Read izere 1 aKoranti 8 Bible Online

1 aKoranti 8 - izere bible

1 aKoranti 8

¹To̱, natoon naya a tá nye kamok itsi, yir ren yir ye yir cice̱r yir ren ike̱re̱ dide̱ng. Kuren ike̱ng dide̱ng sak anerawe ta ya kuka, amma kushim be̱e̱n kuya kasho̱o̱n.

²Aner aya a ta di ye wu ren ike̱ng dide̱ng, an ren ike̱ng iya i ta se gye̱r ke wu ren nizham baꞌ.

³Amma aner aya a ta shim Adakunom, Adakunom ren aner ayong.

⁴Kamok anong, natoon kuya naya itsi, yir ren yir ye ike̱re̱ itsi'ong sor ike̱ng ikak baꞌ. Yir ren yir ye Adakunom se azining, akak kuse ze̱e̱r baꞌ.

⁵Ko ákak ta fe̱ ye ike̱re̱ ikak kuse ánerawe ta ka ya ba iben natoon kaza ka kaben, i se anong kamok ike̱re̱ se whe̱r ánerawe ta di ye i nye ádakunom ne kunom ba,

⁶gip be anong, yir ren yir ye Adakunom se azining. Wu ne a nye Ada aya a ta nye koakye ike̱ng, yir sor yir kamok wu. Yir ren yir ye Agwo̱m Ágwo̱m se azining. Wu ne a nye aYeso Kiristi aya be wu ne a nye koakye, kamok wu ne yir ti sor yir.

⁷Amma koangan ne a ren anong baꞌ. Ke áner áya a tan me̱ be ike̱re̱ itsi ya naya kuri nayong, ne á di ye na nye nafe itsi, ne aye̱ tigak kamok kuto̱ro̱ng ba ta be agap baꞌ.

⁸Sang naya ne na ta sak ta be̱ yir bubarak be Adakunom baꞌ. Ko yir tu ya yir ko i tu won dar i ya yir, na tin barang mo yir ike̱ng ikak baꞌ.

⁹Nye yin tatan, fan kusor ne̱k yin bu sak áya a tan kpa agap kaye̱e̱r kabik baꞌ, ta kpas.

¹⁰Kamok ke áya kuto̱ro̱ng riye̱ ba tan kpa agap baꞌ ta di yin áfe i ta ren yin ike̱ng'e sen yas yin naro̱ itsi, iyong tu ku sak a ta se ya ike̱ng i ta nye ife itsi aꞌa?

¹¹To̱, aroneng ayong afe aKiristi ta ku kamok wu aya kuto̱ro̱ng wu tan kpa agap baꞌ ta kpa kamok kuren ike̱ng yin'ong.

¹²Ke yin nye yin anong, i nye ye yin nye yin áronyining yin áya kuto̱ro̱ng ba tan kpa agap baꞌ rine̱n. Yin, ne i sak yin ba ta kpa. I nye ye yin nye yin aKiristi rine̱n gip.

¹³Kamok anong, ke ike̱ng iya mi tana ya ta sak aroneng ta nye rine̱n, mi ta ba ya ike̱ng'e baꞌ, fan mi bu ku sak a ta kpa.