Read izere 2 aKoranti 9 Bible Online

2 aKoranti 9 - izere bible

2 aKoranti 9

¹Sang ma mi bun i ta zibir yin'e natoon kutobok na yin ta nye yin azhe̱l'e baꞌ.

²Kamok mi ren ifeng yin ife ku tobok ánerawe, mi ti ya kuka be yin nasho̱o̱n áner aMakidoniya. Mi fe̱ be ba ye yin áner Akaya yin tsang i nye yin kanye̱k kuno̱o̱k kum riye̱ ri ta gor. Kuri ifeng yin ta be yin sak ba gip ma dorok tsik.

³Kyo̱o̱rna, mi bun i sen tom ároneng na nong i ta tonong ye kuya kuka yir tin ya yir natoon yin se kpe̱de̱ng baꞌ, amma nong ta sor yin be kanye̱k kyo̱ndi mi tá fe̱.

⁴Kamok ke mi be̱ be áner aMakidoniya ákak ne yir be̱ i ta ka se̱ yin dar kanye̱k, yir ta fok yir isum dide̱ng, yin gip isum ta ka ro̱ yin kamok mi n mak i ni te riye̱ ni yin.

⁵Kamok anong ne mi di ye, i ta se gye̱r mi ta nye ároneng'e izong nong á ta be̱ nufe yin nizham mi ta ra be̱, nong á ta nye kanye̱k ku tusung ike̱re̱ yin tan sak ye ta no̱o̱k yin. I tá tonong ye be riye̱ rizining ne yin no̱o̱k yin, sang akak ne a ta te yin agap baꞌ.

⁶Yiring yin ye, aner aya a ta tuus ike̱ng cie̱k, cie̱k tsek ne a ta ma se̱, amma aner aya a tá tuus ike̱ng whe̱r, whe̱r ne a tà tse̱k.

⁷Koangan ra no̱o̱k ike̱ng iya wu ta sok be riye̱ wu ye wu ta no̱o̱k, sang kaye̱e̱r riye̱ kubeseng ka kamok a ta fe̱ be wu ye ma a ra no̱o̱k baꞌ, kamok Adakunom shim aner aya a ta no̱o̱k be riye̱ rikan.

⁸Adakunom ta kyem a ka no̱o̱k ritek wu ma ri ta nar ike̱ng iya wan ta tse̱r, nong ase̱ koakye izen, yin ta se̱ yin koakye ike̱ng iya yin ta tse̱r yin, nong yin ta nye yin itomong itek dide̱ng.

⁹Kyo̱ndi rife̱ Adakunom tá fe̱ ye, “A no̱o̱k áner aya a ta be ike̱ng ikak ba ike̱re̱ whe̱re̱. Itomong ritek wu se ma izen izen.”

¹⁰Adakunom ne a nyesek aner ikap izha naya a tana tuus ne a ku no̱o̱k naya kuya. Kamok anong, Adakunom ta ka no̱o̱k yin izha naya nong tà tuus yin, wu ne a tà sak naya'me ta rasak. Wu ti barang ike̱ng yin ta be yin nong yin ta kyem i tobok yin áya a ta se kaye̱e̱r kutse̱r.

¹¹Koakye izen a ta ka sak yin ta te yin árum nong ta sor yin áfe ku nyesek ike̱re̱ washak koakye izen. Be anong ne ánerawe whe̱re̱ ta tonong riye̱ rikan be Adakunom kamok kuno̱o̱k yin tana no̱o̱k yin ku tana gor nubo̱k yir.

¹²Itomong yin ta nye yin na, nyesek áner Adakunom ike̱re̱ ba ta tse̱r tsek baꞌ, amma i sak ánerawe whe̱re̱ tonong riye̱ rikan dide̱ng be Adakunom.

¹³Kamok itomong na ife yin ta min tonong yin rice yin, ánerawe ta kerek Adakunom kamok yin kuus yin Rife̱ Ritek aKiristi, ne i kasap yin ike̱re̱ yin mak be ba ne ribir áfikuus.

¹⁴Kaye̱e̱r aduwa ba kamok yin, á ta yiring be yin kaye̱e̱r aye̱ ba, kamok agbang ritek Adakunom ta ka no̱o̱k yin nar rife̱ koangan.

¹⁵Yir be yir riye̱ rikan be Adakunom kamok kuno̱o̱k'ong, yir ta kyem i fe̱ yir ike̱ng ikak baꞌ.