Read izere 2 aKoranti 12 Bible Online

2 aKoranti 12 - izere bible

2 aKoranti 12

¹Mi tin se̱ ike̱ng ikak baꞌ, gye̱rtatan, amma mi ta ya kuka dim. Kyo̱o̱rna, mi ta ya kasho̱o̱n be kutaas ike̱re̱ iya i ta be̱s kyo̱ndi nabos ne iya Agwo̱m Ágwo̱m tin tosong.

²Mi ren aner akak [4] a tá nye afikuus aKiristi aye̱ kuso̱k be anaas a tá gor, aya Adakunom tú ku sok a tá ngarak'e naza kafe ataar. Mi ren ka a se kaye̱e̱r kuro̱m kuyu ka a ne̱ baꞌ, Adakunom tsek ne a ren.

³Mi bun i ren ye, aner na a tú ku sok nong a tá tseng'e naza kafe ataar, [5] ka a se kaye̱e̱r kuro̱m ka a ne̱ baꞌ, amma Adakunom ren,

⁴a tu ku sok a tá tseng'e kaye̱e̱r aParadis. Azong a foos ike̱re̱ a tana kyem a fe̱ baꞌ, kuri iya sang anerawe tana kyem a fe̱ itak'e baꞌ.

⁵Mi ti ya kuka be aner kuri ayong, amma sang be rice mi baꞌ, ma ke be kuraar'i.

⁶Ke mi fa shim ta ya kuka, sang ke mi te kyo̱ndi afunam baꞌ, kamok katsak'e ne mi ta fe̱. Amma mi ta ya kuka baꞌ, kamok mi shim akak tin sok ma i ta gor karo̱ mi tu ku se ka ike̱ng mi ta nye baꞌ.

⁷Nong fan mi bin ya kuka be ayiik ike̱re̱ mi tá dis'ong, ayong a ti tomong ike̱ng ikak kyo̱ndi ikiritsan kaye̱e̱r kuro̱m'i. Iyuna se kyo̱ndi aner kutom Ishetan nong a ta yiir ni nyesek risam.

⁸Kutak kutaar mi nye Agwo̱m Ágwo̱m akusuk ye a rin kam be ike̱ng iyong,

⁹amma a fe̱ be mi ye, “Ritek'i ta kyem, kamok kaye̱e̱r kuraar wan ne a ta di agap kukyem'i.” Kamok anong, be riye̱ rikan mi tin barang kuya kuka kaye̱e̱r kuraar'i na nong ase̱ agap kukyem aKiristi ta se mak be mi.

¹⁰Iyong ne i sak, kamok aKiristi, mi nye riye̱ rikan kaye̱e̱r kuraar'i, be ritok, ne risam mi ta so̱ ne kuri kutabak a tin tabak, be kuri kufirik a tin firik. Kamok nizen iya ne mi se kaye̱e̱r kuraar ne mi se̱ agap.

¹¹Mi te be rice mi kyo̱ndi afunam, amma yin ne i ti sak yin i ta te anong. Fa gye̱ ke yin ne i ti kerek yin mi ti nye ike̱ng ikak baꞌ gye̱rtatan, “ágbang ámanzo” yin'ong ti nar baꞌ.

¹²Ike̱re̱ iya i ta tonong ye mi nye amanzo, mi nye kaye̱e̱r yin be kutatan. Itomong azhing be ike̱re̱ azhing'ong tonong ye mi nye amanzo afe katsak.

¹³Niren inyaka ne yin ti raar yin kaye̱e̱r ribir áfikuus akak e̱? Ka kamok mi ta shim tá te kyo̱ndi acer nufe yin baꞌ e̱? Ni nye yin igaas kamok anong.

¹⁴Kyo̱o̱rna, mi n nye kanye̱k ta bun i be̱ nufe yin kutak kufe ataar. Mi shim ta ka sor yin acer baꞌ, kamok yin ne mi shim sang ike̱re̱ yin baꞌ. Yin ren yin ye sang i se gye̱r nong inoon ta tusung ike̱re̱ kamok atek ba baꞌ, amma atek inoon tusung ike̱re̱ kamok inoon ba.

¹⁵Mi ta nye riye̱ rikan ke mi ta fe̱r koakye mi ta be, ma i ta no̱o̱k rice mi kamok yin, nong ta ka tobok yin. Ke mi ta shim yin dide̱ng anong ne yin ra te̱e̱k yin kufe yin a?

¹⁶Yin be rice yin, yin ren yin ye, sang mi tá sor yin acer baꞌ. Amma mi be ritseng nong i ta ka wo̱ro̱k yin, ka anong baꞌ e̱!

¹⁷Mi ta mo̱o̱r yin be áner mi tá tom nufe yin a?

¹⁸Mi nye aTitus izong ne aroneng akak afikuus'e ye á ra be̱ nufe yin. Yin ta fe̱ yin ye aTitus'e ta mo̱o̱r yin a? Aser, mi be wu sang kuto̱ro̱ng kuzining ne yir be aꞌa? Iren izining ne yir kuus yir aꞌa?

¹⁹Sang tu to̱ yin kyo̱ndi nizen iyong cei, yir fe̱ yir nong tin te̱ne̱ng yir rice yir nasho̱o̱n yin baꞌ. Adakunom ren, yir fe̱ yir katsak kyo̱ndi áya a ta se kaye̱e̱r aKiristi. Ároneng áfe riye̱ mi, koakye ike̱ng yir ta nye yir, i nye yir nong yin tin se̱ yin agap.

²⁰Kamok mi fok inyim ye kashim ke mi be̱, mi ta be̱ tá ka se̱ yin kyo̱ndi mi ta shim baꞌ, ne yin ni sok yin kyo̱ndi yin ta shim yin baꞌ. Mi fok inyim ye mi ta be̱ ta ka se̱ yin riwo̱ng be rifuup ne riye̱ kubeseng be ku won dar kugung rice, be ritok, ne imok, be rice ribun ne akpe̱de̱ng kusor.

²¹Mi fok inyim ye ke mi bun i be̱ nufe yin, Adakunom mi tin sak ta fok isum nasho̱o̱n yin. Mi ta nye riye̱ riwe kamok whe̱re̱ kaye̱e̱r áya a tá nye rine̱n, amma an tan shishing kuse ba baꞌ, rine̱n kunye rikuna, ne kuwun kuya ba ta nye dide̱ng.