Read izere 1 aKoranti 9 Bible Online

1 aKoranti 9 - izere bible

1 aKoranti 9

¹Yin ren yin ye mi se washak aꞌa? Mi nye amanzo aꞌa? Ka yin di yin ye mi di Agwo̱m Ágwo̱m yir aYeso be anyisi mi aꞌa? Yin nye yin inoon'i kaye̱e̱r Agwo̱m Ágwo̱m yir aYeso aꞌa?

²Ko mi fa nye amanzo nufe ákak baꞌ, katsak'e mi nye amanzo nufe yin. Kamok yin sor yin ike̱ng iya i tana tonong ye mi nye amanzo nasho̱o̱n Agwo̱m Ágwo̱m.

³Ana ne mi fek rice mi ke ákak ti fe̱ rife̱ natoon'i.

⁴Aser, yir kyem ta ya yir ne i so̱ yir kamok itomong yir aꞌa?

⁵Aser, yir kyem yir tá tsang i tseng yir be ányining aya a ta nye áfikuus kyo̱ndi ribir ámanzo ne áronyining Agwo̱m Ágwo̱m yir ne aKefas tá nye aꞌa?

⁶Ka yir be aBarnabas tsek ne ta nye yir itomong nong tin ta yir rice yir e̱?

⁷Angan kun nye itomong asozha ne a bun a ta rice wu e̱? Angan kun kap riko̱ anap ne a won dar a ya agba'me e̱? Angan kun fek inyak, ne a won dar a so̱ nabasang'e e̱?

⁸Mi fe̱ anong be kuto̱ro̱ng rinerawe tsek a? Itsi gip i fe̱ anong aꞌa?

⁹Kamok i se ni izibir kaye̱e̱r Itsi aMusa ye, “Sang tu whe̱e̱n kanu inyak nizen iya wan ta se be kushushu naya baꞌ.” Adakunom ti daam be inyak tsek a?

¹⁰Katsak'e, a fe̱ rife̱ riyong kamok yir, ka anong ba e̱? Ei, kamok fa gye̱ ke aner a ta kap be aner a ta shushu ti te riye̱ ye ba ta se̱ kanu kafuba.

¹¹Ke yir ne i tuus yir izha kabik kaye̱e̱r aye̱ yin, i nye ike̱ng ikak ke yir se̱ yir ife kuro̱m nufe yin a?

¹²Ke ákak kyem á ya nubo̱k yin, aser fa gye̱ ke yir ya yir nubo̱k yin ne i nar yir aꞌa? Yir nye yir anong baꞌ, yir ti fan yir anong be koakye fan yir bu te̱ne̱ng yir kuya kasho̱o̱n Rife̱ Ritek aKiristi.

¹³Yin ren yin ye áfe a ta nye itomong nagbang kutu kuya Adakunom iben, se̱s naya ba azong aꞌa? Áfe a ta nye itomong na abagadi, se̱s kanu kafuba azong kaye̱e̱r ike̱ng á ta be̱s'e aꞌa?

¹⁴Anong gip, Agwo̱m Ágwo̱m fe̱ be agbang kuto̱ ye áfe a ta nye itomong kutaas Rife̱ Ritek ra se̱s ike̱ng kuya kaye̱e̱r itomong ba.

¹⁵Amma mi n ra ya izining kaye̱e̱r'e baꞌ. Sang i se ye mi ta zibir yin'e na nong tin nyesek yin ike̱re̱ kuri iyong baꞌ, i tin nar ta ku, be akak tanin roon ike̱ng iya mi tin tsor kafok natoon'e.

¹⁶Gip be anong mi kyem i tsor kafok ye kamok mi taas Rife̱ Ritek aYeso baꞌ, kamok Adakunom ti sak ta taas rife̱ wu. Awo̱ be mi ke mi taas Rife̱ Ritek aYeso baꞌ.

¹⁷A fa fe̱ ye mi taas Rife̱ Ritek aYeso kamok kushim riye̱ mi ke a min no̱o̱k ishorong'i. Sang mi nye kaye̱e̱r kushim riye̱ mi baꞌ, mi nye ike̱ng iya Adakunom tin sak ye i ra nye tsek.

¹⁸Akye̱ ne mi se̱s makong e̱? Ishorong'e nye kutaas Rife̱ Ritek aYeso nawarak dar kuse̱ ike̱ng iya i ta se gye̱r ke mi se̱ kaye̱e̱r itomong kutaas Rife̱ Ritek'e.

¹⁹Mi nye asam akak baꞌ, gip be anong mi sok rice mi kyo̱ndi asam koangan nong ase̱ ta ko̱ro̱k ánerawe whe̱re̱ nufe aKiristi.

²⁰Nizen iya mi ta se be áner aYahuda, mi sok rice mi kyo̱ndi aner aYahuda nong ta ko̱ro̱k aye̱ ba. Nizen iya mi ta se be áner aya a ta kuus Itsi aMusa, mi sok rice mi kyo̱ndi aner aya a ta kuus Itsi (Itsi ti be ike̱ng ikak rice mi baꞌ gye̱rtatan) nong ase̱ ta ko̱ro̱k aye̱ ba.

²¹Nizen iya mi ta se be áya a ta kuus Itsi baꞌ, mi sok rice mi i ta te kyo̱ndi áya Itsi tin be ike̱ng ikak natoon ba baꞌ, (Sang i se ye Itsi Adakunom won dar i ni be ike̱ng ikak rice mi baꞌ, Wayo, mi kuus Itsi aKiristi), nong ta korok aye̱ áya a ta kuus itsi'me baꞌ.

²²Nizen iya mi ta se be áner aya a ta be agap nabik baꞌ, mi sok rice mi kyo̱ndi aner a ta be agap nabik baꞌ, nong ase̱ ta ko̱ro̱k aye̱ ba. Mi kirik kuse nasho̱o̱n iriri ánerawe nong ase̱ ta nye koakye mi tana kyem i nye nong ta shesh ákak ba.

²³Mi nye anong kamok Rife̱ Ritek aYeso nong ase̱ mi tin se̱ kanu kanaan kaye̱e̱r Rife̱ Ritek'e.

²⁴Aser, yin ren yin ye ke a ta maas itsi, cice̱r áfe itsi'me teng gye̱rtatan amma aner azining ne a ra ya itsi'me aꞌa? Kamok anong teng yin kyo̱ndi yin tà ya yin itsi'me.

²⁵Koangan a ta be nuyo̱ro̱k bo̱so̱p kuyo̱ro̱k'e dide̱ng nizham, ba nye anong nong a ta se̱ ishorong iya i tana bun i beseng, ishorong yir nye iya i tana sor ma izen izen.

²⁶Kamok anong mi teng kyo̱ndi aner aya a ta teng kpe̱de̱ng baꞌ, sang mi se kyo̱ndi aner aya a ta se be kuren ne a kap ibo̱k nuwun tsek baꞌ.

²⁷Wayo, mi no̱o̱k kuro̱m'i risam nong ase̱ ku tin me̱ ninye ike̱ng iya riye̱ mi ta shim, fan mi be rice mi a bin won kpe̱de̱ng nama mi tan taas ákak Rife̱ Ritek aYeso'me.