Read izere aGalati 3 Bible Online

aGalati 3 - izere bible

aGalati 3

¹Ka! Yin áner aGalati, yin yirim a? Angan sak yin te nye yin titak anong e̱? Yin ne a ta ka tak yin itak natoon kutigak aYeso Kiristi gye̱r gye̱r.

²Mi shim ta ka rip yin ike̱ng ikak izining, yin se̱ yin Kabik Kazhe̱l'e kamok yin ta kuus yin Itsi ka kamok yin tin no̱o̱k katsak nike̱ng iya yin tá fok yin e̱?

³Aser, yin se yin zizik anong a? Yin san yin'e gye̱r kaye̱e̱r Kabik, amma i bun i tse̱r ta gang yin be kuro̱m a?

⁴Aser, iriri risam yin ta so̱ yin nye ku kpe̱de̱ng tsek a? Ka i nye kamok ike̱ng ikak a?

⁵Adakunom ta ka no̱o̱k yin Kabik wu ne a nye itomong azhing kaye̱e̱r yin, kamok yin ta kuus yin Itsi ka kamok yin tin no̱o̱k yin katsak nike̱ng yin tá fok yin e̱?

⁶Yin di yin kuse Ibrahim, “A ti no̱o̱k katsak nike̱ng Adakunom tá fe̱ be wu, yong a tú sok kyo̱ndi aner azhe̱l'e.”

⁷Kamok anong, ren yin ye áya a ta no̱o̱k katsak nye inoon Ibrahim.

⁸Kufumung rife̱ Adakunom tsang fe̱ ye, Adakunom ta sak áya sang á ta nye aYahuda baꞌ ta se gye̱r nasho̱o̱n Adakunom kamok kuno̱o̱k katsak ba, ne a tsang a tak Ibrahim Rife̱ Ritek'e nakuruk ye, “Kamok wan, ánerawe kazatse cice̱r ta se̱ ritek Adakunom.”

⁹Ibrahim tin no̱o̱k katsak na Adakunom yong a tú ku te kuce̱, anong ne koangan ne ke a ti no̱o̱k katsak na Adakunom, a tu ku te kuce̱ mak be Ibrahim.

¹⁰An fiming cei áfe a tin fereng ni ikuus Itsi aMusa, kamok i se ni izibir ye “An fiming koangan áfe a ta won dar á yiir nye koakye ike̱ng i ta se ni izibir kaye̱e̱r kufumung Itsi aMusa'me baꞌ.”

¹¹I se kanang ye sang akak ta se gye̱r nasho̱o̱n Adakunom ye kamok á kuus Itsi baꞌ I se ni izibir ye, “Áner azhe̱l'e nasho̱o̱n Adakunom ta se̱ kutser kamok kuno̱o̱k katsak ba.”

¹²Ike̱ng ikak gung Itsi be kuno̱o̱k katsak baꞌ, i ban i se ni izibir ye, “Aner aya a ta nye ike̱re̱ ife Itsi ta fe̱ ye cice̱r tà se̱ kutser kamok a kuus Itsi'me.”

¹³aKiristi ti shesh yir kaye̱e̱r kufiming afe i tá be yir kamok Itsi, be kute aner a tu ku fiming kamok yir. I se ni izibir ye, “Koangan afe a tu ku tigak, a tú fiming.”

¹⁴aKiristi ti shesh yir nong áner áfe a ta nye áner aYahuda baꞌ ta se̱ ritek a ta no̱o̱k Ibrahim kamok aYeso Kiristi. Be kuno̱o̱k katsak yir, yir ta se̱ yir Kabik Kazhe̱l'e Adakunom ta tsang a no̱o̱k kuto̱ ye wu tin no̱o̱k yir.

¹⁵Aroneng, mi fe̱ kuri rife̱ rinerawe kyo̱ndi akak ta kyem a te̱e̱k ka ti barang nike̱ng ánerawe ta tsang a sak ye a ta nye baꞌ. Anong ne i se nitak na.

