baꞌ, kunye kufe abining wu gip.

⁵Sang tu naka roon yin'e baꞌ, ma ke i ti sak yin ta nye yin anong kaye̱e̱r izen cie̱k nong ase̱ tin te yin rice ni inye aduwa. Nama anong ne yin bun i nyim yin fan Ishetan ba ka te yin afartak kamok kudun kuyiir rice yin.

⁶Sang mi fe̱ ye ma i ra se anong baꞌ, ike̱ng mi ta fe̱ na nye itabak tsek.

⁷Ánerawe cice̱r fa se kyo̱ndi mi ke iwe̱r. Koangan anerawe ra be kunang kuya Adakunom tu ku no̱o̱k, akak be kuri kuyu ne akak be kuri kukya.

⁸To̱, natoon áya a ta rusek dar kuwe̱ne̱ng ne aya á ta nye ákumung'e, mi fe̱ ye, i se gye̱r á ra sor dar kuwe̱ne̱ng kyo̱ndi mi ta se.

⁹Ke á ta ra kyem a tsesek baꞌ, á ra nye kuwe̱ne̱ng. I ta nar á tu nye kuwe̱ne̱ng be á tana won riko̱o̱k'e tu ku daam ba.

¹⁰Yin áfe i tan nye yin kuwe̱ne̱ng mi fe̱ be yin be agbang kuto̱ (sang mi ne i fe̱ baꞌ, Adakunom ne a fe̱ ye), abining kuwe̱ne̱ng tu kam be amitek wu baꞌ.

¹¹Ke a kam be wu, a tu nye kuwe̱ne̱ng kukak baꞌ ke anong baꞌ a rin sak be amitek wu. Aner amitek tu kam be abining wu gip baꞌ.

¹²To̱, yin ribir'e (mi ne i fe̱ iyu, sang Adakunom baꞌ) ke aronyining yir afikuus akak be abining aya a ta nye abafe ikuus baꞌ, ke abining'e ra shim a ta sor be wu, a tu kam be wu baꞌ.

¹³Ke abining kuwe̱ne̱ng se be amitek wu a ta nye afikuus baꞌ, ke amitek'e ra shim a ta sor be wu, a tu kam be wu baꞌ,

¹⁴kamok abining a ta nye abafe ikuus ta sak amitek wu ta te zhe̱l. Aner amitek a ta nye afikuus ta sak abining wu a ta nye afikuus baꞌ ta te zhe̱l. Ke anong baꞌ inoon yin ta “se zhe̱l baꞌ” amma kyo̱o̱rna, a se zhe̱l.

¹⁵Ke aner aya a ta nye afikuus baꞌ, a shim a ta kam be aner a ta nye afikuus, to̱, a ra kam kaye̱e̱r kusor kuri kuyu, aner amitek ka aner abining a ta nye afikuus'e, a ta kyem a kam kuwe̱ne̱ng kamok ike̱ng ikak tu gung ba baꞌ. Adakunom ti yis yir nong ta sor yir caang.

¹⁶Anyiningkasa, wan ren ka wan ta shesh atekasa wan e̱? Ka wan atekasa, wan ren ka wan ta shesh abining wan e̱?

¹⁷To̱, koangan ra sor kuri kusor kuya Agwo̱m Ágwo̱m ta shim. Ike̱ng iya ife mi ta yiir ife̱ be áfikuus'ong cice̱r.

¹⁸Aner aya a tá tsang a ku nye izhak nizham Adakunom tá ra ku yis tu birik izhak'e baꞌ. Aner aya Adakunom tú ku yis a tá tsang a nye izhak baꞌ, a tu nye baꞌ.

¹⁹Izhak nye ike̱ng ikak baꞌ, ku won dar kunye izhak nye ike̱ng ikak baꞌ, kukuus Itsi Adakunom nar.

²⁰Koangan ra sor kyo̱ndi wu ta se nizen iya Adakunom tú ku yis.

²¹Wan tsang i nye asam nizham Adakunom ta ra ka yis a? Sang tu daam baꞌ, ke wan ta kyem i wuruk kaye̱e̱r risam'me ne i nye anong.

²²Koangan aya a tá tsang a nye asam nizham Agwo̱m Ágwo̱m tá ra ku yis, a ba nye asam baba baꞌ. Anong ne asam aya Agwo̱m Ágwo̱m tú ku no̱o̱k kusor washak, n te asam aKiristi makong.

²³A tá sheshek yin, a karang, tu te yin ásam anerawe baꞌ.

²⁴To̱, ároneng, koangan ra sor kuri kusor kuya wu tin se nizham Adakunom tá ra ku yis.

