Read izere aGalati 2 Bible Online

aGalati 2 - izere bible

aGalati 2

¹Nama aye̱ kuso̱k be anaas mi tí bun na aUshalima gbak, nizen iyong mi tseng be aBarnabas, mi bun i sok aTitus nong tá tseng yir mak.

²Mi tseng kamok Adakunom ti tonong ye i ra tseng. Mi su ku taas ba Rife̱ Ritek mi tá taas áner afe sang a tá nye aner aYahuda baꞌ. Amma na kyo̱o̱n mi taas áfe a tá nye áko̱k kasho̱o̱n'e, kamok mi fok inyim ye kashim itomong iya mi ta sen nye'me be ife mi tan nye ta wei kpe̱de̱ng.

³aTitus gip a ta se mak be mi á nye aner aHeleni'me gye̱rtatan, a ra ku sak a tá nye izhak baꞌ.

⁴Itak na dorok kamok áfikuus abo̱o̱s ákak ti no̱ ni yir nong ase̱ á tin farang yir nong á ta di kanye̱k kusor yir ne kusor kutek yir ta se̱ yir kaye̱e̱r aYeso Kiristi, nong a ti sak yir ta te yir ásam.

⁵Amma yir wor i tu ku shim yir ba'me ko cie̱k baꞌ, nong ase̱ katsak Rife̱ Ritek aKiristi'me ta se mak be yin.

⁶Amma áya a tá nye áko̱k kasho̱o̱n'e ti barang ike̱ng ikak natoon Rife̱ Ritek mi tá ka taas ba baꞌ, mi fe̱ anong kamok mi daam be kuyiik akak baꞌ, Adakunom daam ye ka wan nye angan'e baꞌ.

⁷Ba gip ba di, Adakunom tin no̱o̱k itomong kunye awazi nufe áya sang á tá nye áner aYahuda baꞌ, kyo̱ndi a tá no̱o̱k aBitrus itomong kunye awazi nufe áner aYahuda.

⁸Adakunom aya a tin te kubo̱k ni itomong aBitrus ta nye kamok a ta nye amanzo nufe áner aYahuda, wu ne a ti te kubo̱k ni itomong'i nufe áner aya a ta nye áner aYahuda baꞌ.

⁹aYakub be aBitrus ne aYohana áya a ta sor itsik'e ti shan be aBarnabas ibo̱k ifa nizen iya ba tá di ritek Adakunom tin no̱o̱k yir. Á shim ye yir ri tseng yir nufe áner aya a ta nye áner aYahuda baꞌ, nong ba ta tseng nufe áner aYahuda.

¹⁰Ike̱ng iya ba tá fe̱ se ye, yir ra yiring yir be áfe rizor, iyong ne i nye ike̱ng iya mi ta shim ke mi nye'ong gip.

¹¹Nizen iya aBitrus ta be̱ na Antakiya mi tú ku zhe̱e̱r anyisi be anyisi, kamok amaan kunye wu'me se te̱s.

¹²Kamok aBitrus'e n me̱ ne a yas be áner aya sang á tá nye áner aYahuda baꞌ, kum ne áner aya a ta se be aYakub tá tsang á be̱ baꞌ. Amma áner á ta se be aYakub'me tá fa be̱ ne aBitrus na ka ko̱ro̱k nong a tá kam rice wu be áner aya a ta nye áner aYahuda baꞌ, kamok wu fok inyim áner aYahuda áya a ta shim ye, koangan ra nye izhak.

¹³Anong ne ribir áner aYahuda áya a tá nye áfikuus kuus kama wu natoon kune̱r kuse wu, kamok kuse'ong sak aBarnabas taam gip.

¹⁴Nizen iya mi tá di kunye ba tas ike̱ng iya Rife̱ Ritek aKiristi'me tin tonong yir baꞌ, yong mi fe̱ be aBitrus nanyisi ba ye, “Wan nye afu aYahuda, amma wan sor kusor wan kyo̱ndi áner áfe a ta nye aner aYahuda baꞌ. To̱, akye̱ sak wan ta sak áner áfe sang á ta nye aYahuda baꞌ, ye ma a ra kuus igo̱o̱n aner aYahuda dim e̱?

¹⁵“Yir áya afe i ta nye yir kutes áner aYahuda, sang ‘Aduk áner áfe rine̱n baꞌ.’

¹⁶Yir ren yir ye sang ánerawe te aner azhe̱l'e nasho̱o̱n Adakunom ke a kuus Itsi aMusa baꞌ, amma kamok ku nino̱o̱k katsak wu na aYeso Kiristi. Yir gip yir min no̱o̱k yir katsak na aYeso Kiristi'me nong ta te yir ázhe̱l'e nasho̱o̱n Adakunom. Yir te yir zhe̱l kamok ku ni no̱o̱k katsak yir na Kiristi, sang kamok ku kuus Itsi baꞌ. Kamok kukuus Itsi ne ku ta sak aner akak ta te azhe̱l'e nasho̱o̱n Adakunom baꞌ.

¹⁷“Ke i nye ye yir shim ta te yir azhe̱l'e nasho̱o̱n Adakunom nizen iya yir ta te yir azining be aKiristi, (sang kamok kukuus Itsi áner aYahuda baꞌ) amma á bun á ti ye̱re̱k yir kyo̱ndi áfe rine̱n iyong tonong ye aKiristi ti to̱k yir nong ta nye yir rine̱n a? I se anong baꞌ. Ko cie̱k!

¹⁸Ke mi bun i san kukuus ike̱ng iya mi ta tsang i won, iyong tonong ye mi taam ni ime̱se̱ng'e.

¹⁹Kamok ni itsi aMusa mi te kyo̱ndi kukom'e nabik nong Itsi'me tin be ike̱ng ikak natoon'i baꞌ, nong mi ta sor kamok Adakunom.

²⁰A min tigak mak be aKiristi, sang mi ba sor kusor rice mi baꞌ, amma aKiristi ne a sor kaye̱e̱r'i. Kusor mi ta sor kaye̱e̱r kuro̱m, mi sor kamok mi min no̱o̱k katsak ni Igon Adakunom, afe a tin shim ma a no̱o̱k rice wu kamok'i.

²¹Mi ramin ritek Adakunom baꞌ, kamok ke a nye ye ánerawe ta te zhe̱l kamok ku kuus Itsi, i nye ye riku aKiristi be itomong baꞌ.”