Read izere Afisa 1 Bible Online

Afisa 1 - izere bible

Afisa 1

¹Mi aBulus, aya i ta te amanzo aYeso Kiristi nushim Adakunom, mi ne i sen ka zibir yin kufumung na yin ázhe̱l'e áya a ta se kaye̱e̱r kuwo̱p Afisa, áya a ta kuus aYeso Kiristi be katsak.

²Ritek be kameneng riye̱ Adakunom a ta nye Ada yir ne Agwo̱m Ágwo̱m yir aYeso Kiristi se mak be yin.

³Nakerek nye nafe Adakunom ne a bun a nye Ada Agwo̱m Ágwo̱m yir aYeso Kiristi, aya a tin no̱o̱k yir ritek kaye̱e̱r rigwo̱m wu kaye̱e̱r kaza ne a bun a tin no̱o̱k yir koakye kuri ritek kufe kabik.

⁴Kamok kum ne Adakunom n tsang a nye kazatse nizham baꞌ, a tsang a ni kasa yir nong a tin gung yir mak be aKiristi, nong ta se yir zhe̱l ne i se yir dar rizik nasho̱o̱n wu. Kamok wu tin shim yir,

⁵iyong ne i sak wu ta tsang a ni kasa yir nong ta te yir inoon wu kamok itomong aYeso Kiristi. A nye anong nushim wu ne ritek wu.

⁶A nye anong, nong yir tà kerek yir kuyiik ritek wu, riya wu tin no̱o̱k yir nawarak kamok Igon wu kaya wu ta shim.

⁷Kamok wu Adakunom ti sheshek yir be kunyosong naso̱k aYeso, ne yir se̱ yir kure̱ng rine̱n. A nye anong kamok agbang ritek wu,

⁸riya a tin no̱o̱k yir nawarak be kukyem ne kuren ike̱ng cice̱r.

⁹Adakunom sak yir ren yir ike̱ng wu iya i ta se nune̱re̱ng kyo̱ndi wu ta shim, iya a ta nye kanye̱k'e kaye̱e̱r aKiristi.

¹⁰Kanye̱k wu se, ye ke izen'e nye dim, a tà gung ike̱re̱ cice̱r, ike̱re̱ iya i ta se kaye̱e̱r kaza be iya i ta se kaben nong aner azining tin nye rigwo̱m, aKiristi ne a tin nye rigwo̱m'e.

¹¹Kamok wu ne Adakunom tsang a ni kasa yir nong ta te yir afu. Wu ne a nye koakye kyo̱ndi riye̱ wu ta shim.

¹²A nye anong, nong ase̱ yir áner aYahuda tin te yir riye̱ na aKiristi ni ime̱se̱ng'e, ta sor yir áfe ku ka kerek kuyiik Adakunom.

¹³Kamok aKiristi, ne yin gip yin te yin áfe Adakunom nizen iya yin tá fok yin rife̱ katsak ne Rife̱ Ritek rife kutser. Izen iya yin ti no̱o̱k yin katsak natoon aKiristi, Adakunom tá no̱o̱k yin Kabik Kazhe̱l'e kyo̱ndi a tá tsang a no̱o̱k kuto̱ ye wu tà nye anong, nong a tà tonong ye yin nye yin afu.

¹⁴Kabik Kazhe̱l'e ne ka ti tonong yir ye Adakunom tin no̱o̱k yir ike̱ng iya a tá tsang a no̱o̱k kuto̱ ye wu tà no̱o̱k, ma nizen iya Adakunom tana sheshek afu. Iyuna se anong, nong anerawe ta kerek kuyiik wu.

¹⁵Kamok anong, kum mi tá fok itak kuno̱o̱k katsak yin natoon Agwo̱m Ágwo̱m yir aYeso be kuri kushim yin tá shim yin ázhe̱l'e cice̱r.

¹⁶Mi won kunye riye̱ rikan be Adakunom kamok yin baꞌ, ne i yiring be yin kaye̱e̱r aduwa mi.

¹⁷Mi yiir kunye aduwa ye Adakunom afe Agwo̱m Ágwo̱m yir aYeso Kiristi, Ada yir ayiik'e ye a ra ka no̱o̱k yin kabik kafe kukyem ne kafe kuren ike̱ng nong ase̱ yin tù ku ren yin dide̱ng.

¹⁸Mi bun i nye aduwa ye Adakunom ra ka karak yin aye̱ nong yin tin barang yin kuren ike̱ng i ta sak yin tin te yin riye̱ ni ike̱ng wu tá ka yis mo yin, ku ta bun kunye, kurum wu agbang kuya ázhe̱l'e tana ya kutse'me.

¹⁹Mi bun i nye aduwa ye yin ta ren yin agbang kukyem wu kufe áya a tin no̱o̱k katsak. Kukyem kuya ku ta nye itomong kaye̱e̱r yir se kuzining be kuyu.

²⁰Kukyem wu kuri kuya wu tá tonong nizen wu tá dorok aKiristi kaye̱e̱r ikom ne a ku sak a tá sonong nubo̱k riya wu kaye̱e̱r kaza.

²¹Azong ne aKiristi ti nye rigwo̱m natoon áfe rigwo̱m ne ágwo̱m ne áfe agap ne koakye kuri ike̱ng iya a tin te riyerek nasho̱o̱n, amma ma izen izen.

²²Adakunom won koakye nubo̱k wu ne a ku kasa a tin nye rigwo̱m natoon ike̱re̱ cice̱r ne a te ako̱k kasho̱o̱n ikilisiya.

²³Áfikuus'e nye kuro̱m aKiristi. Kaye̱e̱r áfikuus'e ne aKiristi shining, kyo̱ndi wu be rice wu ta shining koakye kuri ike̱ng kaye̱e̱r koakye kuri iren.