Read izere 2 aKoranti 10 Bible Online

2 aKoranti 10 - izere bible

2 aKoranti 10

¹Mi aBulus be rice mi, mi ta nye yin izong, mi aya ánerawe ti sok ye, “Aner kumees rice” ke mi se mak be yin, amma “Aner ku firik ánerawe” ke mi se be yin baꞌ. Mi ta nye yin izong kaye̱e̱r kumees rice be kuse kutatan aKiristi,

²mi ta nye yin izong ye, tin sak yin ta te aner ku ka firik yin baꞌ, nizen iya mi tana be̱ nufe yin. Kamok mi ta kyem i firik áya a ta tsang á fe̱ ye yir sor yir be kuse rinerawe.

³Gip be i ta se yir kaye̱e̱r kazatse, yir ko̱n yir itsom kyo̱ndi áfe kazatse ta ko̱n baꞌ.

⁴Ike̱re̱ itsom iya yir tin ko̱n yir nye kuri ife kazatse baꞌ. Wayo, i nye ife i ta be kukyem Adakunom, iya i tana kyem i yirik koakye kuri ikpaar ámudo̱n yir.

⁵Yir yirik yir nanan be koakye kuri ike̱ng ife kuka ta be nong a tin te̱ne̱ng kuren Adakunom ne i nye yir koakye kuri ike̱ng iya i tana sak kuto̱ro̱ng ánerawe ta sor áfe ku kuus rife̱ aKiristi.

⁶Yir se yir be kanye̱k koakye izen nong ta nes yir aner aya a ta shonong, ke yin ti fok yir kuto.

⁷Yin ye̱re̱k yin ike̱re̱ bubarak tsek, ke aner akak di ye wu nye afe aKiristi, aner'e ra ren ye yir nye yir áfe aKiristi kyo̱ndi wu gip.

⁸Ke mi fa ya kuka be kukyem Agwo̱m Ágwo̱m tin no̱o̱k nong ta ka no̱k mo yin, sang nong ta ka yirik mo yin baꞌ. Mi be ike̱ng ikak ife isum baꞌ.

⁹Mi shim yin tu di yin kyo̱ndi mi shim ta ka shirik yin be afumung mi tá zibir baꞌ.

¹⁰Kamok ákak fe̱ ye, “Afumung wu ro̱ ne a be agap, amma ke wan tu di a tas aner a tana kyem a fe̱ ike̱ng ikak be agap anong baꞌ.”

¹¹Áner kuri ayong ra ren ye ike̱re̱ yir tá zibir yir kaye̱e̱r afumung yir'e se ze̱r be kuse yir baꞌ. Yir ta tonong yir kuse yir ke yir be̱ yir.

¹²Ta kyem yir baꞌ, sang yir maas yir rice yir be ba áya a ta sok rice ba kyo̱ndi ba nye ike̱ng ikak baꞌ. Ákak kaye̱e̱r ba maas rice ba be áfudang ba. Áner kuri ayong á ta maas rice ba be áfudang'e be ritse̱ng baꞌ.

¹³Yir, ta ya yir kuka ma ta gor yir karo̱'me baꞌ, amma ta ya yir kuka nigak karo̱ kaya Adakunom ta min no̱o̱k yir kafe ka ta se ma nufe yin.

¹⁴Sang yir ti ya yir kuka ma i ta gor yir karo̱ kaya Adakunom tin no̱o̱k yir baꞌ, kamok yir ta ka nye yin awazi Rife̱ Ritek aKiristi.

¹⁵Kuka yir gor karo̱'me baꞌ, i se natoon itomong ife ákak ta nye baꞌ, yir ti te yir riye̱ ye kuno̱o̱k katsak yin ta rasak be anong ne riko̱ itomong yir kaye̱e̱r yin tin barang kuya kasho̱o̱n.

¹⁶Be anong ne yir ta kyem i nye yir awazi Rife̱ Ritek kaye̱e̱r iben íkak kasho̱o̱n yin, kamok yir shim tin ya yir kuka natoon itomong akak tan tsang an nye niben ikak baꞌ.

¹⁷Amma “Won koangan a tana ya kuka ra ya kuka'me kaye̱e̱r Agwo̱m Ágwo̱m.”

¹⁸Kamok sang aner a ta kerek rice wu ne a tu kerek baꞌ, ma ke aner aya Agwo̱m Ágwo̱m ne a tu ku kerek.