Read izere 2 aKoranti 7 Bible Online

2 aKoranti 7 - izere bible

2 aKoranti 7

¹Ároneng afe riye̱ mi, kum yir tan se̱ yir rife̱ Adakunom anong. Kamok anong, won i tu kam yir be ike̱ng i tana sak kuro̱m yir ne kabik yir tana won dar se zhe̱l, won i tu sor yir zhe̱l dar rizik kamok inyim Adakunom.

²Tonong yin ye yir se yir kaye̱e̱r aye̱ yin. Yir nye yir akak rine̱n baꞌ, yir n wo̱k yir akak nong a tá nye rine̱n ka yir mo̱o̱r yir akak baꞌ.

³Sang i se ye mi fe̱ anong nong ta ka te̱n yin amok baꞌ, kyo̱ndi mi tá tsang i fe̱ be yin ye, yin se yin kaye̱e̱r aye̱ yir, be kutser, be riku.

⁴Riye̱ mi se agak be yin baꞌ, ko cie̱k baꞌ, mi ti ya kuka be yin dide̱ng. Mi se̱ agap riye̱ dide̱ng, be risam yir ta so̱ yir, riye̱ rikan'i be igak baꞌ.

⁵Nizen afe yir tá be̱ yir niben aMakidoniya, ka yir se̱ yir kufan baꞌ, koake̱ ne yir tseng yir ma yir se̱ yir kudaam, nufang kudaam kuse kaye̱e̱r aye̱ yir, yir fok yir inyim.

⁶Amma Adakunom afe a ta tsesek áya afe a ta min tun riye̱ ti tsesek yir be kube̱ aTitus.

⁷Sang kamok ku be̱ wu tsek ne ku sak yir ta nye yir riye̱ rikan baꞌ, amma itak wu tin tak yir ye, yin tú ku tsesek yin. A ti tak yir kuri ifeng afe yin ta be yin natoon'i, ne riye̱ riwe yin ne kudaam yin ta be yin natoon'i, ma mi ti barang kunye riye̱ rikan dide̱ng.

⁸Ke kufumung kuya mi tá ka zibir yin'e ta be̱e̱n yin riye̱ riwe, i ti daam baꞌ. Mi daam ni ime̱se̱ng'e gye̱rtatan kamok mi tá di kufumung'e ta ka ra yin riye̱ amma i ra se kaye̱e̱r kaban izen cie̱k tsek.

⁹Gip be anong, kyo̱o̱rna mi be riye̱ rikan sang kamok yin tá tonong yin riye̱ riwe baꞌ, amma kamok riye̱ riwe'me sak yin tá shishing yin kuse yin. Kamok riye̱ riwe kuri riya Adakunom ta shim ne yin nye yin, kamok anong yir tá nye yin ike̱ng ikak imaan'e baꞌ.

¹⁰Riye̱ riwe kuri riya Adakunom ne a ta be̱e̱n'e, sak anerawe shishing kuse wu, ri sak anerawe ta se̱ kashesh a ta fe̱ ye wu fa ren baꞌ, amma riye̱ riwe kuri rife̱ kazatse be̱ be riku.

¹¹Ye̱re̱k yin ta di yin, ike̱ng iya ife riye̱ riwe kuri rife̱ Adakunom'me ta ka be̱e̱n yin kaye̱e̱r aye̱ yin. Ri ta ka be̱e̱n yin ifeng, be kutonong ye yin se yin gye̱r. Ri ta ka sak yin riye̱ kubeseng ne i bun yin te yin zhing. Ri ta sak yin ti te yin riye̱, ne ri ka be̱e̱n yin kudaam. Ri ta ka sak yin ta sor yin be kanye̱k ye ke a nees áya a tá taam. Be anong ne yin tonong yin ye ko nabas anyaka yin be yin rine̱n nitak na baꞌ.

¹²Mi ta nye yin izibir na gye̱rtatan, sang i se ye mi daam be aner aya a ta taam baꞌ, ka aner aya a tú ku man baꞌ. Amma mi zibir nong ta ka tonong yin kanang ye Adakunom ren ye yin no̱o̱k yin rice yin kamok yir dide̱ng.

¹³Be ike̱re̱'ong cice̱r ne yir ti se̱ yir agap. Sang awan ku se̱ agap kaye̱e̱r aye̱ yir tsek baꞌ, amma yir nye yir riye̱ rikan dide̱ng i ta di yir aTitus be riye̱ rikan kamok yin cice̱r tú ku tobok yin nong a ta se̱ agap.

¹⁴Mi mu ku tak ye mi ti ya kuka be yin, yin ti te yin isum baꞌ. Amma kyo̱ndi koakye yir tá fe̱ yir be yin ta nye katsak, anong ne kuka yir natoon yin te katsak nanyisi aTitus gip.

¹⁵Kushim wu ta ka shim yin se dide̱ng, izen iya wu yiring be kuri kufok kuto yin tu ku fok yin, ne yin ku shan yin be kuyiik ne ikap kutiim.

¹⁶Mi be riye̱ rikan be yin kamok riye̱ mi se gak be yin baꞌ.