Read izere 2 aKoranti 11 Bible Online

2 aKoranti 11 - izere bible

2 aKoranti 11

¹Mi mok ye yin tana ka tsesek yin be mi kaye̱e̱r rifunamꞌi. Ni barang yin kutsesek anong.

²Mi be rifuup kamok yin, kuri rifuup riya Adakunom ta be natoon yin. Mi ma ka nye yin kanye̱k kuwe̱ne̱ng mak be aKiristi, mi shim yin tu sor yin zhe̱l nong mi ta ka nabak yin kyo̱ndi a ta no̱o̱k abining afas zhe̱l nasho̱o̱n amitek wu.

³Amma mi fok inyim ye ike̱ng iya i tase aHawa ta ka se̱ yin. Iwhen tu wo̱ro̱k be ritse̱ng wu ma a nye rine̱n. Anong ne a ta kyem a sak kuto̱ro̱ng yin ta te kpe̱de̱ng, fan yin bun won dar i no̱o̱k yin rice yin cice̱r nong ta se yin zhe̱l nasho̱o̱n aKiristi baꞌ.

⁴Ke aner akak be̱ nufe yin ye nong a ta ka taas yin itak aYeso akak ze̱e̱r be aYeso aya yir tá ma ka taas yin ka ye yin ta shan kabik kakak ze̱e̱r be kaya yin tan shan yin ka be Rife̱ Ritek rikak ze̱e̱r be riya yir tá ma ka tak yin. Mi di kyo̱ndi yin ta shan yin.

⁵Amma mi di kyo̱ndi mi ne i ti raar kaye̱e̱r ámanzo a ta ka sok ba ye ba ne á nye ayiik baꞌ.

⁶Kashim kamok sang a tin bo̱so̱p kufe̱ rife̱ baꞌ, amma mi be kuren ike̱ng. Yir n ma ka tosong yin kanang niren ze̱r ze̱r.

⁷Yin di yin ye mi nye rine̱n, mi ta te fe̱re̱ be rice mi nong ta ka sok yin yiik, mi ta ka taas yin Rife̱ Ritek Adakunom na awarak a?

⁸Mi te kyo̱ndi mi mo̱o̱r áfikuus ákak kamok mi shan kutobok nufu ba nong mi tin nye itomong nufe yin.

⁹Izen iya mi ta se mak be yin, mi be kudaam ike̱ng ikak, gip be anong mi tá ka daam yin baꞌ. Ároneng áfe a ta ne na aMakidoniya ne á ti be̱e̱n ike̱re̱ mi ta tse̱r. Mi rosom riye̱ fan mi ba ka sor yin kudaam, mi ta ya kasho̱o̱n be kunye anong.

¹⁰Kamok katsak aKiristi ka ta se kaye̱e̱r'i, aner akak kuse niben Akaya afe a ta kyem a tin roon kuya kuka'ong baꞌ.

¹¹Akye̱ sak mi nye anong e̱? Kamok mi ta ka shim yin baꞌ a? Adakunom ren ye mi ka shim yin.

¹²Mi ta ya kasho̱o̱n be kunye ike̱ng iya mi ta sen nye'me nong ta te̱ne̱ng áya a ta sen tse̱r iren kumaas rice ba tite̱re̱ be yir nike̱ng iya ba tin ya kuka.

¹³Kamok áner kuri ayong nye ámanzo abo̱o̱s, áfe itomong abo̱o̱s. Á ta sok rice ba kyo̱ndi ámanzo aKiristi.

¹⁴I nye ike̱ng azhing baꞌ, kamok Ishetan be rice wu gip, a sok rice wu kyo̱ndi amaleka akanang.

¹⁵Kamok anong i nye ike̱ng ikak baꞌ, ke ásam wu sok rice ba kyo̱ndi ásam Adakunom áfe katsak. Ni igang'e á ta se̱ ishorong itomong ba tite̱re̱ be kunye ba.

¹⁶Mi bun i toos'e gbak, ye, sang akak tu sok'e, ye mi dun ritse̱ng baꞌ. Amma ke yin di yin ye mi be ritse̱ng baꞌ, to̱, ne i ni sok yin kyo̱ndi mi nye afunam'e, nong mi ta ma tsor kafok.

