Read izere Afisa 5 Bible Online

Afisa 5 - izere bible

Afisa 5

¹Kamok anong, kum yin ta nye yin inoon na áya Adakunom ta shim, to̱, kuus yin ane̱e̱ Adakunom.

²Sor yin kusor ku naka shim kyo̱ndi aKiristi tin shim yir, a tá no̱o̱k rice wu kamok yir, kyo̱ndi asidaka aya a ta be iko̱o̱n itek, aya a ta nye kamok Adakunom.

³Kum yin ta nye yin áfe Adakunom, sang a tu fok itak rikuna kaye̱e̱r yin, ko cie̱k baꞌ, ka kunye ike̱re̱ isum ka rinyisi rikan kaye̱e̱r yin baꞌ, kamok ike̱re̱ kuri iyong nye itek kaye̱e̱r ánerawe Adakunom ázhe̱l'e baꞌ.

⁴Ka a tu fok amaan kunye, ka akpe̱de̱ng rife̱ ka ame̱rzhe̱k rife̱ kaye̱e̱r yin baꞌ, kamok i se gye̱r a ta foos rife̱ kuri riyong kaye̱e̱r yin baꞌ, amma ban yiir tonong yin Adakunom riye̱ rikan ingya.

⁵Kamok yin ren yin tseng tseng ye aner a ta nye rikuna ka aner a ta nye ike̱re̱ isum ka aner a ta be rinyisi rikan (aner kuri ayong se kyo̱ndi aner a ta kuus itsi) á be ishorong kaye̱e̱r rigwo̱m aKiristi ka rife Adakunom baꞌ, ko cie̱k.

⁶Sang tu won yin akak ta ka wo̱ro̱k yin be nadirik kamok be kuri rine̱n kuri riyong ne riye̱ kubeseng Adakunom tin tiik natoon áfe kushonong.

⁷Kamok anong, ike̱ng ikak ta ka gung yin be ba baꞌ.

⁸Kamok yin tsang i se yin na awhi gbugbang, amma kyo̱o̱rna yin se yin na akanang kamok Agwo̱m Ágwo̱m. Sor yin kyo̱ndi inoon akanang.

⁹(Ritek a ta se̱ nusor akanang nye kunye kutek be kusor kuzhe̱l'e ne kunye katsak)

¹⁰Ne i tse̱r yin ike̱ng iya i tana kare̱p Adakunom riye̱.

¹¹Kam yin be akpe̱de̱ng ike̱re̱ awhi, ban i te̱s yin ike̱re̱'me ingya.

¹²Kamok i nye ike̱ng isum a tana fe̱ rife̱ natoon ike̱ng iya a ta nye na nune̱re̱ng.

¹³Kamok akanang'e ta te̱s koakye nong koangan ta di ne a ren.

¹⁴Kamok akanang'e ne a sak a ta di koakye de̱s iyong ne i sak rife̱ Adakunom ta fe̱ ye, “Dorok, wan aya i ta se be ida, dorok kaye̱e̱r áfe a tan kus ne akanang aKiristi tin samang natoon wan.”

¹⁵Kamok anong, sak yin riye̱ be kuri kusor yin dide̱ng, sang tu sor yin kyo̱ndi áfe a ta se dar ritse̱ng baꞌ, amma sor yin kyo̱ndi áfe a ta be ritse̱ng.

¹⁶Ni nye yin itomong be koakye kuri izen iya yin ta se̱ yin gye̱r kamok izen na nye imaan'e.

¹⁷Kamok anong tu te yin áfunam'e baꞌ, amma ren yin ike̱ng iya i ta nye riye̱ Agwo̱m Ágwo̱m.

¹⁸Sang tu so̱ yin kugbe̱re̱ ma ta feng yin'e baꞌ, kamok iren kuwei ne i nye iyong, amma shining yin be Kabik Kazhe̱l'e n ingya.

¹⁹Ke yin sen fe̱ yin kanu ne i ninye yin itomong be kufumung aZabura ne abom riye̱ rikan ne abom azhe̱l'e. Yiir bom yin abom kaye̱e̱r riye̱ yin kamok Agwo̱m Ágwo̱m.

²⁰Koakye izen, yiir tosong yin Ada Adakunom riye̱ rikan kamok koakye, kaye̱e̱r riyerek Agwo̱m Ágwo̱m yir aYeso Kiristi.

²¹Naka foos yin kamok kuyiik aKiristi.

²²Yin ányining iwe̱ne̱ng kuus yin ike̱ng atek yin ta fe̱ be yin kyo̱ndi yin ta kuus yin Agwo̱m Ágwo̱m.

²³Kamok atekasa ne a nye rice abining wu, kyo̱ndi aKiristi ne a ta nye ako̱k kasho̱o̱n ikilisiya, ba ta nye kuro̱m wu. Wu be rice wu nye aner kashesh'e.

²⁴To̱, kyo̱ndi áfikuus ta kuus aKiristi anong ne ányining ta ma kuus atek ba kaye̱e̱r koakye.

²⁵Yin átek, afe i tan nye yin iwe̱ne̱ng, shim yin ányining yin kyo̱ndi aKiristi ta shim áfikuus ma a no̱o̱k rice wu kamok'e,

²⁶nong a tá sak a tá te zhe̱l be ku ka taas ba rife̱ Adakunom riya ri tá ka kusu ba kyo̱ndi ashi nong a ta forop.

²⁷A nye anong, nong a ta be̱e̱n áfikuus'e nasho̱o̱n wu yiik, dar rizik ka ike̱ng ikak i ta risik, amma zhe̱l dar ike̱ng ikak imaan'e.

²⁸Kamok anong, i se gye̱r atek afe a tan nye iwe̱ne̱ng tana shim ányining ba kyo̱ndi ba ta shim iro̱m ba. Aner aya ne a ta shim abining wu, i nye ye a shim rice wu.

²⁹Kamok akak kuse a ta rawu kuro̱m wu baꞌ, amma a nyesek kuro̱m wu naya ne a ni sak riye̱, kyo̱ndi aKiristi tá nye be áfikuus.

³⁰Yir ta nye yir ikap kuro̱m wu.

³¹Kamok i ta se ni izibir ye, “Aner amitek tà won ada be ango̱ wu nong a tà naka gung be abining wu ne áner afa'ong te kuro̱m kuzining.”

³²Iyuna nye agbang ike̱ng i tana ro̱ yin tana ren yin, amma mi ti fe̱ natoon aKiristi be áfikuus.

³³Gip be anong, koangan kaye̱e̱r yin gip a ra shim abining wu dim kyo̱ndi a ta shim rice wu ne abining'e ma ti yiik amitek wu.