Read izere 2 aKoranti 6 Bible Online

2 aKoranti 6 - izere bible

2 aKoranti 6

¹Yir áfe i ta nye yir áfudang yin kaye̱e̱r itomong Adakunom yir ta nye yin izong ye, sang tu nye yin kpe̱de̱ng be ritek Adakunom baꞌ.

²Kamok Adakunom fe̱ ye, “Izen mi tana ka tonong yin ritek'i ta fa nye, mi tá fok yin. Kunom kashesh ta fa nye, mi tá tobok yin.” Won ta ka tak yin, kyo̱o̱rna ne i nye izen Adakunom tana tonong ritek wu, katuur nye kunom kashesh!

³Yir shim yir akak tin turuk kutak natoon yir baꞌ, fan itomong yir bu se̱ narik.

⁴Yir ban i nye yir koakye kuri ike̱ng nong ta tonong yir ye, yir nye yir ásam Adakunom. Yir naka tsesek yir dide̱ng kaye̱e̱r risam be kuro̱'me ne ike̱re̱ i tin se̱s yir;

⁵be itsor ne a ni tes yir nitso̱m be kuren ne amaan itomong be kuko̱s dar ida be kusor be izong.

⁶Yir sor yir kusor kuzhe̱l'e ne kuren ike̱ng be kutsesek ne kuse kutek be kusor kaye̱e̱r Kabik Kazhe̱l'e ne kushim kufe katsak,

⁷be kufe̱ katsak ne kusor kaye̱e̱r kukyem Adakunom be ares itsom afe kuse kutek nubo̱k riya ne rimen.

⁸A ti tiyiik yir ne a bun a te be yir fe̱re̱, a ti kerek yir ne a bun a fe̱ imaan'e natoon yir. I taas yir katsak gip be anong a ti ye̱re̱k yir kyo̱ndi afe naborok

⁹a ti ren yir, gip be anong a ti ye̱re̱k yir kyo̱ndi a ti ren yir baꞌ, kyo̱ndi i sen kus yir amma i ru nye yir atser, a ti whereng yir amma a ti fe̱s yir baꞌ,

¹⁰kaye̱e̱r riye̱ riwe, gip be anong yir sor yir be riye̱ rikan. Yir be yir rizor amma yir sak yir ákak te árum nabik, yir sor yir ye yir be yir ike̱ng ikak baꞌ, amma ike̱re̱ cice̱r nye ife yir.

¹¹Ároneng, áner aKoranti, yir ta ne̱r yin ike̱ng ikak baꞌ, yir karak yir aye̱ yir.

¹²Yir ta gaar yin baꞌ, amma yin ne i karak yin aye̱ yin natoon yir baꞌ.

¹³Mi ta nye yin izong kyo̱ndi inoon'i, yin gip karak yin aye̱ yin kyo̱ndi yir ta nye yir.

¹⁴Sang tu te yin azining be áfurin baꞌ. A ta nye ane̱ a ta gung aner a ta se gye̱r nasho̱o̱n Adakunom be akardak aner e̱? Ka akanang ta nye ane̱ a ta sor be awhi e̱?

¹⁵Akye̱ gung aKiristi be Ishetan e̱? Akye̱ gung afikuus be afurin e̱?

¹⁶Akye̱ gung agbang karo̱ kuya Adakunom iben be karo̱ itsi e̱? Kamok yir ne i nye yir karo̱ a tu ku ya Adakunom afe kutser iben, kyo̱ndi Adakunom ta fe̱ ye, “Mi ta sor be ba ne i tsang kar kaye̱e̱r ba, ne mi te Adakunom ba ne ba te ánerawe mi.”

¹⁷Kamok anong, Agwo̱m Ágwo̱m fe̱ ye, “Wuruk yin kaye̱e̱r ba, naka kam yin be ba. Sang tu gaar yin ike̱ng iya i ta won dar i se zhe̱l baꞌ, nong mi ta ka shan yin.”

¹⁸“Mi ta te Ada yin ne yin sor yin inoon'i, acam be nanamang Agwo̱m Ágwo̱m ayiik'e ne ku fe̱ anong.”