¹⁷Natoon ku ni iya kuka be rice mi, sang mi fe̱ ike̱ng iya Agwo̱m Ágwo̱m ta fe̱ baꞌ, amma mi fe̱ kyo̱ndi aner ta se dar ritse̱ng.

¹⁸Kum ánerawe whe̱r ta sen ya kuka kyo̱ndi áfe kazatse ta nye, mi ta nye anong gip.

¹⁹Yin áya yin ta di yin ye yin be yin ritse̱ng dide̱ng, amma yin ra shan yin aner aya a ta be ritse̱ng baꞌ, ibo̱k ifa.

²⁰Katsak'e, yin kyem i naka tsesek yin, a ta sok yin kyo̱ndi ásam, a ti shan ike̱ng yin, á tá mo̱o̱r yin a tá ka bas yin ibo̱k.

²¹Ike̱ng isum mi ta ka tak yin ye yir kyem i nye yir anong baꞌ. Amma ke akak ya kuka be ike̱ng ikak, mi gip mi ta ya. Mi fe̱ aze kyo̱ndi aner a ta nye afunam'e.

²²Ke ba fe̱ ye ba nye áner Ibrani, mi gip mi nye. Ke ba fe̱ ye ba nye áner Isarela, mi gip mi nye. Ke ba fe̱ ye ba nye kuri Ibrahim, to̱, mi gip mi nye.

²³Ke ba di ye ba nye ásam aKiristi, mi tu nar ba! (Mi fe̱ kyo̱ndi aner aya rice ta kirik so̱!) Mi n nye itomong ne i ka nar ba, a min tes nitso̱m ne a toos'e, ne a ni whereng dide̱ng, mi n dis riku niren ze̱r ze̱r.

²⁴Kutak kutoon ne áner aYahuda ni nye awhereng iso̱k itaar be katonbo̱k. [3]

²⁵Kutak kutaar ne áner aRom ni tsosok be ishe̱n ne a tin barak be ata kutak kuzining nong á tin fe̱r. Kukpara ashi kun fo be mi kutak kutaar. Mi kun ko̱so̱ ne i woso kaye̱e̱r ashi.

²⁶Kaye̱e̱r kutsang kutseng'i, mi nyim be kawei kaye̱e̱r ágbang ísho̱ng, mi n nyiis be ágbang ákpatang. Mi n di kawei be áner'i, ne i no̱ nibo̱k áner aya sang a ta nye áner aYahuda baꞌ. Mi n di kawei kaye̱e̱r agbang kuwo̱p, ne kaye̱e̱r katse, ne i di kawei kaye̱e̱r ágbang adung, ne i no̱ ni nibo̱k ároneng áfe abo̱o̱s.

²⁷Mi n nye itomong dide̱ng, mi n so̱ risam dide̱ng, mi n so̱ kuko̱s dar ida, mi n so̱ kusor be izong be kuto̱ kukoor nizen ikak dar naya, kuwun ti shirim ne i sor ica'me.

²⁸Ze̱e̱r be anong, mi be kameneng riye̱ baꞌ kamok a tin daam ye̱r ye̱r be áfikuus cice̱r.

²⁹Angan te gbe̱re̱k nong sang mi ta te gbe̱re̱k gip baꞌ e̱? Angan ne a tú sak a tá nye rine̱n nong sang mi nye riye̱ riwe baꞌ e̱?

³⁰Ke mi ta ya kuka dim, mi tin ya kuka be ike̱re̱ i tin tosong kuraar'i.

³¹Adakunom ne a nye Ada Agwo̱m Ágwo̱m yir aYeso, aya a tana ku kerek ma izen izen, ren ye mi sen bo̱s abo̱o̱s baꞌ.

³²Nizen iya mi ta se kaye̱e̱r aDamaskus, agwo̱mna aya a ta se nubo̱k agwo̱m Aretas, sak a ta fek kuwo̱p aDamaskus nong ase̱ a tin yiir.

³³Amma, áfudang'i tiik be mi kaye̱e̱r iderse na awindo kubar kuwo̱p'e nong i tá wher nibo̱k wu.