²⁵To̱, natoon nanamang naya na tan nye iwe̱ne̱ng baꞌ, Agwo̱m Ágwo̱m min tonong ike̱ng ikak nong ta ka tak ba baꞌ. Amma mi ta ka no̱o̱k yin ibo̱ro̱ng, kaye̱e̱r ritek riya Agwo̱m Ágwo̱m tin no̱o̱k, ye rife̱ mi ta ka tak yin na nye katsak.

²⁶Kamok kudaam a tin se kyo̱o̱rna, mi di ye i se gye̱r anerawe ta sor dar kuwe̱ne̱ng.

²⁷Ke wan n nye kuwe̱ne̱ng, to̱, tu kam baꞌ. Amma ke wan n tsang i nye baꞌ, to̱, tu nye baꞌ.

²⁸Aner aya a tan nye kuwe̱ne̱ng, a nye rine̱n baꞌ. Ke kanamang n nye kuwe̱ne̱ng, ka nye rine̱n baꞌ. Áner áfe a tan nye kuwe̱ne̱ng tà se̱s kudaam iriri'me kaye̱e̱r kuwe̱ne̱ng nazatse na. Mi shim yin tu se̱ yin kudaam anong baꞌ.

²⁹Ároneng, ike̱ng iya mi tin fe̱ natoon'e se ana, izen ba rusek dide̱ng baꞌ. Kyo̱o̱rna, áner aya a ta be anyining ra sor kyo̱ndi ba be anyining baꞌ.

³⁰Áya a ta se riyo̱m ra sor kyo̱ndi ba se riyo̱m baꞌ. Áner aya a ta se be riye̱ rikan ra sor kyo̱ndi ba se be riye̱ rikan baꞌ. Áfe a tan shashang ike̱re̱ ra sor kyo̱ndi ike̱re̱'me nye ifuba baꞌ.

³¹Cice̱r yir i tin nye yir itomong be ike̱re̱ kazatse na, i tin te yir riye̱ nike̱re̱'me baꞌ, kamok kazatse yir ta di yir na tà gang.

³²Mi shim yin tu daam yin baꞌ. Aner aya a ta rusek dar kuwe̱ne̱ng daam be ike̱ng iya i ta nye ife Adakunom dide̱ng, iya i tana kare̱p Adakunom riye̱.

³³Amma aner aya a tan nye kuwe̱ne̱ng daam be ike̱re̱ kazatse na, a to̱ ike̱ng iya wu tana nye nong a kare̱p abining wu riye̱,

³⁴ne kuto̱ro̱ng wu te abas afa. Anong ne abining aya a ta n nye kuwe̱ne̱ng baꞌ ka kanamang, a ti daam be ike̱re̱ i ta nye ife Adakunom dide̱ng, be riye̱ rizining. Abining kuwe̱ne̱ng ti daam be ike̱re̱ kazatse na, a to̱ ike̱ng iya wu tana nye a tana kare̱p amitek wu riye̱.

³⁵Mi fe̱ anong kamok yin, sang mi fe̱ ye ma yin ru nye yin anong baꞌ. Mi shim ke yin sor yin ne i nye yin ike̱ng iya i ta se gye̱r niren Adakunom nong ta no̱o̱k yin Adakunom rice yin kusum be riye̱ rizining.

³⁶Amma ke aner aya tsang n sak be kanamang ka tan kyem kuwe̱ne̱ng, ne wu di kyo̱ndi ike̱ng iya wu ta nye be wu nye itek baꞌ, amma ne wu kushim dide̱ng, to̱, inar a ta nye kuwe̱ne̱ng i nye rine̱n baꞌ.

³⁷Amma aner aya a ta di be riye̱ wu ye sang wu ta nye kuwe̱ne̱ng baꞌ, sang kamok akak ne a tu ku sak ye a ra sor anong baꞌ, Ke a kyem a na tsesek, a ra yiir rice wu kamok wu sok kaye̱e̱r riye̱ wu ye wu ta sor dar kuwe̱ne̱ng. A nye ike̱ng iya i ta se gye̱r.

³⁸Kamok anong, aner aya a ta sok kanamang, a nye ike̱ng iya i ta se gye̱r, aya a ta sok kanamang baꞌ, a nye ike̱ng iya i ta se gye̱r ne i nar'e.

³⁹Abining kuwe̱ne̱ng ta kam be amitek wu baꞌ, ma katuk kaya amitek'e ku. Ke a ku, a ta kyem a nye kuwe̱ne̱ng be aner aya riye̱ wu ta shim, amma aner'e ra nye afikuus'e.

⁴⁰Amma mi di ye a fok kusas kusor ke a sor anong, mi fe̱ anong kamok mi gip mi di ye mi be Kabik Adakunom.