Read izere 2 aKoranti 13 Bible Online

2 aKoranti 13 - izere bible

2 aKoranti 13

¹Iyu ne i ta nye ku be̱ mi kufe ataar nufe yin. “A ta se̱ katsak koakye be rife̱ áner afa ka ataar ayi” kyo̱ndi rife̱ Adakunom.

²Izen mi ta be̱ nufe yin ife afa mi tá ko̱ro̱k yin kuto. Mi bun i toos'e. Ke mi bun i be̱, mi ta won áfe a tan nye rine̱n gbugbang tá tseng warak baꞌ, ko aner azining baꞌ.

³Kum yin ta sen tse̱r yin ike̱ng iya i ta tonong ye aKiristi fe̱ kanu be mi. Wu yo̱mo̱ng baꞌ, amma a be agap a tana nye koakye ike̱ng be yin.

⁴Katsak'e nye ye, a tu tigak kaye̱e̱r kuyo̱mo̱ng kuri rife̱ rinerawe, gip be anong ne wu ti sor kamok kukyem Adakunom. Anong ne yir yo̱mo̱ng yir kaye̱e̱r wu, gip be anong ne kukyem Adakunom yir ta sor yir mak be wu nong a ta ka nye yin itomong.

⁵Maas yin rice yin nong ta di yin ka yin kuus yin aYeso Kiristi kaye̱e̱r katsak'e, bo̱mo̱ng yin rice yin, yin ren yin ye aYeso aKiristi se kaye̱e̱r yin, sang ke yin kpa yin kumaas baꞌ.

⁶Mi mok ye, yin ren yin ye, sang yir kpa yir kumaas'e baꞌ.

⁷Kyo̱o̱rna, yir nye yir aduwa be Adakunom ye yin ta nye yin ike̱ng ikak imaan'e baꞌ. Sang nong ánerawe ta di ye yir n ya yir kumaas'e baꞌ, amma nong yin ta nye yin ike̱ng iya i ta se gye̱r, ke yir kpas yir.

⁸Kamok yir ta kyem i nye yir ike̱ng ikak tana te̱ne̱ng yir katsak baꞌ, ma ke nong katsak'e ta ya kasho̱o̱n tsek.

⁹Yir nye yir riye̱ rikan ke yir se yir gbe̱re̱k, amma ne yin se yin gbugbong. Yir nye yir aduwa ye yin ta shining yin.

¹⁰Ike̱ng i ta sak mi ta sen ka zibir yin ike̱re̱ na, kamok mi ta se mak be yin baꞌ, nong ke mi be̱, mi ta baꞌ fe̱ be agap baꞌ. Kukyem Agwo̱m Ágwo̱m tin no̱o̱k na se nong ta ka no̱k mo yin sang nong tin yirik baꞌ.

¹¹Ni igang'e, ároneng, ma yin katuk kakak. Naka tsesek yin nong ta shining, fok yin izong'i, sor yin be riye̱ rizining, sor yin caang. Be anong ne kushim Adakunom ne kameneng riye̱ ta se mak be yin.

¹²Na ka nye yin ashou be ku naka kur kuzhe̱l'e.

¹³Ázhe̱l'e aze cice̱r ta ka nye yin ashou.

¹⁴Ritek Agwo̱m Ágwo̱m yir aYeso Kiristi ne kushim Adakunom be kunyim rice Kabik Kazhe̱l'e se mak be yin cice̱r.