Read izere aGalati 1 Bible Online

aGalati 1 - izere bible

aGalati 1

¹Mi, aBulus, amanzo — aya sang akak ka ánerawe ne a tin yis baꞌ, amma aYeso Kiristi ne Adakunom a ta nye Ada, aya a ta dorok aYeso nure̱k

²A Ároneng aya á ta se aze cice̱r mak be mi ta nye yin ashou yin áfikuus i ta se yin niben aGalati.

³Ritek ne kameneng riye̱ riya ri ta nes nufe Adakunom a ta nye Ada yir ne Agwo̱m Ágwo̱m yir aYeso Kiristi se mak be yin.

⁴Wu aYeso aya a tá no̱o̱k rice wu kamok rine̱n yir, nong a tin shesh yir kaye̱e̱r amaan izam na. Iyu se anong kaye̱e̱r kushim Adakunom a ta nye Ada yir.

⁵Kuyiik nye kufe Adakunom ma izen izen. Anong.

⁶Ike̱ng'e ti sor ike̱ng azhing yin ta wor i sen won yin Adakunom afe a tá ka yis yin be ritek aKiristi nong i ta sen kubun yin rife̱ riduk zizirik anong.

⁷Rife̱ Ritek rika kuse ze̱e̱r be riyu baꞌ. Mi fe̱ anong kamok ákak kuse a tan sok kuto̱ro̱ng yin ne a tse̱r iren a tana shishing katsak Rife̱ Ritek aKiristi.

⁸Amma mi fa fe̱ ye, akak kaye̱e̱r yir ka amaleka akak a ta ne naza ayi, ta tak yin Rife̱ Ritek rikak ze̱e̱r be riya yir ta ma ka tak yin, won rimaan'e tu ku kuus ma izen izen.

⁹Kyo̱ndi yir tan tsang fe̱ yir, anong ne mi bun i fe̱ kyo̱o̱rna gbak ye, koangan ne a ta ka nye awazi yin akak ze̱e̱r be aya yin ta min no̱o̱k yin katsak, won rimaan'e tu ku kuus ma izen izen.

¹⁰To̱, yong yin di yin ye, mi shim ánerawe tin kerek ka Adakunom e̱? Ka yin di yin ye, mi shim ta kare̱p ánerawe riye̱ a? Ke i fa nye ye mi ru shim ta kare̱p ánerawe riye̱, ke mi ba nye asam aKiristi baꞌ.

¹¹Aroneng, mi shim yin tu ren yin ye Rife̱ Ritek mi ta ka taas yin nye awazi anerawe baꞌ.

¹²Mi se̱ nufe akak, ka akak ne a ti bo̱so̱p'e baꞌ, amma aYeso Kiristi be rice wu ne a ti tonong.

¹³Yin n fok yin kuri kuse mi gbugbang, nizen iya mi ta ru kuus itsi áner aYahuda, kuri amaan risam riya mi tá no̱o̱k áfikuus dar kuro̱ riye̱ ma i tse̱r iren nong tá te̱ne̱ng'e.

¹⁴Mi nye kasho̱o̱n kaye̱e̱r áfe ku kuus itsi áner aYahuda ne i nar áner aYahuda'me ákak whe̱r aya a tá nye áfe izam'i, ne i be ifeng kukuus igo̱o̱n asho̱n yir.

¹⁵Amma Adakunom kaye̱e̱r ritek wu ti kasa kum ne a min tes baꞌ, a bun a ti yis, ma a shim

¹⁶nong a tin karak anyisi nong tá ren Igon wu aYeso, nong ase̱ mi ta nye awazi Rife̱ Ritek natoon wu nufe áner aya sang á ta nye áner aYahuda baꞌ. A tá nye anong sang mi tse̱r ibo̱ro̱ng nufe akak baꞌ.

¹⁷Mi tseng na aUshalima nong tá se di áfe a tá nye ámanzo nasho̱o̱n mi baꞌ, amma mi shishing i be niben Arabiya nong mi tá ra ku bun na aDamaskus.

¹⁸Nama aye̱ ataar, mi be na aUshalima nong ta se di aSiman aBitrus, mi te kuko̱s kuso̱k be atoon be wu azong.

¹⁹Mi di ribir ámanzo'me ákak baꞌ, sang ke aYakub aronyining Agwo̱m Ágwo̱m yir baꞌ.

²⁰Mi be Adakunom mi, ike̱ng iya mi ta sen ka zibir yin'e na nye abo̱o̱s baꞌ.

²¹Nama anong mi tseng niben aSuriya ne ife aKilikiya.

²²Áfikuus aKiristi á ta se niben aYahuda ti ren baꞌ.

²³Á fok itak'e ye, “Aner a ta man ne a ni tabak yir ame sen taas itak kuno̱o̱k katsak kuya wu ta tser ke a te̱ne̱ng'e ame.”

²⁴Iyong á kerek Adakunom kamok'i.