Read izere 2 aKoranti 3 Bible Online

2 aKoranti 3 - izere bible

2 aKoranti 3

¹Yin di yin ye, yir shim ta tonong yir rice yir gbak a? Ka yin di yin ye yir tse̱r yir akak ta ka zibir yin afumung natoon yir ka yin ta zibir yin afumung natoon yir e̱?

²Yin be rice yin ne i nye yin kufumung yir, kufe yir tá zibir yir kaye̱e̱r aye̱ yir nong koangan ta fa ne a ren.

³Yin tonong yin ye yin nye yin kufumung a tá zibir ku ta ne nufe aKiristi, a ta se̱ kamok itomong yir, kuya sang a tá zibir be ike̱ng izibir baꞌ. A zibir be Kabik Adakunom afe kutser, sang natoon ape̱f kuta ne a zibir baꞌ, amma kaye̱e̱r aye̱ ánerawe.

⁴Yir fe̱ yir ike̱re̱ iyuna be riye̱ rizining, kamok katsak yir tin be yir na Adakunom kamok aKiristi.

⁵Yir be yir ike̱ng ikak ife yir tanin tsor yir kafok ye yir kyem i tana nye yir itomong na baꞌ. Kuren kunye ike̱ng yir ne nufe Adakunom.

⁶Wu ne a sak yir ta kyem i te yir áfe itomong kushu kufas, kuya ku ta ne nufe Kabik sang kufe Itsi baꞌ. Kamok Itsi be̱e̱n be riku, amma Kabik nyesek kutser.

⁷Ke Itsi ife a ta zibir nape̱f kuta be̱e̱n be riku be kuyiik Adakunom, ma áner Isarela kyem á ni sak anyisi na aMusa baꞌ kamok kuyiik'e, gip be ku tana te shiish,

⁸to̱, kuyiik itomong Kabik ta se ane̱ e̱?

⁹Ke Itsi ife i ta be̱e̱n ánerawe riku se̱ kuyiik anong, shita itomong iya i ta be̱e̱n kuse zhe̱l nasho̱o̱n Adakunom baꞌ.

¹⁰Kamok kuyiik kushu kuzen ba be kuyiik kyo̱o̱rna baꞌ, ke a tin maas be kuyiik kushu kufas.

¹¹Ke ike̱ng iya i tana te shiish be̱ be kuyiik, to̱, i ta se ane̱ be kuyiik ike̱ng iya i tana sor ma izen izen e̱?

¹²Kamok anong, kum yir ta be yir kute riye̱ anong, iyong ne isak yir be yir agap riye̱ dide̱ng.

¹³Sang yir se yir kyo̱ndi aMusa baꞌ, a ta ne̱r áner Isarela kanyisi wu be ike̱ng ku naka kis, fan á bu di kuyiik kanyisi wu kaya ka tana te shiish.

¹⁴Amma ánerawe'me tá shonong, yong ma katuur ike̱ng ikak kuse i tu ku te̱ne̱ng ba kudi katsak'ong kaye̱e̱r kushu kuzen. Ike̱ng ku naka kis ma kyo̱o̱rna an wuruk baꞌ, kamok a kyem a tun baꞌ, ma ke be aKiristi tsek.

¹⁵A fa afumung Itsi aMusa na katuur, ike̱ng ku kis anyisi'ong tu whe̱e̱n ba anyisi.

¹⁶Amma izen iya anerawe tu ku bun nufe Agwo̱m Ágwo̱m, a tu ku tun ike̱ng ku naka kis'ong.

¹⁷To̱, Agwo̱m Ágwo̱m ne a nye Kabik'e, karo̱ kaya Kabik Agwo̱m Ágwo̱m tu ku se, kusor ne̱k kuse.

¹⁸Yir áfe sang a ta kis anyisi yir baꞌ, yir tosong yir kuyiik Agwo̱m Ágwo̱m yir kyo̱ndi amadobi, ne a ni shishing yir nong ta te yir kyo̱ndi wu, kuyiik natoon kuyiik kuya ku ta nes nufe Agwo̱m Ágwo̱m a ta nye Kabik.