Read izere 2 aKoranti 8 Bible Online

2 aKoranti 8 - izere bible

2 aKoranti 8

¹Ároneng kyo̱o̱rna, yir shim yin tu ren yin ike̱ng ife ritek Adakunom tá nye kaye̱e̱r áfikuus aMakidoniya.

²Ba se kaye̱e̱r amaan risam dide̱ng, amma riye̱ rikan ba se dide̱ng ma ri ta sak ba, á ta nye kuno̱o̱k be riye̱ rizining ba ta se kaye̱e̱r amaan rizor.

³Mi no̱o̱k katsak ye ba no̱o̱k ike̱ng ife ba tana kyem á no̱o̱k tsek baꞌ, amma á no̱o̱k ma i nar agap ba. Be riye̱ rizining sang be agap baꞌ.

⁴Á ti nye yir izong ye ba gip, ba shim á tin se kaye̱e̱r itomong itek ife kuno̱o̱k na kamok azhe̱l'e.

⁵Ba nye kyo̱ndi yir ta tsang i sok yir kaye̱e̱r aye̱ yir baꞌ. Amma ni ime̱se̱ng'e, á no̱o̱k Agwo̱m Ágwo̱m ace ba, nama anong ne á ma no̱o̱k ace ba kamok yir kyo̱ndi Adakunom ta shim.

⁶Kamok anong ne yir nye yir aTitus izong ye a ra ya kasho̱o̱n be itomong itek ife ku tusung kuno̱o̱k yin'e, kum wu ne a tá tsang a san ne.

⁷Kaye̱e̱r koakye yin se yin kasho̱o̱n kasho̱o̱n, kaye̱e̱r kuno̱o̱k katsak yin na aKiristi, kaye̱e̱r kufe̱ kanu, kaye̱e̱r kuren katsak, kaye̱e̱r itomong kutobok akak ne kuri kushim yin tin shim yir. Won yin gip tu nar yin koangan kaye̱e̱r ritek kunyesek yin ta be yin.

⁸Sang i se ye mi shim ta ka tonong yin agap baꞌ, amma mi shim ta maas kuri kushim kufe katsak afe yin ta be yin be kufe ákak.

⁹Kamok yin ren yin ritek Agwo̱m Ágwo̱m yir aYeso Kiristi, wu ta be koakye ike̱ng, gip be anong a te afe rizor kamok yin. Rizor wu sak yin te yin árum nasho̱o̱n Adakunom.

¹⁰Ibo̱ro̱ng mi tana ka no̱o̱k yin natoon itak na se ye, i ta se gye̱r ta gang yin ike̱ng yin ta tsang i san yin'e riye̱ ri ta gor. Sang yin ne i nye yin áfe ime̱se̱ng'e kaye̱e̱r áya a ta san i no̱o̱k'e tsek baꞌ, amma yin ne i san i tonong yin ifeng yin.

¹¹To̱, gang yin itomong'e be kuri ifeng afe yin tin san yin'e, nye yin be kuri agap yin ta be yin.

¹²Kamok ke yin be yin riye̱ kuno̱o̱k'e Adakunom ta fok kusas kuno̱o̱k'e, a ta shan kuno̱o̱k'e tite̱re̱ be agap aner'e. Adakunom shim yin tu no̱o̱k yin ike̱ng ife yin ta won dar i be yin baꞌ.

¹³Sang i se ye yir shim yir ákak ta sor be̱s ne yin so̱ yin risam baꞌ, amma won koakye ike̱ng yin tu se tite̱re̱.

¹⁴Kyo̱o̱rna, won kurum yin ta ka tobok ba nike̱ng ba ta tse̱r nong ase̱ izen iya yin ma dun yin ne ba ma ka tobok yin nizen yin ta tse̱r yin. Ke yin nye yin anong koakye ike̱ng ta se tite̱re̱.

¹⁵Kyo̱ndi i ta se ni zibir kaye̱e̱r rife̱ Adakunom ye, “Aner a ta tusung whe̱re̱, ike̱ng iya a ta tusung'e nar agap wu baꞌ, afe a ta tusung cie̱k, cie̱k'e tu raar baꞌ.”

¹⁶Mi be riye̱ rikan be Adakunom, aya a ta sak aTitus ta sok kaye̱e̱r riye̱ wu be ifeng anong a ta ka tobok yin kyo̱ndi mi.

¹⁷Kamok aTitus shan izong yir tu ku nye yir'e tsek baꞌ, amma a tá be̱ nufe yin be ifeng kyo̱ndi a ta nye kanye̱k'e kaye̱e̱r riye̱ wu.

¹⁸Yir sen ku tom yir mak be aroneng akak aya áfikuus tu ku kerek dide̱ng koakye kamok kuri itomong wu ife kutaas Rife̱ Ritek.

¹⁹Sang anong tsek baꞌ, wu ne áfikuus cice̱r tu ku kasa nong a ta tseng mak be yir nizen yir ta sen tseng yir be ike̱re̱ i ta tusung yir nong tin tiyiik yir Agwo̱m Ágwo̱m ne i tonong yir kuri ifeng kutobok yir ta be yir.

²⁰Yir tu teng yir fan akak bin fe̱ yir natoon ike̱re̱ ánerawe ta nyesek whe̱re̱ na.

²¹Kamok anong ne yir tsibik yir riye̱ ta nye yir ike̱ng i ta se gye̱r, sang na a wan anyisi Agwo̱m Ágwo̱m tsek baꞌ, amma nanyisi ánerawe gip.

²²Ze̱e̱r be anong, yir tu ku tom yir ba mak be aroneng yir akak aya yir tá mu ku bo̱so̱p yir niren ze̱r ze̱r. Yir tu se̱ yir a be ifeng kutobok ánerawe, a min te riye̱ natoon yin dide̱ng ma a shim a tá ka tobok yin gbak.

²³Yin ren yin aTitus nye aferime̱ itomong'i nufe yin, ribir ároneng'e nye áner aya áfikuus tu ku kasa ba, itomong ba be̱e̱n aKiristi kuyiik.

²⁴Kamok anong, ku tonong yin ba kushim ne ike̱ng iya i ta sak yir tin ya yir kuka natoon yin nong áfikuus'e cice̱r ta di.