¹⁶Ike̱ng iya Adakunom tá tsang a ni sak'e, a fe̱ be Ibrahim ne igon kakak kaye̱e̱r kuri wu nasho̱o̱n, sang kufumung rife̱ Adakunom fe̱ ye, “Be inoon baꞌ.” Rife̱'me se natoon ánerawe baꞌ amma “natoon igon kakak kaye̱e̱r kuri wan” Rife̱'me se natoon aner azining, a nye aKiristi.

¹⁷Ike̱ng iya mi tin fe̱ natoon'e nye, Itsi a tá no̱o̱k aye̱ kusok inyak anaas be isok taar (430) nama Adakunom tá tsang a no̱o̱k kuto̱ be Ibrahim, kamok anong i sak Adakunom won i no̱o̱k kuto̱ wu tá tsang a nye nong ta birik'e baꞌ.

¹⁸Ke i nye ye a kyem a se̱ kutser nikuus Itsi, to̱ i nye ye wan kyem i se̱ kamok kuno̱o̱k kuto̱ Adakunom tá nye baꞌ, amma Adakunom kaye̱e̱r ritek wu ne a no̱o̱k Ibrahim kamok wu ne a no̱o̱k kuto̱'me.

¹⁹To̱, Itsi'me nye ife akye̱ makong e̱? A ti barang Itsi'me nong i ta tonong ánerawe rine̱n ba. Itsi'me ya kasho̱o̱n be itomong ma izen iya kuri Ibrahim na be̱, [1] aya be wu ne Adakunom ti no̱o̱k kuto̱. Adakunom tom ámaleka be Itsi'me nizen iyong nong i ta gor nubo̱k aner akak a ta no̱ natite ánerawe be Adakunom.

²⁰Kamok ánerawe ta kyem a no̱ aner azining baꞌ ma áner afa, to̱ Adakunom se azining.

²¹To̱, yong Itsi'me ta yirik kuto̱ Adakunom tá tsang a no̱o̱k a? Ko cie̱k, i se anong baꞌ, kamok ke i nye ye ánerawe shan Itsi aMusa nong a tin se̱ kutser to̱, i nye ye koangan ta kyem a te zhe̱l nasho̱o̱n Adakunom be kukuus Itsi.

²²Amma kufumung rife̱ Adakunom fe̱ ye rine̱n zim ánerawe kazatse na cei, nong ase̱ ike̱ng Adakunom ta tsang a ni no̱o̱k kuto̱, iya i ta be̱ kamok kuno̱o̱k katsak na aYeso Kiristi, iya Adakunom ta no̱o̱k aya a ti no̱o̱k katsak.

²³Nizham kuno̱o̱k katsak na ta ra be̱ yir se yir kyo̱ndi áfe itso̱m kamok Itsi, yir se yir nuwhe̱e̱n ma izen iya a tin tonong yir kuno̱o̱k katsak.

²⁴Kamok anong Itsi ne a tu ku sak nong i tin bereng yir ma izen aKiristi tana be̱ nong ase̱ a tin sak yir ta te yir azhe̱l'e nasho̱o̱n Adakunom kamok kuno̱o̱k katsak yir.

²⁵To̱, kyo̱o̱rna, izen kuno̱o̱k katsak tan be̱, Itsi ba be̱ ike̱ng ikak natoon yir.

²⁶Yin nye yin inoon Adakunom cice̱r kamok yin ti no̱o̱k yin katsak na aYeso Kiristi.

²⁷Kamok yin cice̱r áfe i ta te yin azining be aYeso kaye̱e̱r abatisma ne yin sok yin kuse aKiristi.

²⁸Akak ba nye afu Yahuda ka aduk'e baꞌ, akak ba nye asam ka a se washak baꞌ, ne akak ba nye aner amitek ka aner abining'e baꞌ, kamok cice̱r yin i nye yin aner azining kaye̱e̱r aYeso Kiristi.

²⁹Ke yin nye yin áfe aKiristi to̱, i nye ye yin nye yin inoon Ibrahim, áfe kuya kutse wu kyo̱ndi Adakunom tá tsang a no̱o̱k kuto̱.