Read izere 2 aKoranti 5 Bible Online

2 aKoranti 5 - izere bible

2 aKoranti 5

¹Kyo̱o̱rna, yir ren yir ye ke a yirik abur yir afe yir tin sor yir, iro̱m yir, Adakunom be rice wu tin no̱k yir kasa kaye̱e̱r kaza. Kasa'ong sang anerawe ne a no̱k baꞌ, ka ta sor ma izen izen.

²Yir rus yir be iro̱m na ne i be yir ifeng ye a tin kis yir be iro̱m ifas kaye̱e̱r kaza.

³Kamok ke a ti kis yir baꞌ, to̱, ta sor yir ica'me.

⁴Kum yir ta rusek yir kaye̱e̱r kuro̱m na kaye̱e̱r kazatse, yir ta rus yir kamok a min firik yir, kamok yir shim ta sor yir íca'me baꞌ. Amma yir shim a tin kis yir be kuro̱m kufe kaza nong ike̱ng ife i ta be kutser ta wo̱no̱ng ike̱ng iya i ta nye ife kuro̱m iya i tana ku.

⁵Adakunom be rice wu ne a ti nye yir iren kushishing'e, a ti no̱o̱k yir kabik wu nong ka tin tonong yir kanang ike̱ng iya Adakunom ta fe̱ ye wu tana nye dim.

⁶Kamok anong ne yir sor yir be riye̱ rizining koakye izen ne i ren yir ye ke yir sor yir kaye̱e̱r kuro̱m na, kufe kazatse, to̱, i se yir gugo̱k be kasa Agwo̱m Ágwo̱m.

⁷Kusor yir ta sor yir nye kusor kuno̱o̱k katsak sang kamok ike̱re̱ yir ta ye̱re̱k yir baꞌ.

⁸Katsak'e, yir be yir agak riye̱ baꞌ. Yir nar kushim ta kam yir kuro̱m na nong ta sor yir mak be Agwo̱m Ágwo̱m kaye̱e̱r kaza.

⁹Iyong ne i sak yir nar kushim yir wu ta fok kusas yir, ka i tuse yir kaye̱e̱r kazatse ka kaye̱e̱r kaza.

¹⁰Kamok koangan yir ta nyeseng nasho̱o̱n itsik amok aKiristi, nong a tà shan ishorong wu tite̱re̱ be ike̱ng wu tá nye kum ni wu rusek nuro̱m na, ka i tu nye itek ka imaan'e.

¹¹Kum yir ta ren yir ike̱ng iya i ta sak yir tana fok yir inyim Agwo̱m Ágwo̱m yir, to̱, i naka tsesek yir nong ta ko̱ro̱k yir ánerawe nong á tù ku bun nufe aKiristi. Adakunom ren kuse yir cice̱r, mi mok ye yin ren yin anong gip.

¹²Sang i se ye yir bun i sen tse̱r ta tiyiik yir rice yir nasho̱o̱n yin baꞌ, amma yir shim yin tin ya yin kuka natoon yir, nong yin ta ren yin ike̱ng yin tana tak yin áya a ta tsor kafok ni ike̱re̱ ife ba ta ye̱re̱k ne i nar ife kuse ba.

¹³Ke yir fa yirim yir, kyo̱ndi ákak ta fe̱, i te yir anong kamok Adakunom. Ke i nye ye yir yirim yir baꞌ, i te yir anong kamok yin.

¹⁴Koakye ne yir nye yir, sang kamok rice yir baꞌ, amma kamok ku shim aKiristi yir ne ku sak yir ta nye yir ike̱re̱'ong, yir ti no̱o̱k yir katsak ye aner azining ku kamok ánerawe cice̱r, kamok anong ne ánerawe cice̱r kus.

¹⁵A ku kamok ánerawe cice̱r, nong áya a ta sor be kutser ta baꞌ, sor kusor rice ba baꞌ, amma á ta sor kusor kuya ku tana kare̱p riye̱ aner a tá ku a tá bun a dorok kamok ba.

¹⁶Kamok anong, yir baꞌ, sen ye̱re̱k yir akak be kuse rinerawe baꞌ. Gip be i ta tsang i ye̱re̱k yir aKiristi anong, i ba ru ku ye̱re̱k yir anong baꞌ.

¹⁷Kamok anong, koangan afe a ta se kaye̱e̱r aKiristi, a te kunye kufas, ike̱re̱ izen cice̱r titei, koakye te ifas.

¹⁸Ike̱re̱ na cice̱r nye kunye Adakunom, iya kamok aYeso, a tin shishing yir i tá tsang i nye yir amudo̱n wu nong yir ta te yir áferime̱ wu, ne a ni no̱o̱k yir itomong kube̱s be ákak nong á ta te áferime̱ wu.

¹⁹Rife̱ yir se ye, Adakunom shishing ánerawe kazatse nong á ta te áferime̱ wu kamok aKiristi. Adakunom fa rine̱n ba natoon rice ba baꞌ. A ti no̱o̱k yir rife̱ ánerawe tana te áferime̱ wu.

²⁰Kamok anong, yir nye yir áner á ta se rice aKiristi. Yir ta nye yin izong kaye̱e̱r riyerek aKiristi kyo̱ndi Adakunom be rice wu ne a sen fe̱ be yin ye, i ra te yin áferime̱ Adakunom.

²¹Adakunom sak wu aya a tá be rine̱n baꞌ, a tá te afe rine̱n, kamok yir nong ase̱ kaye̱e̱r aKiristi yir ta se̱ yir kuse gye̱r nasho̱o̱n Adakunom.