Read izere 2 aKoranti 4 Bible Online

2 aKoranti 4 - izere bible

2 aKoranti 4

¹Kamok anong, kum yir ta nye yir itomong na kaye̱e̱r kuro̱ riye̱ Adakunom, yir min tun yir riye̱ baꞌ.

²Yir ban i ra yir ike̱re̱ a ta tsang a nye nune̱re̱ng ife isum ingya. Ike̱ng ikak ti gung yir be abo̱o̱s ka ta wo̱ro̱k yir ánerawe be rife̱ Adakunom baꞌ. Amma yir ban i taas yir katsak, be anong koangan ta fe̱ itak yir nasho̱o̱n Adakunom kaye̱e̱r riye̱ wu.

³Ke awazi yir ta taas yir na se kanang baꞌ, to̱, a se kanang baꞌ, kaye̱e̱r aye̱ áya a ta se ni iren kuwei.

⁴Ba kyem a di katsak'e baꞌ, kamok aner aya a tin nye rigwo̱m nazatse [2] na, n whe̱e̱n aye̱ ba. A sak ba kyem á di akanang aya a ta sam'ong baꞌ, a kanang na a ta wuruk kamok Rife̱ Ritek natoon kuyiik aKiristi, wu aya a ta taas Adakunom.

⁵Kamok yir nye yir awazi rife̱ rice yir baꞌ, amma rife̱ aYeso Kiristi a ta nye Agwo̱m Ágwo̱m, aya yir ta nye yir ásam yin kamok wu.

⁶Kamok Adakunom fe̱ ye, “Won akanang tu ya kaye̱e̱r awhi.” Wu ne a sak akanang'e ta sam kaye̱e̱r aye̱ yir, nong a ta sam kaye̱e̱r ánerawe nasho̱o̱n nong a ta ren kuyiik Adakunom nanyisi aKiristi.

⁷Gip be anong, kaye̱e̱r yir ne a sak kurum wu, yir áya i ta se yir kyo̱ndi nafeneng riro̱p tsek. A nye anong nong ta tonong ye Adakunom ne a be kukyem sang yir baꞌ.

⁸A kun ni firik yir koake̱, amma a ti canang yir baꞌ, a ti sak yir i te yir zizik, gip be anong, ka i ti tun yir riye̱ baꞌ.

⁹A ti tabak yir, amma gip be anong Adakunom ti won yir baꞌ. Nizen ikak ne á ni no̱o̱k yir risam, gip be anong á ti fe̱s yir baꞌ.

¹⁰Yir tsang i tseng yir be riku kyo̱ndi a tá nye aYeso'me, nong a ta tonong ye aYeso be kutser kaye̱e̱r kuro̱m.

¹¹Ku sor yir kaye̱e̱r kazatse na cice̱r, yir sor yir kaye̱e̱r ike̱re̱ i tana kyem i tin fe̱s yir ti se̱s yir kamok aYeso, nong ta tonong yir kutser wu kaye̱e̱r kuro̱m yir iya i tana kus.

¹²Iyong ne i sak yir ye̱re̱k yir riku nong yin ta se̱ yin kutser.

¹³I se kaye̱e̱r Kufumung rife̱ Adakunom ye, “Mi ti no̱o̱k katsak kamok anong ne mi fe̱ rife̱.” Be kabik kayong'e dim ne yir tin no̱o̱k yir katsak, kamok anong ne yir bun i fe̱ yir.

¹⁴Kamok yir ren yir ye aner aya a ta dorok Agwo̱m Ágwo̱m yir aYeso kaye̱e̱r kure̱k, a ta bun a tin dorok yir mak be wu, ne a bun a tseng be yir nasho̱o̱n wu mak be yin.

¹⁵Ike̱re̱ na cice̱r se kamok yin, nong nizen iya ritek Adakunom tana se̱ ánerawe whe̱re̱, i ta sak a ta nye riye̱ rikan be Adakunom dide̱ng nong a tu ku tiyiik makiyi.

¹⁶Kamok anong yir min tun yir riye̱ baꞌ. Iro̱m yir na ya kasho̱o̱n be kubeseng, amma kaye̱e̱r kabik yir se̱s yir agap koakye izen.

¹⁷Naban kudaam yir ta se̱s yir ta sok izen baꞌ, na ta sak yir ta se̱ yir kuyiik kufe izen izen rife ri ta nar agap a tanin maas be kudaam'e cei.

¹⁸Kamok sang ike̱re̱ áfe anyisi ta di ne yir ye̱re̱k yir baꞌ, amma ike̱re̱ iya sang a ta di be anyisi baꞌ. Ike̱re̱ iya a ta di be anyisi sor nizen cie̱k tsek, amma ike̱re̱ iya a ta di be anyisi baꞌ, sor ma izen izen.